Philippians2

1Vii anưq, atoh đom Lôôk Wơơt Dêh e varơuq ahmưk nhăk leq, atoh e varơuq hlơq hlôôp leq xing xuum xung xiaq, atoh e varơuq ahlook aklah leq đom Kơy Phool Hiel, atoh e xuum xiaq trôôch ji varơuq angơuq leq,2yôôych dayh dơơp xaleep varơuq hlah hlaak ku gô, nưq laa oh ay e kung xuum biit, tuôôy e kung xuum xung xiaq, kung muuyq xuum, biit truh kung muuyq trôôk.3Leh dơơp varơuq kajoq jo xuum kamuk long vii hư hlơơp, wih hlê, dii xuum apôôt xăk, 'yo khơl kadrơy kul vado iaq xăk,4tôôy adro leh vơ tabông truh qwuyen lơơy ku đêh ni, bơh măn qwuyen lơơy ku khơl kadrơy đnoyq.5Dayh e xuum biit đanưq đom oh ay, kung laa xuum biit đom Lôôk Wơơt Dêh Jê-xu,6laa Kơy măn 'miêh đom long lơuq Kơy Plêêk, heq leh 'yo varơuq duh pheq jư xok laa varơuq xađong dii Kơy Plêêk.7Tađôôy muut đnư, Kadraq heq dơơp kadih ka Kadraq vlôh hong heng tuôôy hlưp xok xăk xamơk manih xapok, jah pa iir vlôh đom long lơuq dang đaji koot manih, ji jah 'yo hloq đom kaphook đaji muuyq koot manih,8Kadraq heq kadih haaq xăk pôôt tuôôy chiuq tameng tyauq ka truh kaxêêt, pheq đnooy kaxêêt tol gay charăk.9Vii nưq, Kơy Plêêk kung heq vanê Kadraq tok thier yơơt ji heq kahniq ka Kadraq yal tol tôôy yal,10xôq ka tameng truh yal Lôôk Jê-xu, tôôy takuul tol plêêk, 'laarq vari, pi 'laarq vari, pheq kul pôôt,11ji tôôy kapiet raay xưng nhonq đaneq Lôôk Wơơt Dêh Jê-xu laa Lôôk, đơu tađnah tađnaak thuôk Kơy Plêêk, laa Vaq.
12Vii anưq, khơl adro xung xiaq ku gô lơơy, tyauq đaji kach oh ay heq hloay tameng apok, tuôôy leh vơ măn đom varơuq e mot ku gô, đơu juneq kang 'ngưng iaq đom varơuq wăngq mot ku gô, oh ay dayh kưq dơơp tyauq vanong wơơt xok ku oh ay dii varơuq kuh yôq ji padrau.13Vii Kơy Plêêk laa Kơy đong dưk dơơp đom oh ay xôq vơơ trôôch vơơ dơơp tyauq iq kaxay ku Kadraq.14Dayh dơơp tôôy varơuq đơu leh ramooy long takaay tayaat,15xôq oh ay jah jêêk vlôh khơl adro koot leh e aduq đnooy trek ji paxa rêh ku Kơy Plêêk, be e hlêêl tachoot măn katul đom muuyq adrơơk xơk tauq ji xa agưt, đơu aduq nưq oh ay ahnhe tađnah đaji kaluh gooy đeen đom dêh araak,16tuôôy jư kajưk apok varơuq riirh, vii varơuq pa ưưt ku gô đom hngơy ku Lôôk Wơơt Dêh nưq laa gô heq leh charơơk đom hlo hloh, kung leh dơơp galeh galal kach hlo hloh.17Bơh pheq đnooy long gô biq uk vahaap vlôh xôq para tol kuah lêh ji lêh vâk ku xuum tuôq oh ay, yôôch gô măn mưng me, ji hlah hlaak dii dêq hloay oh ay.18Oh ay kung đanưq, dayh mưng me ji hlah hlaak dii gô.
19Đom Lôôk, laa Lôôk Jê-xu, gô takôô gamưh meel xôq atăq Ti-mô-thê truh hlơq oh ay, xôq gô kung biit hloq ahmưk nhăk tuôôy xet hêêl truh oh ay.20Vii gô leh e kơyq dêq kung muuyq xuum dang đaji nhu nưq, laa adro dik xuum lo biit kaluh lơơy ich đôôyq dii oh ay,21vii khơl kadrơy raay axek akhiim kaluh lơơy ich đêh, be aalq kaluh varơuq thuôk truh Lôôk Wơơt Dêh Jê-xu.22Bơh oh ay xet xuum klaak ku nhu nưq, vii dang đaji koot dii vaq, nhu nưq heq hơu varơuq ka Hêêl Kaxay kung dii gô.23Vii anưq gô takôô gamưh patăk dăt nhu nưq hloay tuôôy gô xet jah varơuq ku gô hnoq đaleq.24Bơh gô tuôq kajưk aduq Lôôk đaneq jơq gô kung hnoq meel truh hlơq oh ay.25Panưh kadrơy, gô biit duh pheq atăq Ep-ba-phô-đich xuq hlê ka oh ay, nhu nưq laa dro oh ay ji 'wơyq kung dơơp varơuq kung laa 'wơyq kung hmơt jăk ku gô, laa adro jah patăk xing oh ay ji laa adro hơu varơuq ka varơuq duh ku gô,26vii nhonq vlôh đaneq nhu dêq paraat takôô trôôch jah măn dii dêq hloay oh ay, ji biit hloq hlu rơu vii oh ay heq tameng đaneq nhu nưq biq jiq.27Vii jơq laa nhu nưq heq biq jiq jeq kaxêêt, bơh Kơy Plêêk heq biit angơuq nhu nưq, đơu leh vơ nhu nưq heq 'leq, bơh măn gô đnoyq, xôq gô klơlh chiuq hlu rơu kang athêêp hlu rơu.28Lunưq, gô pơl wol patăk nhu nưq hooy, xôq tuôôy tavơh hlê nhu nưq, oh ay hnoq ik hlah hlaak, ji gô kung jah đơ hlu rơu.29Vii nưq, dayh tiip đoonq nhu nưq đom Lôôk bơơn dêq hloay varơuq hlah hlaak, ji kung dayh e xuum vado khơl adro đanưq,30bơyh vii dơơp varơuq ku Lôôk Wơơt Dêh đơu nhu nưq pheq đnooy jeq kaxêêt, tuôôy hôôk ka'lăk xăk riirh nhu xôq hnoq ik dơơp xaleep phon măn thiuq đom varơuq dơơp ku oh ay deng ka gô.

FAR EAST BROADCASTING COMPANY

https://app.library.bible/content/37a1dc7a54269bd3