John13
1Lăm vrêq, Lor a Lễ Saq Ntrăch, Siđăch Yêsu gưt pành vadâq Nĕh de tât en, chĕq Siđăch lŭh ntrăch a dưnya heq saq sĭq bây Vap. Lăm sinđach khây tamun sĭq maq nơm sŭng dưnya heq, nŏq Siđăch sinđach khây nĕh an tât chôch.2Sŭng lăm sa war mau, lăm chaq camhôch chĕq lăp nuih talaq Yu-đa Ich-ca-ri-ôt, con klô Si-môn en, chĕq nĕh châl sĭq vlâq Siđăch,3mvăc gưt pành Vap gĕh dơp lăp sŭng ti Nĕh ăp vrŭq, bây gưt pành Nĕh tât a Siđăch Trôq en mơch sĭq vlâq bây Siđăch Trôq,4nŏq Siđăch tao yăq ntrăch a war sa, đŏh ao ling. En alưr lăm nhŭp nseng, Nĕh păt rawênh nơm Nĕh.5En nŏq, Siđăch tŭh daq lăp chơng vadâng en pơq vôq rao jâng khây con tuyh de bây jut jrŏh a nseng cồ nĕh gĕh păt rawênh nơm.6En nŏq, Siđăch tât vi Si-môn Phi-e-rơ. Nĕh nhai bây Siđăch: “Ơ Siđăch, Cô rao jâng ănh êh?”7Siđăch Yêsu âh sĭq vlâq en nhai bây nĕh: “Vrŭq Ănh ôp, vrêq heq pôp ndŏh dân, en alưr khây vrŭq heq, pôp nhâng dân gĕh.”8Phi-e-rơ âh bây Siđăch: “Gru nhâng bâng đăng lăm lây rao jâng con de pà.” Siđăch Yêsu âh sĭq vlâq nĕh: “Hê Ănh đăng rao an con, nŏq con đăng gĕh păch lây bây Ănh.”9Si-môn Phi-e-rơ nhai bây Siđăch: “Ơ Cô, đăng gal ayh jâng ănh de ngăn, heq hôm lawân ti bây camvôq ănh wŏq”10Siđăch Yêsu nhai bây nĕh: “Vu lây gĕh ŭm en nŏq đăng ôp canŏq wŏq, ayh rao jâng en, hôm nĕq nŏq gĕh jrŏh lĕq, en pôp ŏh gĕh jrŏh cồ canŏq đăng gal lĕq săq pôp ŏh.”11(Mvăc Siđăch gưt vu lây chŏl sĭq vlâq Nĕh, payh canŏq Siđăch gĕh nhai pành: “Đăng gal lĕq săq gĕh jrŏh lĕq.”)12Nŏq, lăm Siđăch rao jâng an khây con tuyh sŏng bây chuq ao ling nơm de lăp en, nŏq Siđăch gŭq jưr sĭq vlâq, nhai bây khây nĕh: “Pôp ŏh gĕh dân gĕh vrŭq cồ Ănh me ôp an pôp ŏh đăng?13Pôp ŏh cuôl Ănh pành ‘Gru’, bây pành ‘Siđăch’; pôp ŏh cuôl dip lŭng mvăc Ănh nhâng cồ canŏq.14Payh canŏq, hê Ănh, cồ Siđăch, bây cồ Gru, gĕh rao jâng an pôp ŏh, nŏq pôp ŏh khoi căh gưt rao jâng an ndăng ganai.15Mvăc Ănh gĕh chĕq rapui an pôp ŏh chĕq pôp ŏh khoi ôp dân ca Ănh gĕh ôp an pôp ŏh.16Nhâng, Ănh nhai nhâng bây pôp ŏh, dĭch năc đăng măq vlơ nơm nhi nĕh de; tamun gĕh pađăr saq khoi đăng măq vlơ a tamun cồ pađăr nơm.17Hê pôp ŏh gĕh gưt khây sinlơ heq, en pôp ŏh ôp bây khây sinlơ nŏq, nŏq pôp ŏh wŏq gĕh păch yăh.18Ănh đăng nhai sĭq lĕq săq pôp ŏh, mvăc Ănh gưt tamun cồ Ănh gĕh cuôl — cồ canŏq chĕq camvŭm Sirăq Gŭn gĕh jêng: ‘Tamun sa bănh bây Ănh iơq jâng nĕh de châl sĭq vlâq Ănh.’19A lăm heq, Ănh nhai an pôp ŏh lor a lăm vrŭq gĕh ôp lŭh, chĕq lăm vrŭq nŏq tât, pôp ŏh tôq pành Ănh nhâng cồ Candranh Hôm Wân Lawân.20Nhâng, Ănh nhai nhâng bây pôp ŏh, vu lây wŏq tamun lây