Revelation11
1Atêq nưq, muuyq gay kadeer dang đaji gay wolh heq jah ăm ka gô, tuôôy e apok xanoh: “Dayh dưk tok ji wolh hnhư hơu ku Kơy Plêêk ji para hơu, dii khơl dro ayuôôt laat đom nưq.2Măn truh chaal, laa phon pi gôk hnhư hơu, dayh xôq hlê, te wolh ni, vii ni heq biq pahnăp ka khơl tamooy daak kadrơy, ji oot hnoq joaq jalon theng vah đom poot kưl vaarq xiêk.3Yôôch Gô hnoq ăm xôq vaarq dro xanưk ku Gô, ji oot hnoq đnooy hlit đom muuyq ravơu vaarq hreek drơu kưl hngơy, tuôôy măn hlưp aau vaayh taat.”4Vaarq dro xanưk neq laa vaarq ưk ô liu ji vaarq jôôk đen dưk kangưưr Lôôk ku vari.5Atoh kơyq xung dơơp haiq baarq, yôôych ôôlh vlôh xing huuy baarq yôôch vuh kaxêêt khơl tachơơl baarq, lunưq atoh adro leq xung dơơp haiq baarq, yôôych adro nưq pheq biq păk kaxêêt đanưq.6Baarq e qwuyen kađnoch plêêk hlê xôq leh e jit rôh pôôt đom kaluh hngơy tyauq apok hlit ku baarq, ji baarq e qwuyen tol kaluh alook daak xôq dơơp daak jêêk vlôh vahaap ji xôq dơơp haiq vari bơơn đu thưq pơơl dal, muut paq kê tuôôy leq baarq trôôch.7Tuôôy baarq heq payôôch apok xanưk ku baarq, yôôych poop ôô hooy tok xing huuk leh e kalek hnoq tagay tahmơt tachơơl kung baarq, ji ni hnoq jay iaq baarq yôôch păk kaxêêt baarq hloay.8Xaak ku baarq hnoq padoh tol trôôk kôt ku theng kôt (laa theng jah taayh đom long lơuq laa Sô-đôm ji Ai Kâp), kung laa aduq đơu Lôôk ku baarq heq biq đongq đing tol gay charăk.9Đom pe hngơy rưưyh, manih xing loch kaluh tamooy, kaluh palơy tamooy, kaluh apok athêêk ji kaluh daak dêh raay 'yo xaak ku baarq ji oot leh ăm pheep kaluh xaak ku baarq jah up đom xanưng.10Manih araak tol vari hlah hlaak truh baarq ji xa mưng, oot hnoq atăq kadrool ka mamuuyq vii vaarq kơy hlit nưq heq dơơp ka manih araak tol vari pơơl hwơơl.11Yôôch atêq pe hngơy rưưyh, hoot heet varơuq riirh xing Kơy Plêêk nhôp muut đom baarq, ji baarq dưk tok tol jôôk baarq, nưq laa varơuq varaal yôq thier kôt apôôt tol khơl adro 'yo hloq baarq.12Yôôch baarq tek muuyq apok kôt xing plêêk, xanoh dii baarq: “Dayh tok đnen!” Nưq laa baarq hooy tok plêêk đom muuyq đum kluk, ji khơl adro tachơơl ku baarq raay 'yo hloq baarq.13Muut wat nưq, muuyq đơơt ahrưng vari kôt xalih vlôh, ji muuyq phon kưl ku theng hrưp pôôt. Đom đơơt ahrưng vari, yal ku pơh ravơu manih biq kaxêêt, ji khơl adro măn riirh hlê jêêk vlôh varaal yôq đơu tơơk tưp tađnah tađnaak atok ka Kơy Plêêk tol plêêk.14Varơuq pơơl dal thưq vaarq heq yôôch. 'Yo hơq, varơuq pơơl dal thưq pe đong truh kach thier talăng.15Kơy yaak plêêk thưq pơh klôôp keeng, yôôych kaluh apok đnooy kôt ahna vlôh xing tol plêêk, đaneq: “Daak dêh ku dêh araak heq jêêk vlôh daak dêh ku Lôôk haay ji Kơy Chiuq Para Jơu ku Kadraq. Kadraq hnoq dưk xakaq dong truh đơơy đơơy, miet miet.”16Yôôch vaarq kưl poot khơl draq đong 'ngôôy tol ngaai ku oot kangưưr Kơy Plêêk, heq kul mot oot pôôt ji ayuôôt laat Kơy Plêêk,17tơơl: “Kuh Lôôk laa Kơy Plêêk, Kơy Taay Yaak, Kơy juneq e ji heq e, 'wot kuh kway Kadraq vii Kadraq heq adrơk jư taay yaak kôt galơh ku Kadraq ji dưk xakaq. 18Kaluh daak tôq jaraq,đơu đơơt tôq jaraq ku Kadraq heq truh,ji katuôôy ka khơl adro kaxêêt biq xưh xadrah,kung kahniq kadrool ka khơl xapok Kadraq,'ngưq laa khơl hlit ji khơl vah,kung khơl dro kul yôq yal Kadraq,khơl de hloay khơl kôt,ji păk kaxêêt dêq khơl adro đong păk kaxêêt dêq vari.”19Yôôch hnhư hơu ku Kơy Plêêk măn tol plêêk jah luh vlôh ji vook tavek ku Lôôk jah 'yo hloq đom hnhư hơu Kadraq. Atêq nưq, e kaluh ka'mek xađnek, kaluh hnưm garung garung, ji hnưm kơy kata ahna, muuyq đơơt ahrưng vari kung đơơt jit parier kôt.
FAR EAST BROADCASTING COMPANY