John11
1Lăm nŏq, gĕh du mvu nŏq ji, nĕh săq La-sa-rơ, u Bê-tha-ni, cồ palây Ma-ri bây pôp nĕh cồ Ma-thê de.2Hôm Ma-ri cồ tamun văng jrơu nthôr an Siđăch, en nhŭp sŏq nơm de jut jâng Siđăch, en pôp klô nĕh de săq La-sa-rơ cồ ji nŏq.3En nŏq, var ndu pôp ŏh don tamun tât nhai bây Siđăch pành: “Ơ Siđăch, heq Cô, nĕh cồ Siđăch sinđach vlam ji côr.”4A heq lăm chăng canŏq, Siđăch Yêsu nhai “Sinlơ Ji heq đăng gal vyăq tât daq chưt pà, cồ canŏq, payh ơ sinlơ sindraq sindil Cô Voq de, chĕq Con Siđăch Trôq gĕh vu tapơ don a vrŭq nŏq.”5(Siđăch Yêsu sinđach Ma-thê, ŏh ur nĕh de, bây La-sa-rơ.)6Payh canŏq, lăm Siđăch chăng pành La-sa-rơ vlam ji côr, cồ canŏq lăm nŏq Siđăch hôm gadưn sĭq vlâq var năr wŏq u gatŭq cồ Nĕh gŭq.7En nŏq, alưr vrŭq gadưn nŏq, Siđăch nhai bây khây con tuyh: “Vrêq vơn saq tât ntĕh Yu-đê du dŏq wŏq.”8Khây con tuyh nhai bây Siđăch: “Ơ gru, vrêq heq tamun Yo-thai hôm wŏng trong chĕq hwât tamô Cô, nŏq lŭh Cô hôm cơnh saq sĭq nŏq du dŏq wŏq?”9Siđăch Yêsu âh: “Đăng gal gĕh mât var vadâq sŭng dŭng năr uy? Hê vu lây saq sŭng dŭng năr, nĕh nŏq đăng tachĭh jâng vông hlŏq, mvăc nĕh deng sây gĕh sinlơ silang dưnya heq de.10Hôm hê vu lây saq sŭng dŭng măng, nĕh nŏq tachĭh jâng vông hlŏq, mvăc sinlơ silang đăng gŭq sŭng nĕh.”11Siđăch nhai canŏq, en a lưr nŏq, Siđăch nhai bây khây nĕh: “La-sa-rơ, cồ ganai vơn de, jru sŭng sinlơ vĭq en, cồ canŏq Ănh tât chĕq Ănh pre nĕh căh.”12Canŏq mŏh, khây con tuyh nhai bây Siđăch: “Ơ Siđăch, hê nĕh nŏq jru sŭng sinlơ vĭq, nŏq nĕh sẽ gĕh ŏh lai.”13(Cồ nhâng lăm nŏq Siđăch Yêsu nhai sĭq sinlơ chưt La-sa-rơ de, sŭng lăm khây tamun nŏq sinâng pành Siđăch nhai sĭq vrŭq lu lŏh a sinlơ vĭq.)14Payh canŏq, lăm nŏq Siđăch Yêsu nhai dân an khây con tuyh: “La-sa-rơ chưt en.15Ănh vui hơn mvăc sinlơ yăh pôp ŏh de payh ơ Ănh đăng gĕh măt u nŏq, chĕq pôp ŏh tôq gĕh. Cồ canŏq yăh dông vơn saq tât bây nĕh.”16En nŏq, Thô-ma, khoi gĕh cuôl pành Đi-đim, nhai bây khây con tuyh tăm saq bây Siđăch: “Vơn khoi saq tât nŏq chĕq vơn chưt simơ bây Siđăch!”17Payh canŏq, lăm tât gatŭq, Siđăch Yêsu gưt La-sa-rơ gŭq sŭng ganâp puôn năr en.18Lăm nŏq, Bê-tha-ni gŭq mơch Yê-ru-sa-lem, ngai a nŏq vlơ tĕh mât prăm êch-ta-đơ vŏq.19Gĕh gŏq ndu sŭng khây tamun Yo-thai tât bây Ma-thê nggâm Ma-ri chĕq khây nĕh pawal nuih an khây nĕh sĭq pôp klô.20En nŏq, lăm Ma-thê chăng pành Siđăch Yêsu tât, nŏq nĕh lŭh chĕq wŏq Siđăch, hôm Ma-ri gŭq sŭng nhi.21Lăm nŏq Ma-thê nhai bây Siđăch