John15
1“Ănh heq cồ tơm ramvu nhâng, en Vap Ănh cồ tamun tăm ramvu.2Lăm singging lây sŭng Ănh đăng lŭh play, nŏq Vap hwât nĕh lŭh; hôm singging lây lŭh play, nŏq Vap khlĕh singging nŏq chĕq nĕh lŭh play gŏq dông.3Don a camvŭm cồ Ănh gĕh nhai pađau an pôp ŏh, nŏq pôp ŏh gĕh jrŏh.4Căh gŭq diêt sŭng Ănh, en Ănh sŭng pôp ŏh. Dân ca singging ramvu nơm nĕh đăng an lŭh play gĕh hê nĕh đăng gŭq diêt sŭng tơm ramvu, en khoi canŏq, nơm pôp ŏh khoi đăng an lŭh play gĕh hê pôp ŏh đăng gŭq diêt sŭng Ănh.5Ănh cồ tơm ramvu, pôp ŏh cồ singging. Vu lây gŭq diêt sŭng Ănh en Ănh sŭng nĕh, nŏq nĕh an lŭh gŏq play jo, mvăc lăm paklăh lŭh a Ănh, pôp ŏh đăng ôp gĕh păch lây lĕq.6Hê vu lây đăng gŭq diêt sŭng Ănh, vu nŏq bị hwât lŭh tu ling dân ca singging ro, vu dônh vatom nĕh en hwât lăp sŭng ŭnh, en ŭnh sa nĕh lĕq jrŏh.7Hê pôp ŏh gŭq diêt sŭng Ănh, en camvŭm Ănh de gŭq diêt sŭng pôp ŏh, căh wĭnh păch lây cồ pôp ŏh cơnh, en păch nŏq gĕh ôp an pôp ŏh8Vap Ănh gĕh payom tapơ sŭng vrŭq heq, nŏq cồ lăm pôp ŏh lŭh gŏq play jo en pôp ŏh gĕh jêng con tuyh Ănh de.9Dân ca Vap gĕh sinđach Ănh bơh năm, nŏq Ănh khoi sinđach pôp ŏh dân canŏq. Căh gŭq diêt sŭng sinlơ sinđach Ănh de.10Hê pôp ŏh jơ khây ravwŏq Ănh de, nŏq pôp ŏh gĕh gŭq diêt sŭng sinlơ sinđach Ănh de, dân ca Ănh gĕh jơ khây ravwŏq Vap de bây gŭq diêt sŭng sinlơ sinđach Nĕh de.11Ănh gĕh nhai khây sinlơ heq an pôp ŏh, chĕq sinlơ vui hơn Ănh de gŭq sŭng pôp ŏh, en sinlơ vui hơn pôp ŏh de gĕh lôch lam.12Heq cồ ravwŏq Ănh de, nŏq cồ pôp ŏh tăm sinđach ndăng ganai dân ca Ănh gĕh sinđach pôp ŏh.13Đăng gĕh vu lây gĕh sinlơ sinđach măq vlơ caheq — nŏq cồ vrŭq du mvu patăq sinlơ rĭh nơm de chĕq ala an khây ganai nĕh de.14Pôp ŏh cồ ganai yăh Ănh de hê pôp ŏh ôp khây sinlơ cồ Ănh pân pađau an pôp ŏh.15Ănh đăng cuôl pôp ŏh cồ dĭch năc wŏq, mvăc dĭch năc đăng gưt vrŭq ôp nơm nhi nĕh de. Palâq sĭq vlâq Ănh gĕh cuôl pôp ŏh cồ ganai yăh, mvăc ăp vrŭq cồ Ănh gĕh chăng u Vap Ănh, nŏq Ănh pơq lŭh an pôp ŏh gưt.16Đăng gal pôp ŏh săch sŏq Ănh, palâq sĭq vlâq Ănh săch sŏq pôp ŏh bây iơq pôp ŏh hao, chĕq pôp ŏh saq, lŭh play, en play pôp ŏh de hôm sĭq vlâq, chĕq lĕq khây vrŭq lây cồ pôp ŏh cuôl săq Ănh ngwân wĭnh bây Vap, nŏq Nĕh paq an pôp ŏh iưn.17Ănh pađau tămti an pôp ŏh khây camvŭm heq chĕq pôp ŏh tăm sinđach ndăng ganai.18Hê dưnya ncom pôp ŏh, nŏq căh gưt pành dưnya gĕh ncom Ănh lor pôp ŏh.19Hê pôp ŏh sĭq maq dưnya heq, nŏq dưnya nhâng bâng sinđach tamun cồ sĭq maq nĕh. A heq mvăc pôp ŏh đăng sĭq maq dưnya, palâq sĭq vlâq, Ănh gĕh săch sŏq pôp ŏh u sŭng dưnya, payh canŏq dưnya ncom pôp ŏh.20Wĭnh căh sĭq vlâq camvŭm cồ Ănh gĕh nhai bây pôp ŏh: ‘Dĭch năc đăng măq vlơ nơm nhi nĕh de.’ Hê khây nĕh pagơq Ănh, nŏq khây nĕh khoi pagơq pôp ŏh; hê khây nĕh jơ camvŭm Ănh, nŏq khây nĕh khoi jơ camvŭm pôp ŏh de.21Canŏq payh ơ săq Ănh de, khây nĕh ôp ăp vrŭq an pôp ŏh, mvăc khây nĕh đăng gưt Candranh cồ săng pađăr Ănh tât.22Hê Ănh đăng tât bây nhai tăm ti an khây nĕh, nŏq khây nĕh đăng gĕh bap, hôm vrêq heq, khây nĕh đăng hôm gĕh păch lây chĕq cŏh king an bưn bap khây nĕh de.23Tamun cồ ncom Ănh nŏq khoi ncom Vap Ănh wŏq.24Hê Ănh đăng ôp sŭng khây nĕh khây vrŭq cồ đăng gĕh vu lây ôp gĕh, nŏq khây nĕh đăng gĕh bap, sŭng lăm u heq khây nĕh gĕh sây, en hôm ncom lawân Ănh nggâm Vap Ănh.25Vrŭq canŏq chĕq an gĕh jêng gayh camvŭm cồ gĕh chêr sŭng ravwŏq khây nĕh de pành: ‘Khây nĕh ncom Ănh đăng gĕh tơm tu.’26Lăm Candranh Pawal Nuih tât, nŏq cồ Candranh u vi Vap cồ Ănh gĕh pađăr tât an pôp ŏh — cồ Gŭn Dip gal lŭh a Vap — Nĕh sẽ ôp candân sĭq Ănh.27En pôp ŏh khoi ôp candân wŏq, mvăc pôp ŏh gŭq bây Ănh a lăm daq vôq.”
FAR EAST BROADCASTING COMPANY