Luke7
1Alưr lăm Yêsu lu pâh ăp camvŭm pađau nơm de u vôq sinlơ chăng iêt văl ganơ de, Yêsu saq lăp palây ca-bê-na-um.2Lăm nŏq, du mvu dĭch năc nŏq dĭch cô var de, nŏq cồ tamun nĕh sinđach lŭng, tăm văc ji râng njŏq lŭng, mơch chưt.3Alưr lăm chăng sĭq Siđăch Yêsu, nĕh săng khây camvĭnh măq Yo Thai saq tât Yêsu, wĭnh Yêsu tât chĕq Nĕh ranăm an dĭch nơm nĕh de.4Lăm khây cô camvĭnh tât bây Yêsu, khây nĕh lĕq nuih talaq côt kĕh Yêsu, wĭnh pành: “Cô var heq tamun yăh chĕq gru ôp vrŭq yăh an nĕh,5mvăc nĕh gưt sinđach văl ganơ vơn, nĕh khoi ôp du rot nhi vatom an vơn.”6En mŏh, Siđăch Yêsu saq bây khây nĕh. Sŭng lăm Yêsu lĕq mơch gatŭq nhi đăng hôm ngai uy, aheq cô var panh takiq ndu ganai yăh nĕh tât nhai bây Yêsu: “Cŭh Siđăch, wĭnh vâng ôp an nơm n'hyoq vầy, mvăc ănh heq đăng cồ rom yăh chĕq wŏq Yêsu saq tât nhi nơm.7Payh canŏq, ănh tât daq khoi đăng sây nơm gĕh rom yăh lây chĕq tât vlam Yêsu. Cồ canŏq, wĭnh Cô nhai du vŭm, nŏq dĭch ănh gĕh yăh.8Mvăc ănh khoi cồ tamun gĕh chĕq gŭq a can'hâm vu ndây, en gĕh congti a can'hâm ănh wŏq, bây ănh săng nĕh heq: ‘saq sô,’ nŏq nĕh saq; săng vu ndây: ‘Tât heq,’ nŏq nĕh tât; bây sĭq dĭch năc ănh: ‘Sô ôp păch heq,’ nŏq nĕh ôp.”9Lăm Siđăch Yêsu chăng canŏq, Yêsu sây krăq krây lŭng sĭq nĕh, en pale vlâq bây mintan văl jăt saq bây nơm, Yêsu nhai: “Ănh nhai bây pôp ŏh, payh lĕq u sŭng I-sơ-ra-ên, ănh ndŏh sây sinlơ tôq camvân măq canŏq!”10Lăm khây tamun cồ gĕh pađăr lŭh saq sĭq tât nhi, khây nĕh sây dĭch nŏq yăh camhlăng en.11Vrŭq sẫy lŭh lăp sŭng năr alưr, Yêsu saq tât du palây cuôl pành Na-in, khây con tuyh Yêsu bây du mintan con văl saq simơ bây Siđăch.12Sŏng lăm Yêsu mơch tât lapông palây choh sên tĭq, vu tung lŭh du mvu chưt èn, cồ con klô di muôi mê nĕh de (un cồ ur mrô), du mintan văl gŏq săq sŭng palây saq simơ bây un nŏq.13Lăm deng sây ur nŏq, Siđăch lêch nuih sinđach sĭq nĕh, bây nhai pawal nĕh: “Vâng nhim vầy.”14Saq tât mơch, Yêsu chĕq ti lăp dor, nŏq khây tamun cồ tung tao yăq mŏq. En Yêsu nhai: “Ơ klô dlu, ănh săng nơm, sô tao gŭq.”15Tamun chưt pruh tao gŭq bây nhai păch, en Yêsu dơp nĕh an mê nĕh.16Mŏh aheq, sinlơ phŭng candŭh jôm lam lĕq săq, khây nĕh payom Cô Voq, nhai pành: “Du candranh tiêng tri măq mi tât gŭq bây vơn” bây pành: “Cô Voq gĕh păng mơq văl Siđăch!”17Vrŭq sĭq