Romans11
1Canŏq ănh wĭnh lŭp: Gal pành Siđăch Trôq lăq chĕq văl Nĕh de đăng? Vrŭq nŏq đăng sẫy lŭh gĕh. Mvăc nơm ănh heq khoi cồ du mvu tamun I-sơ-ra-ên, a chhe njang Ap-ra-ham, sĭq maq chhe hwai Bên-ya-min.2Siđăch Trôq đăng lăq chĕq văl Nĕh de, cồ văl Siđăch gĕh gưt lor. Ha pôp ŏh ur klô đăng gưt Sirăq Gŭn nhai păch lây sĭq Ê-li, lăm nĕh yăq bây Siđăch Trôq chŏl sĭq vlâq văl I-sơ-ra-ên?3“Cŭh Siđăch, khây nĕh tachưt khây tamun nhai lor Siđăch de, khây nĕh yaih hwât mvrăh cŭh Siđăch de, khoi ayh du mvu con cồ hôm mrĭh, bây khây nĕh dăh wŏng di vlam chĕq tachưt con.”4En camvŭm âh gŭn măn nhai bây nĕh cồ păch lây? “Ănh gĕh chĕq prăp an Ănh pâh ravu tamun klô, cồ khây tamun đăng chŏl nkrŭng u vôq Ba-anh.”5Canŏq khoi bây tanrong nŏq sŏng vadâq vrêq heq, u vi lây nŏq hôm du phần tavêt sĭq vlâq bây sinlơ săch sŏq sinăc yăh de.6En hê don ju sinăc yăh, nŏq đăng gal don ju vrŭq ôp wŏq. Hê đăng canŏq, sinăc yăh đăng hôm cồ sinăc yăh wŏq.7En mŏq cồ canŏq? Vrŭq cồ văl I-sơ-ra-ên wŏng miêng, khây nĕh đăng wŏq sŏq gĕh, payh cồ vu lây gĕh săch sŏq nŏq wŏq gĕh, en khây nĕh cồ hôm vlâq pơh kranh nuih talaq,8dân ca sinlơ cồ gĕh chêr, pành: “Siđăch Trôq gĕh paq an khây nĕh wênh nggui tĭq ntưl, măt đăng sây, tôr đăng chăng, di tât năr heq.”9En Đa-vit nhai: “Căh chĕq nra khây nĕh de jêng yŭq, dăq, tamô tachơn jâng bây sinlơ trŏh daq chĕq ân an khây nĕh.10Căh chĕq măt khây nĕh tưl jingo chĕq đăng sây, bây căh ôp an vưt khây nĕh gât côq jôn lawân.”11Canŏq, ănh wĭnh lŭp: Gal pành khây nĕh tachơn chĕq di vông hlâq khlŭp hẩng? Vrŭq nŏq đăng sẫy lŭh gĕh. Palâq vlâq, payh ju bưn bap khây nĕh de, nŏq sinlơ wŏq yơt tât bây văl aling, chĕq ôp an khây nĕh canănh.12Maq ndây, payh sinlơ ôp tĭh khây nĕh de văt tât sinlơ gan'hăp jina dưnya iưn, bây sinlơ pŏh pât khây nĕh de văl tât sinlơ gan'hăp jina an khây văl daq aling, nŏq sinlơ lôch lam khây nĕh de ôp an gan'hăp jina vênh rămvi dông gưt dâng lây?13En vrêq, ănh wĭnh nhai bây pôp ŏh khây văl daq aling. Nŏq, pành don payh nơm ănh cồ con tuyh an khây văl daq aling, ănh sŏq ôp lih măt sĭq vrŭq con tuyh ănh je,14chĕq cồ ju nŏq ju heq, ănh gĕh prơn ôp an văl ganơ bây rup swan ănh je vadăng canănh bây chĕq têch yơt gĕh takiq ndu sŭng khây nĕh.15Mvăc hê sinlơ đăng tul wŏq khây nĕh de têch tât vrŭq tăm la-êr dưnya de, nŏq vrŭq khây nĕh wŏq sŏq canŏq caheq payh đăng gal cồ sinlơ hôm mrĭh lŭh a gatŭq chưt?16Maq ndây, hê si nhŭm vanĭh a daq vôq cồ gŭn, nŏq lĕq rămvŭq vanĭh nŏq khoi canŏq. Bây hê diyĕh cồ gŭn, nŏq khây singging khoi canŏq.17En hê takiq singging gĭh an dayh chĕq, en hôm cồ pôp ŏh ur klô, lăm cồ singging ô-liu vri, gĕh taq lăp sŭng gatŭq nŏq, en gĕh jêng vưt nĕh cồ wŏq simơ daq jăr hôm mrĭh vênh rămvi a diyĕh chhơ ô-liu nŏq,18nŏq vâng lơ vôq dông a khây singging ndây. En cồ pôp ŏh lơ vôq, nŏq wĭnh căh pành đăng gal nơm pôp ŏh văq nong diyĕh chhơ, en đé cồ diyĕh