cồ Ănh gĕh pađăr tât, là wŏq Ănh, en vu lây wŏq Ănh nŏq cồ wŏq Candranh cồ gĕh pađăr Ănh.”21Lăm nhai sŏng khây sinlơ nŏq, Siđăch Yêsu chăng jăl wăl sŭng wênh nggui, en Siđăch candân bây nhai: “Nhâng, Ănh nhai nhâng bây pôp ŏh, du mvu sŭng khây pôp ŏh mơch châl sĭq vlâq Ănh.”22Khây con tuyh tăm deng ndăng ganai, đăng gưt Siđăch nhai sĭq vu lây.23Lăm nŏq, muôi sŭng khây con tuyh siđăch Yêsu de, tamun cồ Siđăch sinđach, gŭq u maq nra sa, pănggơih lăp gatâh Siđăch Yêsu de.24Payh canŏq, Si-môn Phi-e-rơ ôp păch tayh an nĕh chĕq lŭp pành, “Tamun cồ Siđăch nhai tât nŏq cồ vu lây?”25Canŏq mŏh, lăm nkênh nơm u gatâh Siđăch Yêsu, nĕh nhai bây Siđăch: “Ơ Siđăch, nŏq cồ vu lây?”26Siđăch Yêsu âh: “Lăm plŏng vŭm bănh heq, en Ănh paq bănh nŏq bây dơp an tamun lây, en nŏq cồ nĕh.” Canŏq en, lăm plŏng vŭm bănh nŏq sŏng, Siđăch dơp an Yu-đa, cồ con Si-môn Ich-ca-ri-ôt de.27A lưr vŭm bănh nŏq, nŏq cồ lăm chaq Sa-tan khlâm lăp sŭng nĕh. Canŏq mŏh, Siđăch Yêsu săng nĕh: “Vrŭq cồ pôp cơnh ôp, ôp di jăc chĕq vồh.”28(Lăm nŏq, đăng gĕh vu lây cồ gŭq u nra sa gưt lŭh Siđăch nhai bây nĕh canŏq.29Mvăc var pe ndu sinâng pành, payh ơ Yu-đa jơ gathŏng jên, mŏh Siđăch Yêsu săng nĕh: “Saq vro khây păch chĕq don an năr lễ,” ha chĕq paq ndêt păch lây nŏq an tamun lŏh sat iưn.)30Hôm Yu-đa, lăm sŏq vŭm bănh en, nĕh pĭh păh lŭh saq. Lăm nŏq, cô lĕq jingo en.31Canŏq, lăm Yu-đa saq ntrăch en, Siđăch Yêsu nhai: “Vrêq heq, Con Tamun gĕh payom tapơ, en Siđăch Trôq gĕh payom tapơ u Nĕh.32En Siđăch Trôq payom tapơ Con Tamun sŭng nơm nĕh, en Siđăch payom tapơ Con Tamun sŏng lăm nŏq.33Ơ khây con rên, Ănh hôm gŭq bây pôp ŏh takiq năr wŏq vŏq. Pôp ŏh alưr nŏq saq wŏng Ănh, en dân ca Ănh gĕh nhai bây khây tamun Yo-thai pành: ‘Vi Ănh saq, khây cô đăng tât gĕh.’ Nŏq vrêq Ănh khoi nhai canŏq bây pôp ŏh.34Ănh paq an pôp ŏh du ravwŏq me, chĕq pôp ŏh căh gưt tăm sinđach ndăng ganai; dân ca Ănh gĕh sinđach pôp ŏh, chĕq pôp ŏh khoi gưt tăm sinđach ndăng ganai.35Hê pôp ŏh gĕh nuih talaq tăm sinđach ndăng ganai, payh ơ nŏq, ăp ndu gưt pành, pôp ŏh cồ con tuyh Ănh de.”36Si-môn Phi-e-rơ nhai bây Siđăch: “Ơ Siđăch, Cô saq vi lây?” Siđăch Yêsu âh camvŭm nĕh: “Gatŭq Ănh saq, vrêq pôp ŏh ndŏh saq bây Ănh gĕh, cồ canŏq alưr heq, pôp ŏh nhâng saq bây Ănh.”37Phi-e-rơ nhai bây Siđăch: “Ơ Cô, lŭh ănh đăng saq bây Cô gĕh sŏng lăm heq? Ănh cơnh patăq sinlơ rĭh ănh de payh ơ Siđăch!”38Siđăch Yêsu âh: “Con patăq sinlơ rĭh con de an Ănh êh? Nhâng, Ănh nhai nhâng bây con, nhâng iêr kwŏng đăng nrau an tât lăm con di mo Ănh pe dâq.”
FAR EAST BROADCASTING COMPANY