Revelation19
1Atêq kaluh varơuq nưq, gô tameng hnưm dang đaji apok đnooy kôt ku muuyq bing manih thier karôp tol plêêk, đaneq: “Ha-lê-lu-ja! Varơuq wơơt xok, tađnah tađnaak ji taay yaak thuôk xuq Kơy Plêêk haay,2vii kaluh varơuq xưh xadrah ku Kadraq laa dong dik ji hyioh jăk,bơyh Kadraq heq xưh xadrah mo xakwoah kôt'ngưq laa adro dơơp va ih va oop vari bơơn katik apuq atrăp ku ni.Kadraq heq bla hlê ka vahaap ku khơl xapok Kadraqxing ti ni.”3Yôôch oot đnooy yưk thưq vaarq, đaneq: “Ha-lê-lu-ja! 'Nhuuy xing aduq ni kưq tapol tok dong truh đơơy đơơy, miet miet.”4Vaarq kưl poot khơl draq ji poot poop ôô kul xăk pôôt ji kuh ayuôôt Kơy Plêêk, Kơy đong 'ngôôy tol ngaai, đaneq: “Amen. Ha-lê-lu-ja!”5Muuyq apok đnooy xing ngaai đnooy vlôh, đaneq: “Dayh kacheeu ayuôôt Kơy Plêêk haay,nee dêq hloay khơl xapok Kadraq,ji khơl dro kul yôq Kadraq,khơl de hloay khơl kôt!”6Yôôch gô tameng apok đnooy đaji hnưm ku bing manih thier karôp, dang hnưm ku 'ngưng alook daak, ji dang đaji hnưm kơy kata kalh, đaneq: “Ha-lê-lu-ja! Vii Lôôk laa Kơy Plêêk ku haay, 'ngưq laa Kơy Taay Yaak, dưk xakaq.7Haay dayh hlah hlaak, luh laak,ji tơơk tưp tađnah tađnaak tok Kadraqvii lêh pajêêk ku Trưưu Koot heq truh,ji amưưy ku Kadraq heq ralauq xăk xôq 'miêh,8varơuq jah kahniq ka amưưy nưq laa amưưy jah hlưp aau bơơn vaayh lanh miimtađnah klưng xarêh xaraat”(Vii vaayh lanh miim laa kaluh varơuq hyioh jăk ku khơl vah.)9Yôôch yaak plêêk nưq đnooy dii gô: “Dayh valơk: Vanong ka khơl dro jah mơơy jưq waal pajêêk Trưưu Koot.” Kơy nưq kung đnooy dii gô: “Neq laa kaluh apok dong dik ku Kơy Plêêk.”10Gô kul pôôt aduq jôôk yaak plêêk nưq xôq kuh ayuôôt kơy, đơu kơy đnooy dii gô: “Te dơơp anưq! Gô laa dro kung dơơp xapok đaji ay ji khơl oh ay ku ay, laa khơl dro e apok xanưk ku Lôôk Jê-xu. Dayh kuh ayuôôt Kơy Plêêk, vii apok xanưk ku Lôôk Jê-xu laa phool hiel ku apok hlit.”11Yôôch gô hloq plêêk luh vlôh, ji 'yo hơq, muuyq ôô ahleh ko, ji Kơy acho tol ni jah taayh laa jư apok ji dong dik, Kadraq xưh xadrah ji tahmơt tyauq trôôk hyioh jăk.12Mot Kadraq đaji gooy ôôlh, 'ngưng đoat tađnah tol akoq Kadraq, e muuyq yal jah valơk đơu be kơyq xet đêh vlôh vơ Kadraq.13Kadraq hlưp muuyq aau kahliik 'nharuuk đom vahaap, ji yal Kadraq jah taayh laa Apok ku Kơy Plêêk.14Kaluh bing kuun tol plêêk hooy tyauq Kadraq tol ôô ahleh ko, hlưp vaayh lanh miim ko ji xarêh xaraat.15Muuyq poop xieh thier mưr vlôh xing huuy Kadraq, xôq dii ni Kadraq hmơt kaluh daak dêh, yôôch Kadraq hnoq xakaq oot bơơn gay katôôlh maam, ji Kadraq joaq thung raniaq lok tađnưk đơơt tôq dayh rahưk rahưk ku Kơy Plêêk, Kơy Taay Yaak.16Kadraq e muuyq yal jah valơk tol aau kahliik ji tol kataalh Kadraq: “Vuua ku khơl vuua ji Lôôk ku khơl lôôk.”17Yôôch gô hloq muuyq kơy yaak dưk đom mot hngơy, ji kơy nưq taayh tok dii muuyq apok kôt, đnooy kung dêq hloay kaluh paroh xêêp đong tapol tol plêêk, đaneq: “Dayh truh đnen, dayh anguk hlê ka waal xa kôt ku Kơy Plêêk,18xôq xa hlek khơl vuua, hlek khơl padrok kôt, hlek khơl adro kôk kalh, hlek kaluh ôô ahleh ji kuun acho tol ni, kung dii hlek ku tôôy manih, hloay rayơh rayơơy ji xapok, hloay khơl de ji khơl kôt.”19Atêq nưq, gô hloq ôô ji khơl vuua tol vari kung bing kuun ku oot jah anguk tagumq hlê xôq tagay tahmơt dii Kơy acho tol ôô ahleh ji dii bing kuun ku Kadraq.20Yôôch ôô biq rôp, kung dii ni laa hlit pa ôôh, adro dưk dơơp kangưưr ni kaluh dơuq akêh, gamưh đnư đơu ni pa ôôh aluut khơl adro heq nhonq dơuq ku ôô ji khơl adro kuh ayuôôt vangưl ni. Dêq baarq tuôôy đong riirh biq taweek muut hlôôk ôôlh jah vuh jaq dii lưưu hwinh.21Sôôq măn hlê đom bing oot yôôych biq păk kaxêêt bơyh xieh ku Kơy acho tol ôô ahleh, 'ngưq laa xieh vlôh xing huuy Kadraq, ji dêq hloay kaluh xêêp jah phiq phơh xing hlek bing oot.
FAR EAST BROADCASTING COMPANY