Yêsu: “Ơ Siđăch, hê Cô gĕh măt u heq lăm nŏq, nŏq nhâng pôp ănh đăng chưt.22Cồ canŏq, sŏng sŭng lăm heq, ănh gưt pành vrŭq lây cồ Cô wĭnh bây Siđăch Trôq, Siđăch Trôq nhâng paq an Cô.”23Siđăch Yêsu nhai bây nĕh: “Pôp klô pôp de sẽ tao rĭh sĭq vlâq.”24Ma-thê âh bây Siđăch: “Ănh gưt pành pôp klô nhâng gĕh tao rĭh sĭq vlâq sŭng dâq tao rĭh sŭng năr chôch lĕq.”25Siđăch Yêsu nhai bây nĕh: “Ănh heq cồ sinlơ tao rĭh sĭq vlâq bây sinlơ rĭh; vu lây tôq u Ănh gĕh rĭh, cồ lăm heq nĕh chưt èn;26hôm vu lây rĭh bây tôq u Ănh nŏq nhâng bâng đăng chưt an tât gơih nggơih. Pôp gĕh tôq sinlơ heq đăng?”27Nĕh âh sĭq vlâq bây Siđăch: “Gĕh, ơ Cô, ănh tôq pành Cô cồ Siđăch Yơt Dưnya, Con Cô Voq, cồ Candranh tât sŭng dưnya.”28Nhai canŏq en, nĕh palâq sĭq en cuôl ayh Ma-ri ŏh nĕh, nhai pành: “Gru gŭq u heq bây cuôl ŏh tât.”29Lăm Ma-ri chăng canŏq, nŏq nĕh jăc jâng prŭh tao en saq tât bây Siđăch.30Lăm nŏq, Siđăch Yêsu ndŏh lăp sŭng palây en hôm gŭq u gatŭq cồ Ma-thê gĕh vlam Nĕh.31Lăm nŏq, khây tamun Yo-thai, cồ khây tamun gŭq bây Ma-ri sŭng nhi en pawal nuih nĕh, lăm sây pành Ma-ri pĭh păh tao yăq bây saq lŭh tu ling, nŏq saq bây nĕh, sinâng pành nĕh saq tât vi ganăp chĕq nĕh nhim u nŏq.32En nŏq, sŏng lăm Ma-ri tât gatŭq cồ Siđăch Yêsu tao yăq, lăm deng sây Siđăch, nĕh vông jưr u jâng Siđăch en nhai bây Siđăch: “Cŭh Siđăch, hê Cô gĕh u heq alor, nŏq nhâng pôp ănh đăng chưt.”33Nŏq, lăm Siđăch Yêsu sây nĕh nhim, en khây tamun Yo-thai cồ saq simơ bây nĕh khoi nhim, aheq Siđăch chăng ji côr sŭng wênh nggui en nơm Siđăch khoi lêch nuih.34Siđăch lŭp: “Khây pôp ŏh chĕq nĕh u vi lây?” Khây nĕh nhai bây Siđăch: “Ơ Siđăch, wĭnh tât bây sên.”35Siđăch Yêsu nhim.36Payh canŏq, khây tamun Yo-thai nhai: “Sên tĭq, nĕh sinđach La-sa-rơ gŏq gưt dâng lây!”37Cồ canŏq, var pe ndu sŭng khây nĕh nhai: “Nĕh heq, cồ tamun pơq măt an tamun jingo măt, khoi đăng ôp gĕh păch lây chĕq an tamun heq đăng chưt uy?”38Payh canŏq, sŭng lăm chăng ji côr sŭng nơm wŏq, Siđăch Yêsu saq tât vi ganăp. En heq, nŏq cồ du lâm chhŭng tamô, bây gĕh du đar tamô gĕh chĕq păng a vôq nŏq.39Siđăch Yêsu săng: “Palăm đar tamô saq.” Ma-thê, cồ ŏh ur tamun chưt, nhai bây Siđăch: “Ơ Siđăch, nĕh ngang ôm en, mvăc năr heq cồ năr di puôn en.”40Siđăch Yêsu nhai bây nĕh: “Đăng gal Ănh gĕh nhai bây pôp pành hê pôp tôq, nŏq pôp sây gĕh sinlơ sindraq sindil Siđăch Trôq de uy?”41Canŏq mŏh, vu palăm tamô saq. En Siđăch Yêsu pơq măt hao vlơ trôq bây