Luke16
1Kadraq kung đnooy dii khơl xatyauq: “E muuyq adro karoh hơq laa manih e muuyq adro xakaq 'yo ji adro nưq biq tauq avlôh dii kôôch vii tayuh dêq garuh anôôp ku kôôch.2Atêq tuôôy taayh adro nưq truh, kôôch đnooy dii adro nưq: ‘Varơuq gô tameng truh ay laa aleq? Dayh đnooy vlôh apok padoh truh varơuq xakaq 'yo ku ay, vii ay leh hnoq dơơp xakaq 'yo đnoyq.’3Nưq yôôch adro xakaq 'yo kadih đnooy dii kadih xăk: ‘Gô pheq dơơp kajoq neq, vii kôôch gô đong xok hlê varơuq xakaq 'yo klơlh gô? Vok vari yôôych gô leh đu paraat, xa xiin yôôych kamưưl dik.4Gô xet gô pheq dơơp kajoq xôq tuôôy biq đuôôy klơlh varơuq xakaq 'yo neq, khơl drơy hnoq jarooy gô muut hnhư ku oot.’5Yôôch atêq tuôôy ăm taayh tong adro muuyq đom khơl thiuq lôôkq ku kơy kôôch ni truh, ni đnooy dii adro thưq nhưk: ‘Ay thiuq kôôch gô taleq?’6Adro nưq tơơl: ‘Muuyq hreek thung jơu ô-liu.’ Nưq laa ni đnooy dii adro nưq: ‘Adrơk xok jơyq lôôkq ku ay, 'ngôôy pôôt, dayh valơk dăp kưl!’7Atêq nưq, ni dăt muuyq adro kadrơy: ‘Măn ay thiuq lôôkq taleq?’ Adro nưq tơơl: ‘Muuyq hreek drong va qwaay.’ Ni dăt adro nưq: ‘Adrơk jơyq lôôkq ku ay, ji valơk thơơm kưl.’8Adro kôôch kheng adro xakaq 'yo lưp hyioh jăk nưq bơyh kơq ni heq dơơp varơuq thier khôôt kheoq. Vii koot xau ku đơơy neq khôôt kheoq iaq taso dii koot xau ku varơuq tađnah đom adrơơk ku ni.9Măn thơy đnooy dii oh ay, dayh dơơp 'wơyq ka xăk bơơn jêêt kua lưp hyioh jăk, xôq tuôôy kua nưq dêq yôôch, oot hnoq ik jarooy oh ay muut aduq măn đơơy đơơy.10Adro leq muuyq xuum đom varơuq thier de yôôych kung muuyq xuum đom varơuq kôt ji kơyq lưp hyioh jăk đom varơuq thier de yôôych kung lưp hyioh jăk đom varơuq kôt.11Vii anưq, atoh oh ay leh jêêk vlôh đangq tuôq gamưh đom garuh anôôp lưp hyioh jăk, kơyq hnoq pahnăp atăq ka oh ay garuh anôôp dik?12Ji atoh oh ay leh jêêk vlôh đangq tuôq gamưh đom kaluh varơuq thuôk truh khơl drơy, kơyq hnoq palo ka oh ay kaluh kajoq thuôk truh kadih oh ay?13Leh muuyq xapok leq hnoq ik hơu varơuq vaarq kôôch, vii xapok nưq hnoq 'yarơ adro neq đơu xung xiaq adro hơq, long ni hnoq vado dii adro neq đơu 'yo galiah adro hơq. Oh ay leh hnoq hơu varơuq Kơy Plêêk hloay jêêt baak tuôông xa ik.”14Tuôôy nưq, khơl manih Pha-ri-si, laa khơl adro xung jêêt baak, tameng dêq kaluh apok nưq, ji oot xagiel aklêêu Kadraq.15Kadraq đnooy dii oot: “Khơl kơy laa adro xưng kadih xăk hyioh jăk kangưưr khơl drơy, bơh Kơy Plêêk xet xuum khơl kơy. Vii varơuq yơơt dik đom katul koot manih laay laa varơuq ramêq