chhơ văq nong pôp ŏh.19Payh canŏq, ôp ŏh nhai: “Khây singging nŏq gĕh gĭq tabayh en, chĕq nơm ănh văt taq lăp gĕh.”20Gal canŏq! Khây nĕh bị gĭq chĕq payh ju sinlơ đăng tôq, en hôm cồ nơm pôp ŏh tao yăq kranh gajăp don sinlơ tôq camvân. Vâng chĕq tôr tât khây sinlơ sinâng iơq nơm, en gưt phŭng candŭh!21Mvăc hê Siđăch Trôq đăng đŏh lơi khây singging cồ dăh bây rup răq a daq vôq tĭq, nŏq Siđăch khoi đăng đŏh lơi pôp ŏh.22Canŏq, căh singgal gưt nuih talaq yăh la-êr bây sinlơ krit gât Siđăch Trôq de: payh cồ sinlơ krit gât sĭq bây khây tamun vông hlâq, en nhâng nuih talaq yăh la-êr Siđăch Trôq de chĕq ân an pôp ŏh, hê pôp ŏh cơ gŭq sŭng sinlơ yăh la-êr Siđăch de. Hê đăng canŏq, payh nơm pôp ŏh khoi bị chit hwât.23En khây tamun tĭq khoi canŏq, hê khây nĕh đăng pung nơm sŭng sinlơ đăng tôq, nŏq khây nĕh gĕh taq lăp. Mvăc Siđăch Trôq gĕh prơn gŭn chĕq taq khây nĕh lăp.24Mvăc hê pôp ŏh plat păh chăch ntrăch atơm chhơ pành gĕh sun a daq vôq cồ chhơ ô-liu vri, en gĕh pănggrăp lăp tih a vrŭq cồ gĕh sun a daq vôq lăp chhơ ô-liu yăh, nŏq khây tamun nŏq, cồ khây tamun tăm dip bây nrăng gĕh sun a daq vôq, nŏq cồ jăc wŏq gĕh pănggrăp lăp chhơ ô-liu cồ nơm de gŏq dông gưt dâng lây?25Mvăc cồ ơ pôp ŏh vơn, ănh đăng cơnh pôp ŏh đăng gưt sinlơ chin'hâu heq, chĕq pôp ŏh đăng gĕh sinlơ vanŏh bây vôq nơm, bây sinlơ kranh vôq lŭh du-ĕq a văl I-sơ-ra-ên gĕh sẫy lŭh, di tât lăm lôch bây sinlơ cơp khây văl daq aling jan lăp;26en canŏq, lĕq văl I-sơ-ra-ên gĕh yơt, dân ca gĕh chêr pành: “Candranh wŏq yơt dâl tât a Si-ôn; Nĕh hwât tabayh khây vrŭq đăng tôq lŭh ntrăch a Ya-côp.27En nŏq cồ sinlơ tăm lăp ti a nơm Ănh chĕq ân an khây nĕh, lăm Ănh nhŭp hwât bưn bap khây nĕh de.”28Payh bây Sipơp Yăh, khây nĕh cồ tamun tăm chŏl mvăc cồ sinlơ dip yăh an pôp ŏh, en cồ payh bây sinlơ sŏq săch, nŏq khây nĕh cồ tamun gĕh yâh sinđach mvăc payh a khây cô jây khây nĕh de.29Mvăc khây sinăc yăh bây sinlơ cuôl panh Siđăch Trôq de cồ khây vrŭq đăng pagâl gĕh.30Mvăc tât daq cồ payh nơm pôp ŏh a paheq đăng tôq chăng Siđăch Trôq, en năr heq gĕh sinđach payh ơ sinlơ đăng tôq chăng khây tamun heq de,31en Khoi dân canŏq, khây tamun heq avrêq đăng tôq chăng u sinlơ sinđach pôp ŏh de, chĕq vrêq heq khây nĕh khoi gĕh yâh sinđach.32Mvăc Siđăch Trôq trăng ăp ndu sŭng sinlơ đăng tôq, chĕq Siđăch pơq hwi nuih talaq sinđach ăp ndu.33Nhâng, vưt mvơ lŭng vatip jru sưt sĭq vrŭq gan'hăp jina nggâm sinlơ vanŏh bây sinlơ dân gưt Siđăch Trôq de! Canŏq caheq sĭq sinlơ wŏq dôih Siđăch de cồ đăng pêt têr păndĕh gĕh, nggâm con trong Siđăch de đăng sinâng gưt gĕh!34Mvăc, “Vu lây gưt gĕh nuih tôr Siđăch de? Ha vu lây nŏq jêng tamun tăm pơq trong an Siđăch?35Ha vu lây gĕh an Siđăch lor, en gĕh Siđăch trŏh sĭq vlâq?”36Mvăc ăp sinlơ lŭh a Siđăch, don u Siđăch, en ndâl sĭq tu Siđăch. Sindraq sindil sĭq nơm Siđăch di tât wân lawân. A-men.
FAR EAST BROADCASTING COMPANY