1 Thessalonians1
1Phao-lô, ji Sin-vanh, kung dii Ti-mô-thê atăq ăm Tayuup Vah Tê-sa-lô-ni-ka đom Kơy Plêêk, laa Vaq ji Lôôk, laa Lôôk Wơơt Dêh Jê-xu. Apôôy vanong plêêk ji varơuq hrok hrol măn tol oh ay.2'Wot hloay kuh kway Kơy Plêêk truh dêq hloay ay oh, tuôôy leh padơy nhăk truh oh ay đom kaluh apok apôôy ku 'wot,3vii văch truh varơuq dơơp bơyh xuum tuôq, ji varơuq pơơl hwơơl bơyh xuum xung xiaq, kung katik kajưk bơyh varơuq takôô gamưh ku oh ay aduq Lôôk haay, laa Lôôk wơơt Dêh Jê-xu, kangưưr Kơy Plêêk, Vaq haay;4vii xet oh ay, khơl adro jah Kơy Plêêk xung xiaq, oh ay jah Kơy Plêêk rơơlh xok,5bơyh kơq Hêêl Kaxay ku 'wot heq jah padoh taboon ka oh ay leh vơ bơơn apok đnooy, đơu kung bơơn taay yaak ji bơơn Kơy Phool Hiel, kung dii xuum tuôq kajưk dik — đaji oh ay xet 'wot heq riirh đaleq đom katul oh ay vii ich lơơy ku oh ay.6Oh ay kung heq vlôh jêêk khơl adro tyauq atôôlh ku 'wot ji ku Lôôk, tuôôy nhonq xok đaauq đom katul 'ngưng pơơl hwơơl dii varơuq hlah hlaak ku Lôôk Phool Hiel.7Pheq đnooy, oh ay heq vlôh jêêk ramil ka dêq hloay khơl adro e xuum tuôq aduq Ma-xê-đoan ji aduq A-chai8Vii xing oh ay, đaauq Lôôk heq jah ahna vlôh, leh vơ đom dêh Ma-xê-đoan ji đom dêh A-chai, bơh xuum tuôq ku oh ay aduq Kơy Plêêk heq pahêêr truh loch aduq. Vii anưq, 'wot leh hloq duh pheq đnooy kajoq đnoyq.9Bơyh tuôôy nhăk truh 'wot, kadih oot ragơy taboon hlê varơuq tiip đoonq đơu 'wot heq e aduq oh ay vlôh aleq, ji đaleq oh ay heq wih klơlh vangưl, wih xuq Kơy Plêêk xôq hơu varơuq Kơy Plêêk hloay riirh ji dong dik,10ji xôq takôô Koot Kadraq xing plêêk, Kơy đơu Kadraq heq khienq riirh hlê xing aduq kaxêêt — nưq laa Lôôk Jê-xu, Kơy wơơt haay klơlh đơơt tôq jaraq đong truh.
FAR EAST BROADCASTING COMPANY