Ephesians2
1Măn phon oh ay, laa adro kaxêêt đom kaluh gưlh lôp ji kadrôôp maroh oh ay,2laa đom kaluh varơuq đơu tuôôy droyq, oh ay heq xa măn tyauq trôôk hoot ku dêh araak neq, tyauq adro dưk xanok dii qwuyen da uh aduq kawah, laa garu xi juneq đong dưk dơơp đom êêp koot xau leh tameng tyauq,3đơu adroyq hơq, măn katul oot, dêq hloay haay kung heq riirh đom kaluh xuum hmưch ku xăk xamơk haay, dưk dơơp kaluh hmưch trôôch ku xăk xamơk ji xuum biit. Tyauq xuum klaak đơơy neq, haay 'miêh laa koot xau ku varơuq tôq dayh kung đaji tôôy dro kadrơy.4Bơh Kơy Plêêk, laa Kơy karoh xuum biit angơuq, vii xung xiaq kôt lơyq ku Kadraq đơu Kadraq heq xiaq haay,5lunưq tuôôy haay laa khơl adro kaxêêt đom kaluh gưlh lôp haay, yôôych Kadraq heq khienq haay kung riirh đom Lôôk Wơơt Dêh — nưq laa gamưh vanong plêêk đơu oh ay heq jah Wơơt —6Kadraq khienq haay kung riirh hlê, ji xôq 'ngôôy kung dii Kadraq măn kaluh aduq tol plêêk đom Lôôk Wơơt Dêh Jê-xu,7xôq đom kaluh đơơy xanưm jeq truh, Kadraq hnoq ik kahnoq vlôh varơuq karoh e ranưh ranơơy ku vanong plêêk Kadraq gamưh varơuq hwêêt xuum đôôyq dii haay đom Lôôk Wơơt Dêh Jê-xu.8Vii xing vanong plêêk, oh ay jah wơơt gamưh xuum tuôq, varơuq neq leh e vlôh xing oh ay, đơu laa kadrool ku Kơy Plêêk,9be aalq vlôh xing kaluh varơuq dơơp, xôq leh muuyq dro leq hnoq ik pa ưưt akhwoak.10Vii haay laa varơuq dơơp ku Kadraq, jah panưk pajêêk đom Lôôk Wơơt Dêh Jê-xu ka kaluh varơuq kaxay đơu Kơy Plêêk heq ralauq xôq adroyq xôq haay hnoq ik riirh đom kaluh varơuq nưq.11Kơq nưq, dayh văch đaneq adroyq neq, oh ay laa tamooy daak kadrơy đom xăk xamơk, tamooy biq taayh laa “koq chiuq goch kađuh” vii tamooy jah taayh laa “heq jah goch kađuh” đom xăk xamơk, muuyq varơuq dơơp xing ti koot manih dưk dơơp,12vii tuôôy nưq, oh ay 'miêh biq aklah đêh dii Lôôk Wơơt Dêh, tuôôy biq xôq pi gôk manih karôp I-sơ-ra-ên, ji 'miêh laa tamooy xadaay đôôyq dii kaluh apok tavek ku apok tavek, lunưq be e takôô gamưh, kung leh e Kơy Plêêk đom dêh araak neq.13Bơh, đom Lôôk Wơơt Dêh Jê-xu, oh ay, khơl adro tuôôy adroyq 'miêh xangưưy, juneq heq jah taway truh jeq gamưh vahaap ku Lôôk Wơơt Dêh.14Vii kadih Kadraq laa varơuq tagu hlê ku haay, laa Kơy heq dơơp ka dêq vaarq vlôh jêêk muuyq ji pahyaak ka'lăk apưt ku varơuq aklah ahlook, nưq laa varơuq tachơơl hlê, đom xăk xamơk Kadraq,15tuôôy heq ka'lăk ganuun ku kaluh ganeen đom kaluh qwi đinq, xôq ka Kadraq hnoq ik khienq ka dêq vaarq vlôh jêêk muuyq dro đơơu đom Kadraq, dơơp vlôh tagu hlê,16ji xôq Kadraq hnoq ik dơơp tagu hlê dêq vaarq dii Kơy Plêêk đom muuyq xăk xamơk gamưh gay charăk, atêq tuôôy păk kaxêêt varơuq tachơơl hlê tol nưq.17Tuôôy Kadraq heq truh, Kadraq padoh taboon varơuq tagu hlê ka oh ay, laa khơl adro măn xangưưy, ji varơuq tagu hlê ka khơl adro măn jeq,18vii gamưh Kadraq, dêq vaarq e qwuyen tawaak truh jeq đom muuyq Kơy Phool Hiel xôq truh dii Vaq.19Đanưq, oh ay be măn laa tamooy xadaay long manih daak kadrơy đnoyq. Tađôôy muut đnư, oh ay laa manih kung dêh katu dii khơl vah ji laa muuyq dro đom kôôch hnhư ku Kơy Plêêk,20vii heq jah xơy panưk tol kahnier ku khơl jah rơơlh ji khơl hnhư hlit, tuôôy jơq Lôôk Wơơt Dêh Jê-xu laa phơu muum hnhư,21đơu đom Kadraq, kaah varơuq dơơp xơy panưk, tuôôy jah tabôk dii mamuuyq, yôôych vlôh jêêk muuyq hnhư hơu vah đom Lôôk,22ji kung đom Kadraq, oh ay jah tagumq kung dii mamuuyq jêêk aduq măn ku Kơy Plêêk đom Kơy Phool Hiel.
FAR EAST BROADCASTING COMPANY