Matthew13
1Sŭng năr nŏq, lăm saq lŭh ntrăch a nhi, Siđăch Yêsu gŭq u vâr daq lênh.2Mintan con văl gŏq săq lŭng vatom sĭq vlâq rawênh Nĕh. Tât daq, lăm hao vlơ du tong duq, Siđăch gŭq jưr, en lĕq mintan con văl tao yăq a vlơ vâr daq lênh.3En Siđăch don camvŭm prŭp nhai bây khây nĕh gŏq sinlơ, pành: “Sên heq, du mvu vrŏh sitil saq lŭh chĕq vrŏh.4Lăm vrŏh sitil, gĕh khây nggrăp tarŏh amaq trong, nŏq sŭm păr tât en sa lĕq sitil nŏq.5Khây nggrăp ndây tarŏh vlơ ntĕh tamô sarĕh, cồ vi đăng gĕh gŏq ntĕh gŏng. Sŏng lăm nggrăp ntŏh măt, mvăc ntĕh đăng gĕh jru.6En lăm măt năr vưt hao, chhơ con vlam năr dŭh sŏh roq en ro rănh mvăc đăng gĕh rayĕh.7Hôm khây nggrăp ndây tarŏh sŭng khây bưl loq, nŏq khây bưl loq măq hao en piêt khây chhơ con nŏq.8En khây nggrăp ndây wŏq tarŏh vlơ ntĕh yăh, en an lŭh ncao play, nggrăp heq gĕh du rayĕng palang, nggrăp tĭq gĕh prau jât, nggrăp tơq gĕh pe jât.9Vu lây gĕh tôr, căh iêt chăng.”10En khây con tuyh, lăm tât mơch, nhai bây Siđăch: “Păch tơm lây nŏq Gru nhai bây con văl a khây sinlơ prŭp canŏq?”11Canŏq en, lăm âh camvŭm, Siđăch nhai bây khây nĕh pành: “Bây pôp ŏh nŏq gĕh paq an chĕq gưt khây sinlơ jru sưt sĭq Daq Trôq, hôm bây khây nĕh nŏq đăng gĕh paq an.12Mvăc vu lây gĕh, en sĭq maq nĕh gĕh paq an wŏq, en nĕh nŏq gĕh vênh canăh. Hôm vu lây đăng gĕh, nŏq khoi nhŭp ntrăch a nĕh lawân sinlơ cồ nĕh gĕh sŭng ti.13Payh ơ tơm tu heq, Ănh nhai bây khây nĕh a camvŭm prŭp; mvăc cồ gĕh deng, khây nĕh đăng singgal gưt; en cồ câp iêt, khây nĕh đăng chăng gĕh, khoi đăng dân gĕh.14En camvŭm nhai lor Ê-sai de gĕh jêng u khây nĕh, pành: ‘Sŭng vrŭq chăng, pôp ŏh gĕh iêt chăng, en nhâng bâng pôp ŏh đăng dân gĕh; hôm lăm deng, khây pôp ŏh deng sên, en nhâng bâng pôp ŏh đăng singgal gưt.15Mvăc nuih talaq văl heq gĕh jêng kranh; tôr khây nĕh đăng dê chăng, en khây nĕh nhơm măt nơm, mvăc phŭng khây nĕh deng sây gĕh a măt, iêt chăng a tôr, dân gĕh a nuih talaq, en palâq vôq sĭq vlâq, en Ănh jâc yăh an khây nĕh.’16Cồ canŏq, yăh vŏq âr an măt pôp ŏh de, mvăc sây gĕh, en tôr pôp ŏh de, mvăc chăng gĕh.17Nhâng, Ănh nhai bây pôp ŏh pành gŏq tiêng tri bây tamun yăh sŏng cơnh can'hir chĕq sây khây păch cồ pôp ŏh sây, nŏq khây nĕh đăng sây gĕh, bây chĕq chăng khây păch cồ pôp ŏh chăng, nŏq khây nĕh đăng chăng gĕh.18Canŏq, vrêq pôp ŏh chăng camvŭm prŭp sĭq tamun vrŏh sitil.19Ăp ndu chăng con trong Daq Trôq de, en đăng dân, nŏq chaq sŭq tât en nhŭp siđŏh chĕq păch cồ gĕh tăm sŭng nuih talaq tamun nŏq. Heq cồ nggrăp sitil gĕh tăm u maq trong.20Hôm nggrăp sitil gĕh tăm lăp ntĕh tamô sarĕh nŏq cồ tamun chăng camvŭm Cô Voq en sŏng lăm nŏq wŏq camvŭm nŏq bây nuih talaq vui hơn;21cồ canŏq nĕh nŏq đăng gĕh rayĕh sŭng nơm, en gŭq gĕh ayh du