Acts11
1Tuôôy nưq, khơl jah rơơlh ji oh ay măn loch dêh Ju-đê tameng đaneq tamooy kadrơy kung heq tuôq nhonq apok ku Kơy Plêêk.2Nưq yôôch, tuôôy Phi-e-rơ hooy tok truh Jê-ru-sa-lem, khơl dro thuôk bing chiuq goch kađuh tayaat takaay dii kơy,3đnooy đaneq kơy heq hooy muut aduq khơl dro be goch kađuh ji xa achung dii oot.4Bơh tuôôy tok apok, Phi-e-rơ padoh hlê ka oot tyauq tưng varơuq đaneq:5“Gô đong xadrook apôôy aduq theng Jôp-bê, ji đom kaplah phoch langoch gô 'yo hloq varơuq ăm xet adroyq truh muuyq vâk tađnưk nưq đong kahri pôôt, dang tômq khanh kôt tuôôy poot muum jah ahlea pôôt xing plêêk ji ni truh kachô gô,6đơu tuôôy wih mot 'yo muut đnư, gô 'yo anhinq ji hloq kaluh paroh poot jôôk tol vari, kaluh paroh ôô gôk, kaluh paroh ahnoot, kung kaluh paroh xêêp plêêk.7Yôôch gô kung tameng muuyq apok xanoh dii gô: ‘Phi-e-rơ, atêq tuôôy kah, dayh dơơp ôô ji xa yơu!’8Bơh gô tơơl: ‘Kuh Lôôk, leh ik 'leq, vii thưq klơơr 'yêq long leh pa xarêh be dong leq hooy muut đom huuy koot.’9Lunư, xarooy xing plêêk tơơl hlê đom yưk thưq vaarq, đaneq: ‘Kaluh kajoq Kơy Plêêk heq dơơp xarêh, koot leh ik 'yo laa klơơr 'yêq.’10Tuôôy nưq, varơuq neq xalih vlôh truh pe yưk, yôôch tôôy thưq jah duuy wiit hlê tok plêêk.11Ji 'yo hơq, pe dro khơl kanau hloay jơnưq dưk kangưưr hnhư đơu 'wot đong măn 'lăp, vii heq jah patăk hooy xing Sê-sa-rê truh dii gô.12Tuôôy nưq, Kơy Phool Hiel dăt ka gô hooy dii oot, leh kamưưl ier kajoq. Nưq yôôch, drơu oh ay neq kung hooy dii gô, ji 'wot hooy muut đom hnhư ku dro nưq.13Xatyauq nưq, kơy nưq heq taboon hlê ka 'wot đaleq kơy nưq heq hloq yaak plêêk dưk đom hnhư kơy, xanoh đaneq: ‘Dayh patăk manih truh Jôp-bê ji ăm mơơy Si-môn, manih jah taayh laa Phi-e-rơ,14laa manih hnoq đnooy ka ay kaluh apok pato dăt đơu gamưh nưq, ay hnoq jah wơơt — ay ji hloay hnhư ku ay.’15Bơh tuôôy gô xarôp đnooy, Lôôk Phool Hiel heq kahri pôôt tol oot kung dang đaji tol haay muut tuôôy kapa tep.16Yôôch gô văch truh apok xanoh ku Lôôk, đaleq Kadraq hmưq đnooy: ‘Jăng heq dơơp bap-tem bơơn daak; bơh oh ay hnoq jah bap-tem bơơn Lôôk Phool Hiel.’17Lunưq, atoh Kơy Plêêk heq kahniq ăm oot kung muuyq vanong kung đaji ăm haay tuôôy xôq xuum tuôq muut Lôôk, laa Lôôk Wơơt Dêh Jê-xu, yôôych gô laa kơyq đơu hnoq ik đơ klơl Kơy Plêêk?”18Tuôôy nưq, tuôôy heq tameng taleq apok nưq, oot paq takaay tayaat đơu ayuôôt laat Kơy Plêêk, đnooy đaneq: “Nưq yôôych Kơy Plêêk kung heq kahniq ăm khơl tamooy kadrơy xuum wiit xuum xôq jah varơuq riirh.”19Atêq nưq, khơl manih biq pachaay hyaak xing tuôôy rôp toop xalih vlôh atêq ka varơuq Ê-tiên heq pachaay vlôh truh aduq Phê-ni-xi, Chip-rơ ji An-ti-ôt, leh đnooy ka kơyq truh đaauq, vơ đêh vlôh manih Jo Thaiq.20Bơh taleq dro đom sôôq nưq laa taleq dro ưk Chip-rơ ji Si-ren, đơu khơl dro neq tuôôy heq hooy truh An-ti-ôt, oot kung đnooy dii khơl manih Hi Lap, padoh vlôh Hêêl Kaxay truh Lôôk Jê-xu.21Ti ku Lôôk măn kung oot; ji muuyq sôôq thier karôp, vii tuôq, heq wih xuq dii Lôôk.22Tuôôy nưq, hêêl truh khơl manih neq pahêêr truh tôôr tayuup vah măn aduq Jê-ru-sa-lem, lunưq oot patăk Ba-na-ba hooy truh aduq An-ti-ôt,23đơu atêq tuôôy truh aduq ji 'yo hloq vanong plêêk ku Kơy Plêêk, kơy jah hlah hlaak ji ahmưk nhăk dêq hloay kưq măn đom Lôôk dii varơuq dưk kajưk đom xuum klaak.24Vii kơy laa muuyq dro tolh, viik galaay Lôôk Phool Hiel kung xuum tuôq, ji 'ngưng dro jah athêêp muut ka Lôôk.25Atêq nưq, kơy hooy truh Tat-sơ xôq axek Sau-lơ.26Tuôôy heq axek hloq, kơy jarooy sau-lơ truh An-ti-ôt. Nưq yôôch, varơuq xalih vlôh đôôyq dii oot pheq đnooy đom hloay muuyq xanưm nưq laa jah tưưuq hlê dii tayuup vah ji pato dayq 'ngưng dro. Katuôôy, yưk adroyq dik aduq An-ti-ôt, khơl xatyauq jah taayh laa Kơ Đôk Nhân.27Tuôôy nưq, đom kaluh hngơy nưq, taleq kơy hlit xing Jê-ru-sa-lem hooy pôôt truh An-ti-ôt.28Nưq yôôch, atêq tuôôy muuyq dro đom sôôq oot, anơng A-ga-but, dưk tok, xing Kơy Phool Hiel, kơy ăm xet đaneq muuyq naanq pangoot kôt jeq xalih truh tol loch dêh araak. Varơuq neq heq xalih vlôh đom tuôôy Kơ-lôt.29Nưq laa đom khơl xatyauq, tôôy dro đom sôôq nưq, atoh kơyq e paraat măn kơh leq, oot heq đinq deng vlôh phon waak xôq atăq ka oh ay riirh aduq Ju-đê,30đơu oot dik heq dơơp đanưq, tuôôy ăm xagook truh khơl kadraq lơơk gamưh ti ku Ba-na-ba ji Sau-lơ.
FAR EAST BROADCASTING COMPANY