Romans2

1Lunưq, nee dro hơq — paq kê kơyq ragơy xưh xadrah — ay leh e kakơq kajoq tagêh hlê ik, vii đom varơuq kajoq đơu ay xưh xadrah adro kadrơy, yôôych ay kadih atok xadrah ay; bơyh ay, laa adro xưh xadrah, kung lôp kaluh varơuq nưq.2Măn haay heq xet đaneq varơuq xưh xadrah ku Kơy Plêêk laa tamuut dii varơuq dik tachơơl hlê khơl adro lôp kaluh varơuq đanưq.3Bơh, nee adro hơq, laa dro xưh xadrah khơl leq lôp kaluh varơuq đanưq đơu kadih xăk kung dơơp kaluh varơuq đanưq, e jơq ay biit truh varơuq neq, đaneq ay hnoq xaloot klơlh varơuq xưh xadrah ku Kơy Plêêk?4Long laa ay 'yo leh ra kajoq varơuq karoh e ku xuum hwêêt ji xuum atuq xuum kung varơuq chiuq uunq ku Kadraq, vii leh xet đaneq xuum hwêêt ku Kơy Plêêk jarooy ay truh varơuq wiit xuum?5Bơh gamưq tyauq varơuq găk khăk ku ay ji xuum klaak leh chiuq wiit xuum, ay đong kadih agoop xôq varơuq tôq dayh ka xăk đom hngơy tôq dayh ji kahnoq vlôh truh varơuq xưh xadrah hyioh jăk ku Kơy Plêêk,6laa Kơy hnoq bla ka tôôy dro 'yo tyauq kaluh varơuq dơơp ku adro nưq:7Muuyq panưh laa varơuq riirh đơơy đơơy deng ka khơl leq axek akhiim tađnah tađnaak ji vanê vado kung jaq triq măn miet tyauq varơuq kajưk xuum ku varơuq kaxay,8măn pi hơq laa varơuq tôq dayh kung đơơt jaraq rahưk rahưk deng ka khơl adro bơyh hmưch trôôch kalih ji leh tameng varơuq dik đơu biq aluut pamê tyauq varơuq leh hyioh jăk.9Pơơl dal ji pơơl hwơơl măn tol tôôy phool hiel ku manih dơơp varơuq xơk, ku manih Jo Thaiq adroyq dik, hloay ku manih Hi Lap.10Bơh tađnah tađnaak ji vanê vado kung varơuq hrok hrol deng ka tôôy dro dơơp varơuq kaxay, ka manih Jo Thaiq adroyq dik, hloay ka manih Hi Lap.11Vii leh e varơuq bing kơyq đom varơuq rama vlôh ku Kơy Plêêk.12Long khơl leq heq lôp kadrôôp tyauq kach leh e ganuun, yôôych kung hnoq kaxêêt hlơơp tyauq kach leh e ganuun, ji long khơl leq heq lôp kadrôôp măn katul ganuun, yôôych hnoq biq xưh xadrah bơơn ganuun.13Vii be aalq khơl adro tameng ganuun laa hyioh jăk kangưưr Kơy Plêêk, bơh khơl adro dơơp tyauq ganuun yôôych hnoq ik xưng hyioh jăk.14Vii tuôôy kaluh tamooy daak kadrơy, laa khơl tamooy leh e ganuun, tyauq trôôk tưq nhiên dơơp kaluh varơuq ku ganuun, yôôych long leh e ganuun, oot laa ganuun ka kadih oot,15nưq laa khơl adro ăm hloq kaluh varơuq dơơp ku ganuun jah valơk đom xuum oot, tuôôy xuum klaak oot dơơp xanưk, ji kaluh iq biit rôp xadrah long pheq đnooy apok tagêh katul kadih oot dii mamuuyq16đom hngơy đơu Kơy Plêêk hnoq xưh xadrah kaluh varơuq padu kadook ku khơl kadrơy gamưh hlê Lôôk Wơơt Dêh Jê-xu, tyauq đaji Hêêl Kaxay ku gô.
17Măn atoh ay xok yal laa manih Jo Thaiq, gamưh muut ganuun, pa ưưt akhwoak đom Kơy Plêêk,18hlolh xet iq trôôch Kadraq, 'yo kahra kaluh varơuq đêh xateek galơh iaq jah pato dayq xing đom ganuun,19katuôôy, ay kadih tuôq kajưk kadih xăk laa manih jarooy trôôk khơl adro apul, xaraar tađnah ka khơl leq măn đom kamơng jaluk,20adro pato dayq bing vlô apoop, thơy pato bing adro oh de, vii jah e trôôk daak ku xa hok ji ku varơuq dik đom ganuun,21anưq yôôych, nee adro pato dayq adro kadrơy hơq, ay be pato kadih xăk long aleq? Nee adro padoh pato te xa atôk hơq, ay e xa atôk be?22Nee adro dăt leh ik tuut taak hơq, ay e tuut taak be? Nee adro ramêq kaluh vangưl hơq, ay e atôk đôô kaluh hnhư đơơp be?23Ay pa ưưt xăk laa adro măn đom ganuun, ay e đnooy ra ơơh Kơy Plêêk bơơn varơuq gưlh lôp ganuun be?24Bơyh “yal Kơy Plêêk biq katơơk galơh katul đom kaluh tamooy daak kadrơy vii kơq êêp,” dang đaji apok heq jah valơk.25Dik, tabơh pheep goch kađuh taway truh e ich atoh ay hnoq ik dưk dơơp ganuun, bơh atoh ay laa adro gưlh lôp ganuun, yôôych varơuq goch kađuh ku ay heq vlôh jêêk be goch kađuh.26Nưq yôôych, atoh muuyq dro koq goch kađuh tameng jư kaluh đooy vôôch ku ganuun, yôôych be aalq varơuq koq goch kađuh ku dro nưq hnoq ik jauq đaji varơuq heq goch kađuh be aalq?27Ji tuôôy dơơp xaleep ganuun, adro koq goch kađuh aduq xăk xamơk hnoq xưh xadrah ay, 'ngưq adro xing chư valơk ji pheep goch kađuh laa adro vii gưlh lôp ganuun.28Vii be aalq muuyq dro xing kaveeh pi gôk laa manih Jo Thaiq, kung be aalq thưq măn pi gôk tol xăk xamơk laa pheep goch kađuh,29tađôôy muut đnư, manih Jo Thaiq laa xăk xamơk măn aduq kinq kadook pi 'lăp, ji pheep goch kađuh laa ku xuum klaak bơyh Kơy Phool Hiel, leh aalq bơơn chư valơk; đơu varơuq xưngq vado ku adro nưq be aalq xing koot manih bơh laa xing Kơy Plêêk.

FAR EAST BROADCASTING COMPANY

https://app.library.bible/content/37a1dc7a54269bd3