John19
1Anưq, hloay tuôôy nưq, Phi-lat ăm rôp Lôôk Jê-xu ji tiel dook Kadraq.2Bing kuun taat muuyq đoat vuua bơơn jaliê. Oot ayil tol akoq Kadraq, ji hlưp muut ka Kadraq muuyq poop aau yơơt maau dôôp.3Oot truh kangưưr Kadraq ji đnooy: “Kuh kul Vuua manih Jo Thaiq!” yôôch ăm Kadraq toleq pađa.4Muuyq yưk tra, Phi-lat hooy vlôh ji đnooy dii oot: “'Yo ne, gô jarooy manih neq vlôh ka êêp kơy xôq êêp kơy xet đaneq gô leh axek hloq kadrôôp maroh leq aduq ay nưq.”5Yôôch Lôôk Jê-xu hooy vlôh, yil đoat jaliê ji hlưp aau dôôp, Phi-lat đnooy dii oot: “Dayh 'yo manih neq yơu!”6Anưq laa, muut tuôôy khơl thơy tơơk tưp kôt ji bing kuun jư 'yo hloq Kadraq, oot pariau kôt đaneq: “Đongq đing ni tol gay charăk! Đongq đing ni tol gay charăk!” Phi-lat dăt oot: “Êêp kơy dayh kadih rôp ay nưq ji đongq đing, ji gô be axek hloq kadrôôp maroh leq aduq ay nưq.”7Manih Jo Thaiq tơơl kung kơy: “'Wot e ganuun ji 'yo tyauq ganuun nưq, yôôych ni pheq kaxêêt vii ni kadih 'yo ni laa Koot Kơy Plêêk.”8Kơq nưq, tuôôy Phi-lat tameng apok nưq, kơy nưq kang athêêp yôq varaal,9kơy laay hooy muut đom hnhư padrok ji đnooy dii Lôôk Jê-xu: “Ay truh xing aduq leq?” Bơh Lôôk Jê-xu leh ăm kơy nưq xet apok tơơl.10Vii anưq, Phi-lat đnooy dii Kadraq: “Ay leh tơơl apok gô ih? Ay leh xet đaneq gô e qwuyen luh vlôh ay, ji kung e qwuyen đongq đing ay tol gay charăk ih?”11Lôôk Jê-xu tơơl hlê kơy nưq: “Kơy be e qwuyen kajoq đôôyq dii gô, atoh qwuyen nưq heq leh jah kahniq ka kơy xing plêêk. Vii kơq nưq, adro rôp atăq gô ka kơy e kadrôôp parêq iaq.”12Vii apok nưq, Phi-lat axek trôôk luh vlôh Kadraq, bơh manih Jo Thaiq pariau kôt, đaneq: “Atoh padrok luh ni yôôych padrok leh aalq laa 'wơyq ku Sê-sa. Kơyq kadih vanê ni dơơp vuua laa tachơơl hlê dii Sê-sa.”13Kơq nưq, atêq tuôôy tameng toleq apok nưq, Phi-lat ăm jarooy Lôôk Jê-xu vlôh pi gôk yôôch kơy 'ngôôy muut ragê xưh xadrah ka aduq jah taayh laa “Hnhư Kanôôp Phơu”; măn đom apok Hi-baq-lai laa “Ga-ba-tha”.14(Tuôôy nưq laa hngơy ralauq xôq ka Lêh Dalơh Hlê. Tuôôy nưq laa kawah wat thưq drơu.) Kơy nưq đnooy dii manih Jo Thaiq: “'Yo yơu, vuua ku êêp kơy!”15Bơh oot pariau kôt: “Kađnok ni tok! Kađnok ni tok! Đongq đing ni tol gay charăk!” Phi-lat vôôch oot: “Gô đongq đing vuua ku êêp kơy ih?” Khơl thơy tơơk tưp kôt tơơl: “Đêh vlôh Sê-sa, 'wot leh e vuua.”16Anưq laa, muut tuôôy nưq, kơy nưq pahnăp Kadraq ka oot xôq chiuq đongq đing tol gay charăk, yôôch oot rôp Lôôk Jê-xu ji jarooy hooy.17Tuôôy pheq kadih hlôôy gay charăk, Kadraq hooy truh aduq jah taayh laa “Aduq Kadah”, aduq nưq đom apok Hi-baq-lai jah taayh laa “Gô-gô-tha.”18Khơl drơy đongq đing Kadraq aduq nưq, kung dii Kadraq laa vaarq dro kadrơy, măn pi neq ji pi hơq, măn Lôôk Jê-xu măn katul.19Tuôôy nưq, Phi-lat kung ăm valơk muuyq riak chư yôôch đongq tol gay charăk. Riak chư jah valơk: JÊ-XU MANIH NA-XA-RET, VUUA TAMOOY JO THAIQ.20Kơq nưq, 'ngưng manih Jo Thaiq heq đok riak chư nưq vii aduq đơu Lôôk Jê-xu biq đongq đing laa jeq theng phôq. Riak chư jah valơk bơơn apok Hi-baq-lai, apok La-tinh ji apok Hi Lap.21Vii anưq, khơl thơy tơơk tưp kôt manih Jo Thaiq đnooy dii Phi-lat: “Apôôy te valơk laa ‘Vuua tamooy Jo Thaiq,’ đơu valơk laa ‘Adro đnooy đaneq “Gô laa Vuua tamooy Jo Thaiq.”’”22Phi-lat tơơl: “Apok gô heq valơk yôôych gô heq