Romans2
1Payh canŏq, ơ tamun tĭq — cồ payh vu lây uĕh bĕq dôih — pôp đăng gĕh trong lây chĕq cammlăh gĕh, mvăc sŭng vrŭq lây cồ pôp bĕq dôih tamun ndây, nŏq pôp khoi cồ bĕq dôih nơm; mvăc pôp, cồ tamun bĕq dôih, khoi tagoq tabaq khây vrŭq nŏq.2En khây vơn gĕh gưt pành sinlơ sa dôih Siđăch Trôq de cồ tăm dip bây trong nhâng sŏng tăm chŏl vlâq khây tamun baq tagoq khây vrŭq canŏq.3En, heq tamun tĭq, cồ nĕh bĕq dôih khây vu baq tagoq khây vrŭq canŏq en payh di nơm khoi ôp khây vrŭq dân canŏq, gal pành pôp sinâng sĭq vrŭq heq, pành pôp plĕh ntrăch sinlơ sa dôih Siđăch Trôq de hàh?4Ha cồ pôp jilơn vanâr vôq sĭq sinlơ gan'hăp vlayh nuih talaq yăh sinđach bây nuih talaq yăh la-êr nggâm sinlơ mbêr nuih Siđăch de, mvăc đăng gưt pành nuih talaq yăh Siđăch Trôq de têch iau pôp tât sinlơ palâq vôq?5Nhâng dăh bây sinlơ kranh vôq pôp de bây nuih talaq đăng palâq vôq vlâq, pôp chĕq nchêm vlâq sinlơ măq nuih an nơm sŭng năr măq nuih nggâm pơq lŭh sĭq sinlơ sa dôih sŏng yăh Siđăch Trôq de,6cồ Candranh trŏh an ăp ndu dip bây khây vrŭq ôp tamun nŏq de.7Du maq cồ sinlơ hôm mrĭh wân lawân chĕq ân an khây vu lây wŏng miêng sinlơ sindraq sindil nggâm sinlơ iơq prĭh bây sinlơ jŏq jong wân lawân dăh bây sinlơ mbêr nuih sĭq khây vrŭq yăh,8en ndăl tĭq cồ sinlơ măq nuih nggâm vadâq măq nuih hưp hưp chĕq ân an khây tamun cồ can'hir nroq an ayh nơm nggâm đăng tôq iêt sinlơ nhâng sŏng en vlam sinlơ têch iau dăh bây sinlơ đăng sŏng yăh.9Rabăh rabơp bây sinlơ minlŏh minsat u vlơ ăp wênh nggui khây tamun ôp vrŭq viêm chhâc, tamun Yo-thai de lor lĕq, nggâm lawân tamun Hi Lap de.10En sinlơ sindraq sindil bây iơq prĭh nggâm sinlơ yăh iên chĕq ân an ăp ndu ôp vrŭq yăh, an tamun Yo Thai daq vôq lĕq, lawân an tamun Hi Lap.11Mvăc đăng gĕh sinlơ nkênh amaq sŭng sinlơ gĕh măt Siđăch Trôq de.12Hê vu lây gĕh baq tagoq bưn bap dăh bây tanrong đăng gĕh ravwŏq, nŏq khoi cồ chưt pachĕq bây tanrong đăng gĕh ravwŏq, bây payh vu lây gĕh baq tagoq bưn bap gŭq sŭng ravwŏq, en heq mŏh nhŭp dôih sŏq ju ravwŏq nŏq.13Mvăc đăng gal vu lây chăng gưt ravwŏq pành yăh sŏng u vôq măt Siđăch Trôq, en ayh khây tamun ôp bây ravwŏq nŏq mơ gĕh cuôl pành yăh sŏng.14Mvăc lăm khây văl daq aling, cồ khây văl đăng gĕh ravwŏq, bây sinlơ răp dip ôp khây vrŭq ravwŏq de, nŏq cồ đăng gĕh ravwŏq, khây nĕh