1 Corinthians9

1Gô leh jah rayơh rayơơy ih? Gô leh aalq laa muuyq adro jah rơơlh ih? Gô koq hmưq tavơh Lôôk Jê-xu, Lôôk haay ih? Be aalq oh ay laa varơuq dơơp ku gô đom Lôôk ih?2Ju gô leh aalq laa adro jah rơơlh đôôyq dii khơl adro kadrơy, bơh axit dik gô laa adro jah rơơlh đôôyq dii oh ay. Vii oh ay laa bơơn xanưk truh varơuq dơơp adro jah rơơlh ku gô đom Lôôk.3Apok tagêh hlê ku gô đôôyq dii khơl adro vôôch 'yo gô laa luneq:4Be aleq 'wot leh e qwuyen xa ji hôôch?5Be aleq 'wot leh e qwuyen jarooy tyauq muuyq adro kadrê tuôq Lôôk, kung đaji khơl jah rơơlh kadrơy kung khơl adro ma oh kanau ku Lôôk ji Sê-pha?6Long vơ muuyq Ba-na-ba ji gô be e qwuyen leh dơơp varơuq?7Kơyq hooy kuun bơơn jêêt hnhư ni dong leq? Kơyq pêêt hluôôt nho đơu leh xa play ni? Long kơyq xakaq bơy đơu leh hôôch sưah ku bơy?8Leh aalq gô đong đnooy kaluh varơuq neq tyauq kach manih đơơy ih, long ganuun kung be đnooy kaluh varơuq nưq?9Vii e apok valơk đom ganuun Môi-se: “Te trôôp ro muut moong ôô bo đong joaq va.” Be aleq Kơy Plêêk lo ka ôô bo?10Long Kadraq xanoh dêq hloay vii ich lơơy ku haay? Dik, apok jah valơk vii ich lơơy ku haay, đaneq adro akay ruôngq pheq akay đom takôô gamưh, ji manih joaq va yôôych dơơp đom varơuq xuum takôô truh phon ahlook ka ni.11Atoh 'wot heq paraay kaluh varơuq danưng kooy đom katul oh ay, yôôych e lưp qwaq be atoh 'wot hnoq goch xok kaluh vâk xăk xamơk xing oh ay?12Atoh Khơl adro kadrơy e phon truh qwuyen nưq tol oh ay, yôôych be aalq 'wot kang 'ngưng iaq ih? Lunư, 'wot leh xok dơơp qwuyen neq. Tađôôy muut đnư, 'wot chiuq uunq tôôy varơuq xôq 'wot leh taway truh paq kê klơl đơ leq ka Hêêl Kaxay ku Lôôk Wơơt Dêh.13Oh ay leh xet đaneq khơl leq hơu varơuq đom hnhư hơu yôôych xa kaluh thưq ku hnhư hơu, khơl adro hơu varơuq aduq para hơu yôôych e phon aduq para hơu, long ih?14Kung muuyq kach nưq, Lôôk heq đnooy pato đaneq khơl adro đnooy vlôh Hêêl Kaxay yôôych riirh gamưh Hêêl Kaxay.15Bơh gô be xok dơơp paq kê varơuq leq đom kaluh qwuyen nưq. Panưh kadrơy, gô leh valơk kaluh apok neq xôq qwuyen nưq jah xôq dơơp ka gô đanưq, vii đôôyq dii gô, tha kaxêêt măn iaq laa paq kê kơyq hnoq dơơp ka xuum tađnah mot ku gô vlôh hư hlơơp.16Bơyh atoh gô padoh taboon Hêêl Kaxay, yôôych be e kajoq ka gô xôq pa ưưt xăk, jo ka varơuq băt dăt jah pahnăp xôq tol gô. Vii dik laa ra ơơh ka gô atoh gô leh padoh taboon Hêêl Kaxay!17Atoh gô hlah xuum dơơp varơuq nưq, yôôych gô jah phon kadrool. Măn atoh leh hlah xuum, yôôych gô heq chiuq pahnăp ăm varơuq dơơp manih xakaq 'yo yôôch.18Anưq, phon kadrool ku gô laa kajoq? Nưq laa tuôôy padoh taboon Hêêl Kaxay leh duh baak jêêt, gô hnoq ik padoh pato Hêêl Kaxay dơơp aleq ka leh xok dơơp qwuyen ku gô đom Hêêl Kaxay.19Vii ju jah rayơh rayơơy klơlh tôôy varơuq, gô heq khienq kadih xăk dơơp xapok ka tôôy adro, xôq gô hnoq ik jah xuum 'ngưng adro iaq.20Đôôyq dii manih Jo Thaiq, gô jêêk vlôh đaji manih Jo Thaiq, xôq gô hnoq ik jah xuum manih Jo Thaiq. Đôôyq dii khơl adro măn 'laarq ganuun, gô jêêk vlôh đaji adro măn 'laarq ganuun, ju kadih gô leh măn 'laarq ganuun, xôq gô hnoq ik jah xuum khơl adro măn 'laarq ganuun.21Đôôyq dii khơl adro leh e ganuun, gô jêêk vlôh đaji adro leh e ganuun (ju be aalq laa leh e ganuun ku Kơy Plêêk, bơh laa măn 'laarq ganuun ku Lôôk Wơơt Dêh), xôq gô hnoq ik jah xuum khơl adro leh e ganuun.22Đôôyq dii khơl adro ravoch, gô jêêk vlôh ravoch, xôq gô hnoq ik jah xuum khơl adro ravoch. Gô heq jêêk vlôh tôôy kach đôôyq dii tôôy adro, xôq ka gô hnoq ik bơơn tôôy kach wơơt jah muuyq sôôq adro.23Panưh kadrơy, gô dơơp tôôy varơuq vii kơq Hêêl Kaxay, xôq gô hnoq ik jêêk vlôh adro jưq phon đom nưq.24Oh ay leh xet đaneq dêq hloay khơl manih charơơk đom aduq charơơk tathi raay charơơk, bơh vơ muuyq adro nhonq jah kadrool ih? Dayh charơơk tyauq kach nưq xôq oh ay hnoq ik jah ik phon kadrool.25Panưh kadrơy, tôôy adro tagoa charơơk đom kaluh đơơt tathi yôôych atuq varơuq katik jư xăk đom tôôy varơuq. Long oot chiuq anưq xôq oot hnoq ik nhonq đoat tađnah dayh hư hlơơp, bơh haay laa đoat tađnah leh hư hlơơp.26Vii anưq, gô charơơk đanưq, be aalq đaji leh e muk đik; gô hmơt thuk đanưq, be aalq đaji hmơt không khiq.27Wih hlê, gô rôp băt xăk xamơk gô ji dơơp ni vlôh xapok, leh kheoq bơơn kach leq nưq, atêq tuôôy pato dayq 'ngưng adro kadrơy, kadih xăk gô hnoq ik biq ka'lăk vlôh.

FAR EAST BROADCASTING COMPANY

https://app.library.bible/content/37a1dc7a54269bd3