ndêt; canŏq en lăm pŏh păt ha lŏh sat văt tât payh ơ con trong Cô Voq, nŏq nĕh vông hlŏq lawân.22Hôm nggrăp sitil gĕh tăm sŭng khây bưl loq, heq cồ tamun chăng camvŭm Cô Voq, sŭng lăm sinlơ jăl wăl sĭq dưnya heq en sinlơ gan'hăp jina palôm mvâr ôp an con trong Cô Voq nŏq đăng hao măq truh en nĕh jêng đăng jêng gayh.23Vrêq heq nggrăp sitil cồ gĕh vrŏh u vlơ ntĕh yăh, nŏq cồ tamun chăng camvŭm Cô Voq en dân gĕh, nĕh nŏq nhâng an lŭh play jo en du nggrăp dĕh lŭh du rayĕng palang, du jêng prau jât, en du jêng pe jât.”24Siđăch pơq lŭh a vôq khây nĕh du camvŭm prŭp ndây, pành: “Daq Trôq gĕh prŭp dân ca du mvu vrŏh sitil yăh sŭng mơ nơm de.25Cồ canŏq sŭng lăm vu vĭq, tamun chŏl sĭq vlâq nĕh tât en vrŏh canji hwang lăp sŭng mơ va en saq ntrăch.26Lăm tơm va hao măq en lŭh ncao, nŏq canji hwang khoi gĕh pri lŭh.27Lăm vrêq, khây dĭch năc nơm mơ nŏq de, lăm saq tât, gĕh nhai bây nĕh: ‘Ơ cô nơm nhi, đăng gal cô gĕh swây sitil yăh sŭng mơ nơm de uy? Canŏq canji hwang lŭh u vi lây?’28A heq nơm nhi nhai bây khây nĕh: ‘Du mvu tăm chŏl gĕh ôp vrŭq heq.’ En khây dĭch năc nhai bây nĕh: ‘Canŏq, cô gĕh cơnh lăm saq lŭh nŏq, khananh rơq lĕq canji nŏq hẩng?’29Cồ canŏq nơm nhi âh: ‘Vâng, phŭng sŭng lăm rơq canji hwang, khamay rơq tơm va lawân bây canji hwang nggưt.30Căh chĕq an lĕq var maq gĕh tăm hao măq an tât lăm jwŏq, en sŭng lăm jwŏq, ănh săng khây tamun jwŏq: Lor lĕq, vatom canji hwang sĭq vlâq en tănchăp khây nĕh lŭh a poq chĕq sŏh khây nĕh chĕq, cồ canŏq, căh vatom va lăp sŭng nâm ănh de.’”31Siđăch pơq lŭh a vôq khây nĕh du camvŭm prŭp ndây, pành: “Daq Trôq nŏq dân ca du nggrăp pai savi cồ lăm nhŭp, du mvu gĕh swây sŭng mơ nơm de;32en nggrăp sitil nŏq pành cồ ken dông lĕq sŭng lĕq khây sinlơ nggrăp, cồ canŏq lăm nĕh hao măq, nĕh măq dông khây sinlơ chhơ sŭng rông en gĕh jêng du tơm chhơ, chĕq tât daq sŭm khlang păr tât bây ôp nsôm vlơ khây singging nĕh de.”33Siđăch đơm an khây nĕh du camvŭm prŭp ndây: “Daq Trôq dân ca tape cồ lăm nhŭp, tamun ur văt valâm bây pe goq vanĭh an tât lăm lĕq vanĭh lĭq hao.”34Siđăch Yêsu gĕh nhai ăp sinlơ nŏq bây mintan con văl a camvŭm prŭp, en Nĕh đăng nhai sinlơ lây bây khây nĕh nŏq đăng don camvŭm prŭp,35Ôp bơh năm an camvŭm cồ gĕh nhai găn cô tiêng tri gĕh jêng, pành: “Ănh gĕh pơq mŭnh Ănh a khây camvŭm prŭp. Ănh gĕh nhai lŭh khây sinlơ cồ gĕh prăp sưt a lăm tatao dưnya.”36Alưr nŏq, lăm saq ntrăch mintan con văl gŏq săq, Siđăch saq lăp nhi. Khây con tuyh Siđăch de tât mơch Nĕh, nhai: “Wĭnh nhai dân an khananh camvŭm prŭp sĭq canji hwang sŭng mơ.”37Vrêq heq, lăm âh camvŭm, Siđăch nhai: “Nĕh cồ vrŏh sitil yăh cồ Con Tamun,38en mơ nŏq cồ dưnya, hôm sitil yăh — heq cồ con sinau Daq Trôq. Palâq sĭq vlâq, canji hwang cồ con sinau văl chin'hâc de,39en tamun chŏl, cồ tamun gĕh vrŏh canji nŏq, cồ chaq sŭq. Hôm khây jwŏq va nŏq cồ năr chôch dưnya, en khây tamun jwŏq cồ khây con gŭn.40Canŏq, canji hwang gĕh vatom sĭq vlâq en gĕh sŏh sŭng ŭnh bơh năm, nŏq vrŭq khoi gĕh ôp lŭh canŏq sŭng dŏq chôch dưnya.41Con Tamun sẽ pađăr khây con gŭn nơm de, en khây nĕh vatom lŭh ntrăch Daq Trôq Siđăch de lĕq khây păch cồ ôp tachĭh jâng nggâm khây tamun ôp vrŭq đăng ravwŏq.42En khây con gŭn hwât khây nĕh lăp sŭng tanlô ŭnh, cồ gatŭq gĕh sinlơ nhim rơp bây kiêr sêch.43Lăm nŏq, khây tamun yăh sŏng silang sindraq dân ca măt năr sŭng Daq Trôq Vap khây nĕh de. Vu lây gĕh tôr, căh chăng.”44“Daq Trôq dân ca păch caya gĕh tâp sŭng du lôq mơ, en du mvu tĭq lăm wŏng sây păch caya nŏq tăm pôn chĕq. Lŭh a sinlơ vui hơn nơm de, nĕh nŏq hao trong, tăch lĕq jrŏh khây păch cồ nơm gĕh en vro lôq mơ nŏq.45Hôm wŏq, Daq Trôq dân ca du mvu, cồ tamun tăch vro saq wŏng gŏch yăh chhât jên.46Canŏq en, lăm wŏng vlam du nggrăp gŏch yăh chhât jên, nŏq lăm lŭh saq, nĕh tăch lĕq jrŏh khây păch cồ nĕh gĕh en vro gŏch nŏq.47Hôm wŏq, Daq Trôq dân ca du lâm yŭq gĕh hwât jưr daq lênh en đưc hao lôch khây sinlơ,48en lăm yŭq vênh ca en, vu đưc lăp vâr daq, en lăm gŭq jưr, khây nĕh vatom khây păch yăh chĕq lăp sŭng gasop vadâng, hôm khây păch đăng yăh, vu hwât lŭh ling.49Ăp vrŭq gĕh dân canŏq sŭng dâq chôch dưnya: Lăm nŏq khây con gŭn saq lŭh, en paklăh văl chin'hâc lŭh ntrăch a sŭng khây tamun yăh sŏng,50en con gŭn hwât khây nĕh nŏq lăp tanlô ŭnh, cồ gatŭq gĕh sinlơ nhim rơp bây kiêr sêch.51Pôp ŏh gĕh dân lĕq khây sinlơ heq hôm?” Khây con tuyh âh bây Siđăch: “Gĕh dân.”52Vrêq heq, Siđăch nhai bây khây nĕh: “Payh ơ vrŭq heq, ăp gru pađau ravwŏq gĕh pađau an gưt sĭq Daq Trôq, nŏq nĕh dân ca du mvu nơm nhi, cồ tamun nhŭp lŭh păch dâm bây păch me u sŭng nâm nơm de.”53Vrŭq gĕh ôp lŭh nŏq cồ lăm Siđăch Yêsu nhai sŏng khây camvŭm prŭp heq, Siđăch saq ntrăch a gatŭq nŏq.54Lăm sĭq tât palây mê dĕh nơm de, Siđăch pađau tămti con văl sŭng nhi vatom khây nĕh de, tât daq ôp an khây nĕh chăng camhŏq bây nhai: “Sinlơ vanŏh heq nggâm khây păch chin'hâu a tamun heq lŭh u vi lây?55Đăng gal Nĕh heq cồ con klô tamun ôp mvưt mvơ chhơ uy? Đăng gal mê Nĕh gĕh cuôl pành Ma-ri, en khây ŏh klô Nĕh de cồ Ya-cơ, Yô-sep, Si-môn nggâm Yu-đe uy?56Đăng gal lĕq khây ŏh ur Nĕh de khoi gŭq bây vơn heq uy? Canŏq, ăp vrŭq heq cồ Nĕh gĕh lŭh a vi lây?”57En khây nĕh tachĭh jâng payh ơ Siđăch, cồ canŏq Siđăch Yêsu nhai bây khây nĕh: “Tiêng tri đăng gĕh vu deng dêh hôq, ayh u palây mê dĕh nơm de bây sŭng caniêp nơm de deng dêh vŏq.”58Siđăch đăng ôp gŏq păch chin'hâu u nŏq payh ơ nuih talaq đăng tôq khây nĕh de.
FAR EAST BROADCASTING COMPANY