3 John1
1Khơl draq atăq ka Gai-ut xung xiaq, adro đơu gô xung xiaq đom varơuq dik.2Ay xung xiaq, đom tôôy varơuq, gô apôôy chuk ka ay jah karoh e, pheq đnooy e phon xăk kalh paraat dang đaji phon phool hiel ay đong jah kôt kalh.3Vii gô thier ra hlah hlaak tuôôy khơl oh ay truh ji dơơp xanưk dong dik truh ay, tyauq đaji kach ay đong măn tawaak hooy đom varơuq dik.4Gô be e xuum hlah hlaak leq kôt iaq kaluh varơuq neq, nưq laa gô hnoq ik tameng đaneq koot xau ku gô đong tawaak hooy đom varơuq dik.5Ay xung xiaq, ay đong dưk dơơp đom xuum tuôq paq kê varơuq kajoq đơu ay hnoq ik dơơp ka khơl oh ay, pheq đnooy dơơp varơuq nưq ka khơl tamooy kadrơy,6laa khơl adro heq dơơp xanưk truh xuum xung xiaq ku ay kangưưr tayuup vah. Ay hnoq dơơp kach rơơt rol tuôôy jarooy oot dưk hooy tyauq kach taxưngq dii Kơy Plêêk,7bơyh oot heq vlôh hooy vii Yal nưq, tuôôy be nhonq thưq kajoq xing kaluh tamooy daak kadrơy.8Lunưq haay duh pheq đoonq tiip khơl adro đanưq, xôq haay jêêk vlôh khơl adro kung dơơp varơuq ka varơuq dik.9Gô heq valơk taleq apok ka tayuup vah, bơh Đi-ô-trep, dro trôôch dưk ưk tôôy manih, leh 'yo nhonq 'wot.10Vii kakơq neq, atoh gô truh, gô hnoq tabông 'yo kaluh varơuq dơơp ku kơy nưq đơu kơy nưq đong dơơp tuôôy pahnhiq 'wot bơơn kaluh apok xơk tauq. Ji tuôôy măn koq hlah xuum dii kaluh varơuq nưq, kơy nưq be chiuq đoonq tiip khơl oh ay, yôôch kơy nưq kung klơl đơ khơl leq e xuum tiip jarooy ji pađuôôy oot vlôh klơlh tayuup vah.11Ay xung xiaq, te dơơp atôôlh varơuq xơk, đơu dayh dơơp atôôlh varơuq kaxay. Kơyq dơơp kaxay yôôych thuôk xuq Kơy Plêêk, dro dơơp xơk yôôych koq hmưq hloq Kơy Plêêk.12Đê-mê-triu jah apok xanưk kaxay xing tôôy manih ji xing aduq varơuq dik. Panưh kadrơy, 'wot kung dơơp xanưk đnoyq, ji ay xet đaneq apok xanưk ku 'wot laa dong dik.13Gô e 'ngưng varơuq xôq valơk ka ay, đơu gô leh trôôch xok phôôm ji chih xôq valơk ka ay.14Bơh gô trôôch meel tavơh ay, ji haay hnoq đnooy athêêk mot hyioh mot.15Apôôy varơuq hrok hrol măn dii ay. Khơl 'wơyq kađneng vôôch hlơq ay. Xiin atăq apok vôôch hlơq khơl 'wơyq kađnư anơng tong dro muuyq.
FAR EAST BROADCASTING COMPANY