Galatians6
1Wơơy oh ay, atoh muuyq dro biq jah tavơh đom lôp kadrôôp leq, yôôych oh ay laa dro e Kơy Phool Hiel dayh 'meq hlê manih nưq đom xuum klaak be huq, tuôôy kadih 'yo rơơt kadih xăk, leh kheoq oh ay kung biq adô aluut.2Dayh pơq parêq ka mamuuyq, ji đanưq oh ay hnoq dơơp xaleep ganuun ku Lôôk Wơơt Dêh.3Vii atoh kơyq biit ni laa muuyq băk leq nưq, đom tuôôy be laa kajoq dêq, yôôych dro nưq kadih aluut pa ôôh ni.4Bơh tôôy muuyq dro pheq 'yo hlê varơuq dơơp ni, yôôch tuôôy nưq dro nưq hnoq e kơq xôq pa ưưt vlôh truh đêh ni, đơu leh aalq taso dii muuyq dro leq.5Vii tôôy muuyq dro hnoq pơq parêq ku kadih ni.6Mot kadrơy, manih jah pato đaauq pheq ahlook đom tôôy vâk tolh dii dro pato dayq ni.7Te xôq biq adô aluut. Kơy Plêêk leh chiuq agưt chok 'leq, vii atoh kơyq paraay kajoq yôôych hnoq goch đanưq.8Adro paraay ka xăk xamơk ni hnoq xing xăk xamơk goch xok varơuq kaxêêt hlơơp. Măn dro paraay ka Kơy Phool Hiel hnoq xing Kơy Phool Hiel goch xok varơuq riirh đơơy đơơy.9Haay te liq galeh galal tuôôy dơơp varơuq kaxay, vii truh klip kawat, haay hnoq goch xok raak play atoh leh gưlh xuum.10Vii anưq, đom tuôôy haay e kawah, yôôych haay duh dơơp varơuq kaxay ka tôôy dro, đơu duh nhưk laa ka khơl dro đom kôôch hnhư xuum tuôq.11Dayh 'yo kaluh chư kôt xet toleq đơu gô heq valơk ka oh ay bơơn kadih ti gô.12E 'ngưng adro trôôch dơơp rêêk tolh đom xăk xamơk, oot băt oh ay chiuq goch kađuh, vơ xôq oot klơlh pheq biq rôp toop truh gay charăk ku Lôôk Wơơt Dêh Jê-xu.13Vii pheq đnooy jơq khơl adro chiuq goch kađuh nưq kung be tameng jư ganuun, bơh oot trôôch oh ay chiuq goch kađuh xôq oot hnoq ik pa ưưt akhwoak đom xăk xamơk ku oh ay.14Măn đôôyq dii gô, apôôy be e varơuq kajoq jêêk vlôh kơq xôq khwoe khwoak đêh vlôh truh gay charăk ku Lôôk Wơơt Dêh Jê-xu, Lôôk haay, bơyh gay charăk nưq, dêh araak đôôyq dii gô heq biq đongq đing, ji gô đôôyq dii dêh araak kung anưq.15Vii leh aalq varơuq goch kađuh laa varơuq duh kajoq, kung be aalq varơuq leh goch kađuh, bơh duh dik laa muuyq koot manih đơơu.16Ji atoh dêq hloay kơyq hnoq tawaak hooy tyauq trôôk pato neq, yôôych apôôy hrok hrol ji varơuq angơuq măn tol oot, ji tol manih I-sơ-ra-ên ku Kơy Plêêk.17Xing neng kơn atêq, xiin te kơyq dơơp pơơl ka gô, vii gô đong pơq tol xăk gô kaluh hlêêl dơuq ku Lôôk Jê-xu.18Wơơy oh ay, apôôy vanong plêêk ku Lôôk haay, Lôôk Wơơt Dêh Jê-xu măn kung danưng kooy oh ay. Amen.
FAR EAST BROADCASTING COMPANY