Yêsu heq nhai lam sŭng ntĕh Yu-đê nggâm lam palây rawênh nŏq.18Khây con tuyh Yăng de nhai sĭq vlâq an nĕh sĭq khây vrŭq nŏq. En alưr lăm săng cuôl var ndu con tuyh tĭq nơm de, nŏq Yăng19săng khây nĕh tât bây Yêsu, lŭp: “Gru gal cồ Candranh tât èn, ha khananh câp Candranh ndây?”20Lăm saq tât Yêsu, khây nĕh nŏq nhai: “Yăng Bap-tit săng khananh tât bây gru, lŭp: ‘Gru gal Candranh cồ tât ha khananh câp nggơ Candranh ndây?’”21Sŏng lăm dâq nŏq, Yêsu ranăm yăh gŏq ndu ntrăch a cannwe, ji râng nggâm chaq khlâm, Siđăch khoi ôp an gŏq ndu jingo măt deng sây.22Chĕq âh camvŭm, Yêsu nhai bây khây nĕh: “Alưr lăm palâq sĭq, căh nhai vlâq an Yăng gưt khây vrŭq khây pôp gĕh sây bây gĕh chăng: tamun jingo măt gĕh silang, tamun cannwe gĕh saq, tamun rawŏq ramanh gĕh jrŏh, tamun tĭq tôr gĕh chăng, tamun chưt gĕh rĭh sĭq vlâq, tamun lŏh gĕh chăng Sipơp Yêsu,23bây yăh an vu lây đăng vông nuih sĭq ănh.”24Tât alưr nŏq, lăm khây tamun Yăng de sĭq en, Yêsu pơq nhai bây con văl sĭq Yăng: “Pôp ŏh saq lăp tât tamăn singot chĕq sên păch lây? Du tơm wang cồ chhal khlôm lănggưn hàh?25Palâq vlâq, pôp ŏh saq lŭh sên păch lây? Du ndu gĕh sŏq tachuq a cŭmvai yăh rom hàh? Sên tĭq, khây tamun u sŭng du păng ao mphla yăh rom gĕh chuq bây rĭh palay jên caih ayh cồ gŭq sŭng nhi vatau.26Payh canŏq, pôp ŏh saq lŭh sên păch lây? Du mvu tiêng tri hàh? Gal èn, ănh nhai bây pôp ŏh, cồ vlơ a du mvu tiêng tri wŏq.27Payh pành sĭq nơm nĕh en camvŭm heq gĕh chêr: ‘Heq, Ănh săng dĭch ănh je saq lor a vôq măt Con,nĕh păh waih trong Con de u vôq măt Con.’28Ănh nhai an pôp ŏh di gưt, u sŭng lĕq khây tamun cồ tamun ur dĕh lŭh, đăng gĕh vu lây măq vlơ a Yăng, en nĕh cồ ken dông lĕq u sŭng daq Cô Voq nĕh măq vlơ Yăng wŏq.”29(Lăm gĕh iêt chăng, nŏq ăp ndu, lawân cồ khây tamun wŏq pâng ya, ayh nhai pành Cô Voq yăh sŏng lŭng, lăm wŏq vrŭq ŭm vôq bây sinlơ ŭm vôq ju Yăng.30En khây tamun Pha-ri-si bây khây gru tămti ravwŏq đăng wŏq sinlơ yăh Cô Voq de an nơm iưn, lăm đăng chĕq Yăng ŭm vôq.)31“Canŏq, ănh tăm wĕh khây tamun sŭng nggơih heq prŭp bây păch lây? Khây nĕh dân ca vu lây?32Khây nĕh dân ca con se gŭq u tŭq tăch vro, cuôl panh ndăng ganai, khây nĕh nhai: ‘Khananh ŭh camvuôt an khamay en khamay đăng tao răm? Khananh adŏh vau rơp en khamay đăng rơp nhim?’33Mvăc Yăng Bap-tit gĕh