2 Corinthians1
1Phao-lô, adro jah rơơlh ku Lôôk Wơơt Dêh Jê-xu bơyh iq trôôch ku Kơy Plêêk, ji adro oh ay Ti-mô-thê, atăq ka tayuup vah ku Kơy Plêêk măn aduq Kô-rinh-tô, kung ka dêq hloay khơl vah đong măn đom loch dêh A-chai.2Apôôy vanong plêêk ji varơuq hrok hrol xing Kơy Plêêk, Vaq haay, ji Lôôk, laa Lôôk Wơơt Dêh Jê-xu, truh tol oh ay!3Đangq ayuôôt laat Kơy Plêêk ji Vaq ku Lôôk haay — Lôôk Wơơt Dêh Jê-xu — 'ngưq laa Vaq ku varơuq angơuq, ji Kơy Plêêk ku tôôy varơuq hlơq hlôôp,4laa Kơy hlơq hlôôp 'wot đom tôôy pơơl dal ku 'wot, jarooy truh varơuq khienq ka 'wot hnoq ik hlơq hlôôp khơl adro măn đom tôôy pơơl dal bơơn varơuq hlơq hlôôp đơu kadih 'wot jah hlơq hlôôp bơyh Kơy Plêêk.5Vii đaji kaluh pơơl jiq ku Lôôk Wơơt Dêh hoot galaay tol 'wot đaleq, yôôych varơuq hlơq hlôôp ku 'wot gamưh Lôôk Wơơt Dêh kung hoot galaay đanưq.6Bơh atoh 'wot chiuq pơơl dal, yôôych nưq laa vii varơuq hlơq hlôôp ji varơuq wơơt xok ku oh ay; atoh 'wot jah hlơq hlôôp, yôôych nưq laa vii varơuq hlơq hlôôp ku oh ay, laa varơuq jah hmưq tavơh đom varơuq chiuq uunq kung kaluh pơơl jiq đơu kadih 'wot kung đong chiuq.7Ji xuum takôô gamưh ku 'wot truh oh ay laa kajưk dik, tuôôy xet đaneq đaji oh ay laa khơl manih kung jưq phon đom varơuq pơơl jiq đaleq, yôôych kung jưq phon đom varơuq hlơq hlôôp đanưq.8Wơơy oh ay, vii 'wot leh xung oh ay be xet truh kaluh pơơl hwơơl heq xalih truh ka 'wot aduq A-si, đaneq 'wot heq chiuq raanq gengq qwaq mưk, galơh taalh paraat, truh nôôy 'wot pheq đnooy dêq hloay leh e takôô gamưh xôq riirh.9Lunư, kadih 'wot 'miêh heq e xadrah păk kaxêêt pi'lăp 'wot, xôq ka 'wot be hnoq ik gamưh aduq kadih xăk, bơh laa aduq Kơy Plêêk, Kơy khienq adro kaxêêt riirh hlê,10laa Kơy heq wơơt xok 'wot klơlh varơuq kaxêêt kôt đa hơq, yôôych Kadraq hnoq wơơt xok 'wot — 'ngưq laa măn aduq Kadraq, 'wot e xuum takôô gamưh đaneq Kadraq kung hnoq măn wơơt xok 'wot đnoyq,11tuôôy oh ay kung jưq phon waak đom varơuq apôôy vii kơq 'wot — xôq ka vlôh xing 'ngưng adro, vanong kaxay truh tol 'wot, Kơy Plêêk nhonq xok kaluh apok kuh kway bơyh 'ngưng adro vii kơq 'wot.12Vii varơuq hlah xuum ku 'wot laa đaneq: apok xanưk ku xuum klaak 'wot, đaneq 'wot heq xa măn katul dêh araak đom varơuq hlăng vah ji dong dik ku Kơy Plêêk, leh aalq xing varơuq khôôt xet tyauq xăk xamơk, bơh bơyh vanong plêêk ku Kơy Plêêk, đơu nhưk laa đôôyq dii oh ay.13Vii 'wot be valơk ka oh ay varơuq kajoq đêh, pi gôk kaluh varơuq đơu oh ay đok ik ji hlolh ik, bơh gô takôô gamưh đaneq oh ay hnoq hlolh dong dêq —14kung đaji oh ay heq hlolh 'wot phon leq — đaneq 'wot laa varơuq hlah xuum ku oh ay, yôôych oh ay kung đanưq đôôyq dii 'wot, đom hngơy ku Lôôk haay, laa Lôôk Jê-xu.15Ji dii varơuq tuôq gamưh nưq, adroyq neq gô đinq truh dii oh ay, xôq oh ay hnoq ik e vanong kaxay yưk thưq vaarq,16yôôch xing aduq oh ay xôq hooy hlê truh Ma-xê-đoan, ji xing Ma-xê-đoan laay truh dii oh ay, yôôch jah oh ay jarooy dưk hooy truh Ju-đê.17Vii anưq, tuôôy đong đinq varơuq neq, yôôych e aalq be laa gô heq dưk dơơp đom varơuq tyauq xăk xamơk? Long gô heq đinq varơuq gô đong đinq tyauq xăk xamơk, xôq yôôch đom gô laa “Jơq, jơq” hloay “Lưp, lưp” ih?18Bơh Kơy Plêêk laa jư apok, lunưq apok ku 'wot deng ka oh ay yôôych leh aalq vơơ “Jơq” vơơ “Lưp” 'leq.19Vii Koot Kơy Plêêk, laa Lôôk Wơơt Dêh Jê-xu, Kơy heq jah padoh taboon đom katul oh ay bơyh 'wot — 'ngưq laa bơyh gô ji Sin-vanh kung Ti-mô-thê — be aalq laa vơơ “Jơq” vơơ “Lưp,” đơu đom Kadraq 'miêh hloay laa “Jơq”.20Bơyh xet taleq apok tavek ku Kơy Plêêk raay laa “Jơq” đom Kadraq. Jo nưq, kung gamưh Kadraq, apok “Amen” gamưh haay tưp tok Kơy Plêêk vii tađnah tađnaak Kadraq.21Panưh kadrơy, Kơy Plêêk laa Kơy lôp kajưk 'wot dii oh ay đom Lôôk Wơơt Dêh ji heq para jơu ka 'wot,22kung laa Kơy heq đongq dơuq 'wot ji kahniq varơuq dưk xanưk ku Kơy Phool Hiel muut đom xuum 'wot.23Măn gô yôôych apôôy vôôch Kơy Plêêk dơơp manih xanưk ka phool hiel gô đaneq vii heq nhiinq ka'lăk ka oh ay, gô heq leh hooy truh Kô-rinh-tô đnoyq.24Be aalq bơyh 'wot e qwuyen da uh tol xuum tuôq oh ay, bơh bơyh 'wot laa khơl 'wơyq kung dơơp varơuq vii varơuq hlah ku oh ay, jo oh ay heq dưk kajưk đom xuum tuôq yôôch.
FAR EAST BROADCASTING COMPANY