cồ ravwŏq an nơm iưn,15nŏq cồ khây tamun an sây khây vrŭq ravwŏq de gĕh chêr sŭng nuih talaq khây nĕh, lăm nuih tôr khây nĕh ôp candân, bây khây sinlơ sinâng yăq văq ha tât daq cŏh king rawênh sŭng khây nĕh bây ndăng ganai,16sŭng năr cồ Siđăch Trôq sadôih khây vrŭq pành sưt tăm pôn con tamun de payh ju Siđăch Yơt Dưnya Yêsu, dăh bây Sipơp Yăh ănh je.17En payh pôp văq săq pành tamun Yo Thai, camvân lăp ravwŏq, lơ vôq sŭng Siđăch Trôq,18dân gưt nuih cơnh Siđăch de, wŏq singgal khây vrŭq tagăh ca-ayh sa vôq vlơ lĕq gĕh pađau tămti a sŭng ravwŏq,19nggâm du hal, pôp camvân ayh u nơm ôp tamun iau trong an khây nĕh cồ jingo măt, sinlơ silang an khây vu cồ gŭq sŭng vi jingo,20tamun pađau tămti mintan gala, pành gru pađau khây tamun vôt case, mvăc wŏq gĕh têr gân gajăp sindăc sinlơ dân gưt nggâm sinlơ nhâng sŏng sŭng ravwŏq,21payh canŏq, heq ơ nĕh cồ pađau tămti vu ndây tĭq, pôp đăng pađau tămti di nơm hàh? Heq nĕh cồ tămti păndĕh pành vâng can'hưn tĭq, pôp gĕh can'hưn đăng?22Heq ơ nĕh cồ pân đăng gĕh cani camăn tĭq, pôp gĕh cani camăn đăng? Heq ơ nĕh cồ ncom rup nggui cŭh tĭq, pôp gĕh avlăh khây păch pađăc sŭng jrôt cŭh đăng?23Pôp lơ vôq pành tamun rĭh u sŭng ravwŏq, pôp gĕh gơm chhŏh Siđăch Trôq a vrŭq baq tagoq ravwŏq đăng?24Payh “săq Siđăch Trôq vlam sinlơ gơm chhŏh rawênh sŭng khây văl a ling payh ju khamay,” dân ca camvŭm gĕh chêr.25Nhâng, pành vrŭq chit ntô văt tât sinlơ don yăh payh pôp dăh dăn bây ravwŏq, en payh pôp cồ nĕh ôp tih tagoq ravwŏq, nŏq vrŭq gĕh chit ntô pôp de vaih jêng lŭh pành đăng cồ chit ntô.26Payh canŏq, hê du mvu cồ ndŏh chit ntô gưt jơ bây khây đôq cơnh ravwŏq de, nŏq đăng gal vrŭq cồ ndŏh chit ntô tamun nŏq de payh gĕh sŏh dân ca vrŭq gĕh chit ntô en vồh?27En lăm ôp lôch bây ravwŏq, tamun cồ ndŏh chit ntô sŭng rup swan nĕh de palâq vlâq wŏq dôih pôp, payh cồ tamun don ju camvŭm sirăq nggâm chit ntô cồ nĕh baq tagoq ravwŏq.28Mvăc đăng gal du mvu tamun don săq swan adăl ling pành tamun Yo Thai, khoi đăng gal păch adăl ling vlơ rup swan cồ gĕh chit ntô,29pagâl lăp nŏq, tamun Yo Thai gĕh răq jêng u gatŭq sưt tăm pôn sŭng di lăm, nggâm sinlơ chit ntô lŭh a nuih talaq don u Siđăch Wênh, đăng gal a camvŭm chêr; cồ vrŭq nhâng tapơ sĭq tamun nŏq đăng gal a con tamun nŏq cồ a Siđăch Trôq.
FAR EAST BROADCASTING COMPANY