nhai: “Ơ Vap, Con may mo Vap mvăc Vap gĕh iêt chăng Con.42Nhâng Con gĕh gưt pành Vap wân lawân iêt chăng, cồ canŏq Con nhai lŭh payh ơ mintan gŏq săq tao yăq rawênh heq, chĕq an khây nĕh tôq pành Vap pađăr Con tât.”43En lăm nhai canŏq, Siđăch cuôl hao du camvŭm măq: “Ơ La-sa-rơ, saq lŭh tu ling!”44Tamun cồ chưt saq lŭh, jâng bây ti hôm gĕh poq cŭm vai chop, en măt nĕh hôm gĕh poq nseng. Siđăch Yêsu nhai bây khây nĕh: “Đŏh lŭh an nĕh iưn bây chĕq nĕh saq.”45Payh canŏq, gŏq ndu sŭng vatom tamun Yo-thai, cồ khây tamun gĕh tât păng Ma-ri en lăm sây gĕh vrŭq Siđăch ôp, khây nĕh chĕq nuih talaq tôq u Siđăch.46Cồ canŏq var pe ndu sŭng khây nĕh saq tât bây vatom tamun Pha-ri-si en đơm sĭq vlâq an khây nĕh khây vrŭq cồ Siđăch Yêsu gĕh ôp.47Nŏq mŏh, khây gru sipăm măq nggâm tamun Pha-ri-si cuôl tăm vatom du dŏq Yo-thai Tăm Vlam en tăm nhai: “Vơn ôp păch lây vrêq, mvăc nĕh heq ôp gŏq păch chin'hâu lŭng?48Hê vơn chĕq valây nĕh diêt canŏq, nŏq lĕq săq tamun tôq u nĕh, en tamun Rô-ma tât bây pâm nhŭp lĕq gatŭq heq nggâm daq sikiêq vơn de.”49Cồ canŏq, Cai-phe, du mvu sŭng khây nĕh, cồ gru sipăm măq sŭng mva nŏq, nhai bây khây nĕh: “Khây cô đăng gưt păch lây lĕq!50Khây cô đăng sinâng an di dân pành nŏq cồ sinlơ yăh vlơ an khây cô lăm chĕq an du mvu chưt ala an con văl chĕq lĕq văl ganơ đăng chưt lawăch uy?”51Lăm nŏq, nĕh nhai sinlơ nŏq đăng gal nhai bây con tamun nĕh, cồ nhâng mvăc nĕh cồ sipăm măq sŭng mva nŏq, nŏq nĕh nhai lor pành Siđăch Yêsu mơch chưt an con tamun,52bây đăng gal ayh cồ an con văl heq ngăn, mà hôm chĕq con sinau Cô Voq cồ chroc voq gĕh tăm vatom jêng muôi.53Canŏq mŏh, a năr nŏq, khây nĕh wŏng trong chĕq dơp Siđăch lăp gatŭq chưt.54Payh canŏq, Siđăch Yêsu đăng hôm sĭq saq avôq măt sŭng khây tamun Yo-thai wŏq, aheq Siđăch saq ntrăch gatŭq nŏq lăm sĭq tu gatŭq mơch tamăn singot, sŭng du palây gĕh cuôl pành Ep-ra-im. Siđăch gŭq u nŏq bây khây con tuyh.55Lăm vrêq, Lễ Saq Ntrăch văl Yo-thai de mơch tât, gŏq tamun a khây palây mơ tanŏh saq hao tât Yê-ru-sa-lem lor a năr Lễ Saq Ntrăch chĕq khây nĕh sat rao nơm.56Canŏq mŏh, khây nĕh wŏng Siđăch Yêsu, bây tăm nhai sŭng ndăng ganai lăm tao yăq sŭng Nhi cŭh: “Bây khây cô, vrŭq nŏq cồ bơh năm? Pành nĕh nhâng bâng đăng tât chĕq jơ lễ nggưt?”57En nŏq, khây gru sipăm măq bây tamun Pha-ri-si gĕh lŭh camvŭm, chĕq hê vu lây gưt Siđăch u vi lây, nĕh nŏq căh nhai sĭq vlâq chĕq khây nĕh nhŭp gĕh Siđăch.
FAR EAST BROADCASTING COMPANY