1 Corinthians13
1Ju gô hnoq ik đnooy kaluh thưq apok ku koot manih ji yaak plêêk, đơu gô leh e xuum xung xiaq, yôôych gô heq jêêk vlôh poop chêêk ahna ahlôôk long varang khang tarok 'nhoanh.2Ju gô e vanong đnooy hlit ji hnoq ik hlolh dêq hloay varơuq kadook kung tôôy hlolh xet, ji ju gô e dêq hloay xuum tuôq pheq đnooy taway ik ngok đoot, đơu gô leh e xuum xung xiaq, yôôych gô be laa kajoq dêq.3Pheq đnooy long tuôôy gô ăm dêq tôôy garuh anôôp kadih gô, ji Ju gô pahnăp xăk gô xôq ka gô hnoq ik pa ưưt vlôh, đơu gô leh e xuum xung xiaq, yôôych gô be jah kajoq.4Xuum xung xiaq e xuum chiuq uunq ji kahnoq vlôh varơuq xuum be huq, xuum xung xiaq be tagliêh 'yarơ, xuum xung xiaq leq pa ưưt akhwoak, leh katơơk galơh,5leh xa dơơp bơyq ba, leh axek akhiim đooy vôôch kaluh kajoq ku đêh xăk, be hlơu biq tache jaraq, leh jauq xôq varơuq xơk tauq,6be hlah truh varơuq be hyioh jăk, bơh hlah hlaak đom varơuq dik;7xuum xung xiaq ragơy ka'lăk tôôy varơuq, tuôq gamưh tôôy varơuq, takôô gamưh tôôy varơuq, chiuq uunq tôôy varơuq.8Xuum xung xiaq be dong leq ruh hlơơp. Panưh kadrơy, ju laa vanong đnooy hlit, yôôych ni hnoq biq dêq; ju laa vanong đnooy 'ngưng apok, yôôych ni hnoq padơy; ju laa hlolh xet khôôt xet, yôôych ni hnoq biq ka'lăk hlơơp.9Vii haay hok xet phon leq, ji haay đnooy hlit phon leq.10Bơh tuôôy varơuq xaleep truh, ưng koq xaleep ku phon nưq hnoq biq ka'lăk.11Tuôôy gô măn laa on oh, gô đnooy đaji on oh, gô 'yo biit đaji on oh, gô xa athêêk đaji on oh. Tuôôy gô heq kôt khôôt, gô ka'lăk kaluh varơuq ku on oh.12Vii tuôôy nưq, haay 'yo hloq xing ramil dii long lơuq kablo, bơh truh tuôôy nưq mot tangưưr mot. Juneq, gô e hlolh xet phon leq, bơh truh tuôôy nưq, gô hnoq nhonq xet kach xaleep, kung đaji gô heq jah nhonq xet kach xaleep.13Bơh juneq măn hlê pe varơuq neq: xuum tuôq, takôô gamưh, ji xuum xung xiaq. Đơu varơuq kôt galơh iaq dêq đom pe varơuq nưq laa xuum xung xiaq.
FAR EAST BROADCASTING COMPANY