Mark3
1Kadraq laay hooy muut hnhư tagumq, ji muuyq adro e pla ti biq kavăp đong măn aduq nưq.2Khơl kadrơy tyauq tavooy 'yo anhinq 'yo Kadraq , jơq be Kadraq hnoq payơh dro nưq đom hngơy Sa-bat, xôq ka oot hnoq ik rôp kadrôôp Kadraq.3Kadraq dăt adro e pla ti biq kavăp: “Dayh dưk muut katul.”4Ji Kadraq vôôch oot: “Hngơy Sa-bat ik pheep dơơp kaxay long dơơp xơk; wơơt manih long păk kaxêêt manih?” Bơh oot hnhep hloay.5Atêq tuôôy galiah mot 'yo oot dii xuum jaraq, jiq hlu vii varơuq găk xuum ku oot, Kadraq đnooy dii dro khơl kanau: “Dayh hnhong pla ti ku ay vlôh.” Ay hnhong vlôh ji pla ti ay jah yơh hlê.6Ji tuôôy heq vlôh pi gôk, khơl manih Pha-ri-si kung khơl adro thuôk ja Hê-rôt hloay juneq athêêk tajauq xôq vih tachơơl hlê Kadraq, dơơp đaleq xôq bing oot hnoq ik păk kaxêêt Kadraq.7Lôôk Jê-xu kung khơl xatyauq Kadraq wiit xuq pi tahli, ji muuyq bing tamooy thier karôp heq hooy tyauq xing Ga-li-lê, xing Ju-đê,8xing Jê-ru-sa-lem, ji xing I-đu-mê kung dii dêh pi panưh hơq tavook Jô-đanh, kung đaji rawiit gah theng Ti-rơ ji Si-đôn. Vii tameng xet taleq varơuq Kadraq dưk dơơp, muuyq bing karôp thier 'ngưng heq garuk truh dii Kadraq.9Kadraq dăt khơl xatyauq kadraq dơơp aleq ka muuyq poop ge de ralauq xôq 'miêh ka Kadraq vii kơq manih karôp, xôq oot leh huq ahnen ahnek Kadraq.10Bơyh Kadraq heq payơh 'ngưng dro, pheq đnooy long kơyq e bingq tâk pheq ahnen ahnek truh jeq Kadraq xôq hnoq ik vêq muut Kadraq.11Paq kê tuôôy leq kaluh garu xi hloq Kadraq, kaluh nưq raay kuu xăk pôôt kangưưr Kadraq, ji oot ook tarok, đnooy đaneq: “Kadraq laa Koot Kơy Plêêk.”12Kadraq kajưk apok toah kaluh nưq xôq kaluh nưq leh tauq vlôh truh Kadraq.13Kadraq hooy tok tol đoot ji taayh khơl adro đơu kadih Kadraq trôôch, ji oot truh kung Kadraq.14Kadraq pato đinq kưl vaarq adro (khơl adro đơu Kadraq kung taayh laa khơl jah rơơlh), xôq oot măn dii Kadraq ji xôq Kadraq hnoq ik patăk dăt oot hooy padoh pato,15kung đaji kahniq ăm taayh yaak druyh kamuuych.16Kadraq pato đinq kưl vaarq dro: dii Si-môn, Kadraq taayh athêêp anơng laa Phi-e-rơ;17Ja-kơ, koot kanau Xê-bê-đê, ji Jăng, oh ku Ja-kơ, laa khơl adro Kadraq kung taayh athêêp anơng laa Bô-a-net, iq laa khơl koot kanau ku kơy kata;18kung dii Anh-rê, Phi-lip, Ba-thê-lê-mi, Ma-thi-ơ, Thô-ma, Ja-kơ koot kanau A-phê, Tha-đê, Si-môn Xê-lôt,19ji Ju-đa Ich-ka-ri-ôt, kung laa adro xalih xuum Kadraq.20Kadraq muut đom muuyq poop hnhư, ji bing karôp laay garuk mamuuyq truh, pheq đnooy Kadraq kung khơl jah rơơlh pheq dơơp leh hnoq xa tôôp ik.21Tuôôy khơl adro gah gih Kadraq tameng anưq, oot truh xôq rôp jư Kadraq, vii oot đnooy đaneq: “Ay nưq ta'ngơk yôôch.”22Khơl thơy pato ganuun, laa khơl adro hooy pôôt xing Jê-ru-sa-lem, đnooy đaneq: “Ni biq Bê-ên-xê-bun nhôp,” ji đaneq: “Gamưh lôôk kamuuych đơu ni druyh kamuuych.”23Bơh tuôôy heq taayh oot truh kung kadraq, Kadraq đnooy dii oot bơơn apok atoh: “Dơơp đaleq Sa-tan hnoq ik druyh Sa-tan?24Atoh muuyq daak dêh biq aklah vlôh kadih tachơơl hlê kadih ni, yôôych daak dêh nưq leh ik dưk kajưk ik.25Atoh muuyq hnhư biq aklah vlôh kadih tachơơl hlê kadih ni, yôôych hnhư nưq hnoq leh ik kajưk xiik ik.26Ji atoh Sa-tan dưk tok tachơơl hlê kadih ni đơu biq ahlook goch, yôôych ni leh ik dưk kajưk, bơh heq truh tuôôy kaxêêt hlơơp.27Đêh dii varơuq kadih tachơơl hlê kadih ni, tuôôy heq muut đom hnhư ku muuyq dro kalh paraat, leh kơyq hnoq ik varoh xok garuh anôôp ku ay nưq đêh vlôh heq vek jah dro kalh paraat nưq adroyq, yôôch atêq nưq đơơu varoh xok hnhư ni.28Dong dik, Gô đnooy êêp kơy, đaneq tôôy kadrôôp maroh ku koot xau koot manih hnoq jah ka'lăk, pheq đnooy paq kê apok katơơk galơh leq oot đnooy vlôh,29lunư long kơyq đnooy lôp tachơơl hlê Kơy Phool Hiel, leh e varơuq jah ka'lăk truh đơơy đơơy, bơh adro nưq biq lôp kadrôôp miet miet.” —30Kadraq đnooy anưq vii oot đnooy: “Adro nưq biq garu xi nhôp.”31Miq Kadraq kung khơl oh ku Kadraq truh, ji tuôôy đong dưk pi gôk, oot gamưh adro đnooy ka kadraq, taayh Kadraq vlôh.32Muuyq bing karôp đong 'ngôôy rawiit Kadraq, ji khơl kadrơy đnooy dii Kadraq: “'Yo hơq, miq thơy kung khơl oh ay thơy măn pi gôk, đong axek thơy.”33Tơơl hlê oot, Kadraq đnooy: “Kơyq laa miq gô ji khơl oh ay gô?”34Yôôch atêq tuôôy ralơq mot 'yo khơl adro đong 'ngôôy rawiit gah Kadraq, Kadraq đnooy: “Dayh 'yo nee, miq gô ji khơl oh ay gô!35Vii long kơyq dơơp tyauq iq trôôch Kơy Plêêk, nưq laa ay oh, oh ay, ji miq gô.”
FAR EAST BROADCASTING COMPANY