Mark8
1Sŭng ăp năr nŏq, du dâq wŏq gĕh du mintan con văl gŏq săq lŭng, en đăng gĕh păch lây chĕq sa, alưr cuôl khây con tuyh nơm en, Siđăch nhai bây khây nĕh:2“Ănh sây sinđach con văl heq, mvăc khây nĕh gŭq wân bây Ănh gĕh pe năr en nŏq ndŏh gĕh păch lây chĕq sa lĕq.3Hê Ănh săng khây nĕh saq sĭq nhi nơm bây talaq pangot, nŏq khây nĕh nhâng chưt lawât bây trong, nŏq gĕh gŏq ndu sŭng khây nĕh gĕh tât a vi ngai lŭng.”4Khây con tuyh Siđăch âh bây Siđăch pành: “Du ndu tamun lây u heq, u tŭq tamăn singot heq, sŏq gĕh a vi lây chĕq an văl ganơ caheq sa bănh di gĕh?”5Siđăch lŭp khây nĕh: “Pôp ŏh gĕh n'gŏq lâm bănh?” Khây nĕh âh: “Pâh lâm.”6Yêsu săng con văl gŭq jưr u ntĕh, en alưr nhŭp pâh lâm bănh, may mo, Siđăch pêch lŭh en dơp an khây con tuyh nơm chĕq khây nĕh tăm paq, canŏq khây nĕh văt lŭh an con văl.7Bây khây nĕh gĕh takiq lâm con ca ken, nŏq alưr may mo sĭq ca nŏq en, Siđăch săng khây nĕh nhâng tăm paq ca nŏq wŏq.8Văl ganơ sa nŏq gĕh hơm lĕq, En khây nĕh dônh gĕh pâh la-i bănh lêch hôm canăh.9Lăm nŏq, gĕh mơch puôn ramvu ndu, en Siđăch an khây nĕh sĭq.10Sưmmrât, alưr saq lăp sŭng duq bây khây con tuyh nơm, Siđăch saq tât palây Đa-ma-nu-tha.11Khây tamun Pha-ri-si tât nŏq en saq tăm cammlăh bây Yêsu, cơnh wŏng u Yêsu du păch chin'hâu a vlơ trôq, chĕq long găn Siđăch.12Alưr tanâm jong sŭng rup swan nơm, Siđăch âh: “Lŭh nđuôi heq cơnh wĭnh sây păch chin'hâu canŏq? Nhâng, Ănh nhai bây khamay đăng gĕh păch chin'hâu lây cồ gĕh paq an nđuôi heq …”13En lăm saq ntrăch khây nĕh en, saq lăp sŭng duq wŏq, Siđăch saq tu vâr daq maq tŏq.14Khây con tuyh hŭch chĕq văt bănh bây, en khây nĕh đăng gĕh păch lây bây nơm sŭng duq, ayh du lâm bănh ngăn.15Siđăch pađau ca'hya khây nĕh pành: “Căh jơ nơm! Căh sên di dân sĭq tape tamun Pha-ri-si de bây tape Hê-rôt de.”16Khây nĕh tăm nhai bây ndăng ganai pành vrŭq heq cồ mvăc khây nĕh đăng gĕh bănh.17Mvăc gưt canŏq, Siđăch Yêsu nhai bây khây nĕh: “Lŭh pôp ŏh tăm cammlăh sĭq vrŭq pôp ŏh đăng gĕh bănh? Pôp ŏh hôm ndŏh chăng gĕh, bây nhâng ndŏh gưt hà? Gĕh gal nuih talaq pôp ŏh jêng kranh en?18Gĕh măt lŭh Pôp ŏh êq sây? Gĕh tôr lŭh pôp ŏh êq chăng? Pôp ŏh khoi đăng căh tôr hàh?19Lăm Ănh pêch prăm lâm bănh chĕq an prăm ramvu ndu tamun, pôp ŏh dônh gĕh vagŏq la-i vênh bănh canăh?” Khây nĕh âh bây Siđăch: “Mât var la-i.”20“En lăm pâh lâm bănh an puôn ramvu ndu tamun, pôp ŏh dônh gĕh vagŏq la-i vênh bănh canăh?” Khây nĕh âh bây Siđăch: “Pâh la-i.”21En