tât èn, đăng sa bănh, đăng huch sĕh alăc, aheq khamay nhai: ‘Nĕh cồ tamun chaq khlâm.’34Con Tamun gĕh tât, sa bây huch, nŏq khamay nhai: ‘Sên tĭq, du mvu nroq sa bây can'hir huch, ndăng ganai sŭng nrang nhŭp pâng ya nggâm tamun gĕh bưn bap!’35En sinlơ vanŏh gĕh ôp di candân payh ju khây ŏh con nơm de.”36Lăm nŏq, muôi sŭng khây tamun Pha-ri-si panh Yêsu sa war bây nĕh. Lăm saq lăp sŭng nhi tamun Pha-ri-si nŏq, Yêsu gŭq u gatŭq sa war.37Sên tĭq, gĕh du mvu ur sŭng palây, ur heq uĕh ôp bưn bap. Lăm gưt pành Yêsu gŭq tŭq sa war u nhi Pha-ri-si de, nĕh văt bây du sitôq a gŏch vadâng jrơu nthôr,38en tât tao yăq alưr, mơch tŭq jâng Yêsu, nĕh nhim. Nĕh ôp suh jâng Yêsu de a daq măt nơm, en nĕh jut jâng a sŏq vlơ vôq nĕh, thơp jâng Yêsu bây văng jrơu nthôr wŏq.39Lăm tamun Pha-ri-si, nĕh cồ panh Yêsu, sây canŏq, nĕh sinâng sŭng vôq, pành: “Hê nĕh heq nhâng cồ tiêng tri, nŏq nĕh mŏh dân gưt tamun ur cồ rapâq u nơm ade vu lây, pành ur nŏq cồ tamun bưn bap.”40Chĕq âh camvŭm, Siđăch Yêsu nhai bây nĕh: “Si-môn, ănh gĕh vrŭq heq chĕq nhai bây cô.” Nĕh âh: “Ơ gru, wĭnh nhai vồh.”41“Gĕh var ndu tăm văc se du ndu nĕh cồ an nham nŏq. Du mvu tăm văc prăm rayĕng đơ-ni-ê, en du mvu tĭq tăm văc prăm jât.42Lăm khây nĕh ayh đăng gĕh chĕq trŏh se, nĕh cồ an chwâl an lawân var ndu iưn. Canŏq, vu lây sŭng var ndu nŏq sinđach nĕh gŏq dông?”43Lăm Si-môn dơp lŭh camvŭm âh, nĕh nhai: “Bây ănh sinâng pành nĕh cồ tăm văc se gŏq dông.” Yêsu nhai bây nĕh: “Pôp sinâng nhai gal lŭng.”44En pale tâu tamun ur nŏq, Yêsu nhai bây Si-môn: “Cô sây tamun ur heq hâng? Ănh lăp sŭng nhi cô. Cô đăng an ănh daq chĕq rao jâng, en nĕh ôp suh jâng ănh a daq măt, en jut jâng a sŏq nĕh de.45Cô đăng an ănh du phêp thơp lây, en ur heq, alăm ănh lăp nhi, đăng cồ lu phêp jâng ănh.46Cô đăng văng jrơu nthôr vlơ vôq ănh, en nĕh văng jâng ănh a jrơu nthôr.47Payh canŏq, ănh nhai bây cô, bưn bap ur heq, cồ gŏq, gĕh hwât lĕq en, mvăc nĕh gưt sinđach gŏq. En vu cồ gĕh hwât takiq nŏq sinđach takiq.”48En Yêsu nhai bây ur nŏq: “Bưn bap pôp de gĕh hwât lĕq en.”49Khây tamun cồ gŭq sa simơ pơq camvŭm tăm nhai sŭng ndăng ganai: “Nĕh heq a de vu lây lŭh pành hwât bưn bap?”50En Yêsu nhai bây tamun ur nŏq: “Sinlơ tôq camvân pôp de yơt pôp. Nŏq saq sŭng sinlơ iên yăh.”
FAR EAST BROADCASTING COMPANY