kangưưr Kơy Plêêk.16Ganuun ji kaluh apok kơy hlit laa dong truh đơơy ku Jăng. Xing nưq kơn hơ, daak dêh Kơy Plêêk jah padoh taboon, ji tôôy adro jôôn paraat tawaak muut đnư.17Bơh dik laa klêq iaq ka plêêk ji vari jêêk vlôh rook hlơơp, măn iaq laa muuyq chư valơk đom ganuun jêêk vlôh lưp yuôôr.18Dêq hloay adro leq ka'lăk kadrê ni ji pajêêk adro kadrơy yôôych lôp kadrôôp tuut taat, adro pajêêk khơl kadrê heq biq ka'lăk dii kanau yôôych kung lôp kadrôôp tuut taat.19E muuyq adro karoh hơq, kơy nưq hlưp aau tiaq ji varaay goh gool, tôôy hngơy, xa hôôch ahrơh agưt kach karoh e.20Măn muuyq adro adrah nưq anơng La-xa-rơ, xăk viik ple katôôch, jah xagook xôq măn 'mok hnhư manih karoh,21ji xuum trôôch jah xa aduq kaluh thưq rôh pôôt xing tol para manih karoh. Lunư, vơ e kaluh xo truh lieeh ple ku ay.22Yôôch varơuq xalih vlôh nưq laa adro adrah kaxêêt, ji ay jah kơy yaak xagook truh xuum Ap-ra-ham. Atêq nưq, adro karoh kung kaxêêt ji kơy nưq jah xagook up.23Măn aduq manih kaxêêt, đong tuôôy măn đom jiq jiêh, tuôôy 'ngơơk mot ni tok, kơy nưq hloq Ap-ra-ham xing kơn xangưưy, kung dii La-xa-rơ đom xuum ku kơy.24Tok apok taayh tarok, kơy nưq đnooy: ‘Mo kơy Ap-ra-ham lơơy, xiin biit angơuq koot ji xiin dayh patăk La-xa-rơ xôq ay nưq 'nharuuk gooy lôk ti ay muut daak ji dơơp dong langưưp kapiet koot, vii koot thier jiq jiêh đom ôôlh neq.’25Bơh Ap-ra-ham tơơl: ‘Koot lơơy, dayh văch đaneq đom kawah đơơy ku koot, koot heq nhonq phon tolh ku koot, ji dang anưq, La-xa-rơ yôôych nhonq phon pơơl. Bơh juneq ay nưq jah hlơq hlôôp aduq đnen, măn koot dong chiuq jiq jiêh.26Kung dii dêq hloay kaluh varơuq nưq, măn katul haay ji koot heq jah xôq muuyq bơk jaruq thier kôt, aleq ăm manih leq xung tapa xing đnen truh aduq koot laa leh ik, kung leh hnoq tapa xing nưq hlê truh aduq haay ik.’27Nưq laa adro karoh đnooy: ‘Mo kơy lơơy, nưq yôôych koot kuh apôôy kơy đaneq kơy hnoq ik patăk ay nưq truh hnhư vaq ku koot —28vii koot e dăp oh ay — xôq ay nưq đnooy dăt oot, aleq ăm oot kung hnoq ik leh aalq hooy truh aduq jiq jiêh neq.’29Bơh Ap-ra-ham tơơl: ‘Oot e Môi-se ji khơl kơy hlit; oot pheq tameng tyauq khơl kơy nưq!’30Lunư, adro karoh tơơl: ‘Lưp 'leq, mo kơy Ap-ra-ham lơơy, wih hlê, atoh kơyq nưq xing aduq kaxêêt truh dii oot, yôôych oot hnoq wiit xuum.’31Bơh Ap-ra-ham đnooy dii kơy nưq: ‘Atoh oot leh tameng Môi-se ji khơl kơy hlit, yôôych atoh ăm kơyq nưq xing aduq kaxêêt riirh hlê, oot kung hnoq leh tuôq.’”
FAR EAST BROADCASTING COMPANY