valơk yôôch.”23Atêq nưq, muut tuôôy bing kuun đongq đing Lôôk Jê-xu muut gay charăk, oot xok qwuân aau ku Kadraq yôôch ahlook dơơp poot phon — tôôy dro kuun muuyq phon — ji aau yơơt, Aau nưq yôôych leh e trôôk axit, laa muuyq tômq vaayh tabich xing taalh pôôt 'laarq.24Vii anưq, oot đnooy dii mamuuyq: “Te chieh aau vlôh, bơh dayh palăk truh ni, 'yo ni hnoq laa ku kơyq.” Nưq laa xôq apok Rahlăp Vah jah jêêk đaneq:“Oot ahlook mamuuyq qwuân aau gô,palăk xok aau gô.”Anưq laa, bing kuun heq dơơp đanưq.25Tuôôy nưq, khơl manih đong dưk gah gay charăk ku Lôôk Jê-xu laa miq ku Kadraq ji oh ay ku miq Kadraq, nưq laa Ma-ri kadrê ku Kơ-lê-ô-ba, kung Ma-ri Ma-đơ-len.26Anưq laa, tuôôy Lôôk Jê-xu 'yo hloq miq kadraq ji khơl xatyauq đơu kadraq xiaq dưk gah nưq, yôôych Kadraq đnooy dii miq: “Nee mo lơơy, 'yo hơq, koot kanau ku mo!”27Yôôch Kadraq đnooy dii khơl xatyauq: “'Yo hơq, miq ku ay!” Xing tuôôy nưq, khơl xatyauq nưq jarooy mo xuq hnhư ni.28Atêq nưq, vii Lôôk Jê-xu xet đaneq tôôy varơuq heq jah payôôch yôôch, lunưq xôq apok Rahlăp Vah, jah jêêk, yôôych Kadraq đnooy: “Gô thaal.”29Muuyq poop wo tađnưk viik daak jôômq jah xôq ka đnư, vii anưq, bơơn kach vagiep muut gay baai hương muuyq buuy 'nhuuy tahli viik daak jôômq, oot palo tok ka huuy Kadraq.30Anưq, tuôôy Lôôk Jê-xu nhemq daak jôômq nưq, yôôych Kadraq đnooy: “Tôôy varơuq heq jah xaleep!” Yôôch xagul akoq pôôt, Kadraq truut phool hiel kadraq.31Atêq nưq, vii hngơy nưq laa hngơy ralauq xôq, lunưq xôq kaluh xaak manih leh kưq măn tol gay charăk tuôôt hngơy Sa-bat (vii hngơy Sa-bat nưq laa muuyq hngơy 'yo kôt), manih Jo Thaiq vôôch Phi-lat xôq jah dơơp tagôh atu jôôk ku khơl dro nưq yôôch kaluh xaak hnoq ik tơq hooy.32Vii anưq, bing kuun hooy truh ji tiel tagôh xakook jôôk ku adro droyq dik, yôôch ku adro thưq vaarq, laa khơl adro biq đongq đing kung dii Kadraq.33Bơh tuôôy truh aduq Lôôk Jê-xu, oot hloq Kadraq heq kaxêêt yôôch, lunưq leh tiel tagôh jôôk Kadraq.34Lunư, muuyq dro đom bing kuun viit kapiik khiêk jamiir Kadraq bơơn maak, vơ hloay vahaap ji daak hoot vlôh.35Adro heq hloq varơuq nưq heq dơơp xanưk hlê, ji apok xanưk ku adro neq laa dong dik. Dro nưq xet đaneq ni đnooy varơuq dik, xôq oh ay kung tuôq.36Vii kaluh varơuq nưq heq xalih vlôh xôq dơơp jah jêêk apok Rahlăp Vah: “Be muuyq khiêk leq ku Kadraq hnoq biq tagôh.”37Muuyq aduq kadrơy đom Rahlăp Vah laay đnooy: “Oot hnoq 'yo tok Kơy đơu oot heq viit.”38Atêq kaluh varơuq nưq, Jô-sep manih thuôk A-ri-ma-thê, laa muuyq khơl xatyauq ku Lôôk Jê-xu (bơh kadook vii yôq manih Jo Thaiq), kơy vôôch Phi-lat xôq xagook xaak Lôôk Jê-xu hooy. Phi-lat ăm pheep. Anưq, kơy truh ji xagook xaak Kadraq hooy.39Ni-kô-đem kung truh — Kơy laa adro tuôôy adroyq truh tavơh Lôôk Jê-xu đom ka klôôy — taway tyauq kaluh jor jơu thơơm ji bôôt gay lô hôôyq, đom kơh muuyq hreek kiq La-mah.40Anưq oot xagook xaak Lôôk Jê-xu hooy ji ahnom xaak bơơn vaayh lanh kung dii jarơơu thơơm, nưq laa tyauq ganuun ku manih Jo Thaiq xôq ahnom xaak.41Mot kadrơy, ka aduq đơu Kadraq biq đongq đing e muuyq hluôôt, ji đom hluôôt e muuyq xanưng đơơu, đơu đom nưq koq lưp e kơyq hmưq jah up.42Lunưq, vii kơq hngơy ralauq xôq ku manih Jo Thaiq ji vii xanưng yôôych măn jeq, anưq oot up xôq Lôôk Jê-xu aduq nưq.
FAR EAST BROADCASTING COMPANY