Acts6
1Tuôôy nưq, đom kaluh hngơy nưq, tuôôy sôôq khơl jah rơơlh đong athêêp tok, yôôych varơuq ramôôl heq xalih vlôh xing manih Jo Thaiq vơ đnooy apok Hi Lap đôôyq dii manih Hê-bơ-rơ, vii khơl mo valơu ku oot đong biq ka'lăk tăk đom varơuq hơu varơuq tôôy hngơy.2Anưq yôôch, atêq tuôôy kưl vaarq khơl jah rơơlh taayh anguk muuyq bing karôp 'ngưng khơl xatyauq, oot đnooy: “Neq laa varơuq leh hnoq 'yo nhonq ik đôôyq dii 'wot tuôôy ka'lăk apok ku Kơy Plêêk vlôh atêq xôq hơu varơuq para xa.3Bơh, wơơy oh ay, dayh rơơlh xok xing katul oh ay pơh dro khơl kanau jah xanưk tolh, viik galaay Kơy Phool Hiel ji varơuq khôôt xet, laa khơl adro đơu 'wot hnoq ik phon pahnăp ka varơuq duh neq.4Măn 'wot yôôych hnoq lo kajưk đom varơuq xadrook apôôy ji varơuq hơu varơuq apok Lôôk.”5Apok nưq dơơp hlah xuum kangưưr dêq hloay manih karôp. Nưq laa, oot rơơlh Ê-tiên, muuyq dro viik galaay xuum tuôq ji Lôôk Phool Hiel, Phi-lip, Bô-kô-rơ, Ni-ka-nô, Ti-môn, Ba-mê-na ji Ni-kô-la, muuyq dro An-ti-ôt tyauq Jo Thaiq jaauq,6laa khơl dro đơu oot jarooy truh xôq dưk kangưưr khơl jah rơơlh, ji atêq tuôôy xadrook apôôy, khơl jah rơơlh xôq ti tol khơl manih nưq.7Yôôch nưq, apok ku Kơy Plêêk athêêp đnoyq ranưh vlôh, ji sôôq adro khơl jah rơơlh aduq Jê-ru-sa-lem athêêp muut 'ngưng iaq, jauq hloay muuyq bing thier karôp khơl thơy tơơk tưp heq tameng tyauq xuum tuôq.8Tuôôy nưq, Ê-tiên viik vanong ji taay yaak, dơơp varơuq akêh ji pheep akêh kôt đom manih karôp.9Bơh muuyq sôôq manih heq dưk tok, laa khơl adro thuôk hnhư tagumq hơq, aduq jah taayh laa “Khơl Adro Rayơh Rayơơy”, kung khơl manih Si-ren, manih A-lek-xan-tri, dii taleq dro xing Si-li-si, ji A-si, tagêh apok dii Ê-tiên.10Nưq đơu, oot leh e paraat tachơơl hlê nôôy varơuq khôôt xet ji Kơy Phool Hiel đơu Kơy heq padoh vlôh gamưh Kơy nưq.11Atêq nưq, oot root dăt taleq dro xôq đnooy đaneq: “'Wot heq tameng kơy nưq đnooy kaluh apok katơơk galơh tachơơl dii Môi-se ji Kơy Plêêk.”12Oot ahluk dăt dêq manih karôp hloay khơl kadraq lơơk kung khơl thơy pato ganuun, ji atêq tuôôy kathôp truh, oot rôp kơy ji ahoot truh Tayuup Karôp.13Katuôôy, oot ralauq xôq khơl adro dơơp xanưk pa ôôh, taboon luneq: “Manih neq leh padơy đnooy kaluh apok katơơk galơh truh aduq vah ji ganuun.14Vii 'wot heq tameng ni đnooy đaneq Jê-xu manih Na-xa-ret hơq hnoq pahyaak ka'lăk aduq neq ji tađôôy kaluh ganuun dơơp đơu Môi-se heq pato hlê ka haay.”15Tuôôy atrêêk 'yo muut kơy, dêq hloay khơl manih đong 'ngôôy đom Tayuup Karôp hloq mamưưt kơy đaji mamưưt ku yaak plêêk.
FAR EAST BROADCASTING COMPANY