Siđăch nhai bây khây nĕh: “Ôp canŏq caheq lŭh pôp ŏh hôm ndŏh gưt?”22Khây nĕh saq tât Bêt-sai-đa, en vu văt tât an Siđăch du mvu khlông măt, en khây nĕh wĭnh Siđăch chĕq Siđăch rapâq tât nĕh.23Nhŭp ti tamun khlông măt, Siđăch têch nĕh lŭh ling palây, alưr vrăch daq ju vlơ măt nĕh, chĕq ti nơm vlơ nĕh, Siđăch lŭp nĕh: “Pôp gĕh sây păch lây đăng?”24Tămhơch hao vlơ, nĕh âh: “Ănh sây vu nŏq khây nĕh sên dân ca chhơ cala cồ saq.”25En nŏq, du dâq wŏq, Siđăch chĕq ti u măt nĕh, en nĕh sên mŏq mŏq, măt nĕh yăh silang vlâq bây nĕh sên sây ăp sinlơ yăh dân lŭng.26Siđăch săng nĕh saq sĭq nhi nĕh, pân ca'hya: “Vâng saq lăp sŭng palây.”27Siđăch Yêsu bây khây con tuyh Nĕh saq lăp ăp sŭng palây sĭq ntĕh Sê-sa-rê Phi-lip, en vlơ trong saq, Siđăch lŭp khây con tuyh nơm, nhai bây khây nĕh pành: “Vu nhai Ănh ade vu lây?”28En khây nĕh nhai bây Siđăch, âh pành: “Yăng Bap-tit, gĕh ndu nhai ‘Ê-li,’ hôm tamun krây wŏq cồ: ‘Muôi sŭng khây nhi tiêng tri.’”29Siđăch lŭp khây nĕh: “Hôm pôp ŏh nhai Ănh ade vu lây?” En lăm âh mŭnh, Phi-e-rơ âh bây Siđăch: “Gru cồ Siđăch Yơt Con Tamun.”30Siđăch pân ca'hya khây nĕh pành khây nĕh đăng gĕh nhai bây vu lây sĭq Siđăch.31En Siđăch saq pađau khây nĕh pành Con Tamun gĕh vlam gŏq sinlơ lŏh sat, vlam khây cô camvĭnh hwât rabăh, khây sipăm măq bây khây gru pađau ravwŏq, en vu tachưt, en ntrăch pe năr tao rĭh sĭq vlâq.32Siđăch gĕh nhai camvŭm heq nĕh dân lŭng. Phi-e-rơ, alưr iau Siđăch lŭh ayh en, nŏq saq vuôi Siđăch.33Nŏq, lăm saq pale sĭq vlâq sên khây con tuyh nơm, Siđăch chih lăh Phi-e-rơ pành: “Ơ satan, saq lŭh ngai a can'hâm Ănh! Mvăc may đăng chĕq nuih talaq nơm sinâng tât vrŭq Cô Voq de, nŏq ayh sinâng tât vrŭq con tamun.”34Alưr cuôl con văl bây khây con tuyh nơm, Siđăch nhai bây khây nĕh: “Hê vu lây cơnh saq alưr Ănh, tamun nŏq căh hwât chĕq nơm, tung chhơ pagăn nơm en nŏq saq bây Ănh.35Mvăc hê vu lây cơnh yơt sinlơ hôm mrĭh nơm, nŏq nhâng ôp pachĕq nĕh, hôm vu lây cồ tơm a Ănh bây Sinlơ Yăh cồ gĕh pachĕq sinlơ hôm mrĭh nơm, nŏq nhâng yơt gĕh nĕh.36Nŏq wŏq gĕh păch lây an tamun gĕh lĕq sŭng dưnya en nŏq ôp pachĕq wênh nggui nơm?37Tamun nŏq gĕh sŏq păch lây dân ca păch tăm gâl bây wênh nggui nơm de?38Hê vu lây prênh tôr sĭq ănh bây camvŭm Ănh je sŭng nđuôi bưn bap bây chhŭq chhau heq, nŏq Con Tamun nhâng gĕh prênh tôr sĭq tamun nŏq lăm Siđăch saq tât sŭng sindraq sindil Vap Nĕh de bây khây con gŭn yăh soch jrŏh.”
FAR EAST BROADCASTING COMPANY