James1
1Ya-cơ, dĭch năc Siđăch Trôq de bây Candranh Krit Yêsu, dơp an mât var chhe njang cồ hôm mrĭh taprăh taprăng: Gĕh camvŭm păng mơq pôp ŏh sŭng sinlơ yăh song săq.2Ơ pôp ŏh ănh je, lăm pôp ŏh tarŏh lăp lôch sinlơ longgăn, căh sên nŏq cồ du sinlơ vui hơn vênh lôch,3mvăc gưt pành sinlơ longgăn tôq camvân pôp ŏh dĕh lŭh prơn nhwa chĕq wŏq vadâng.4Nŏq, prơn nhwa wŏq vadâng nhâng tănlŭh di lôch vrŭq nĕh, chĕq pôp ŏh nhâng gĕh tao măq bây jêng yăh, đăng păh pât păch lây.5En hê vu lây nŏq sŭng pôp ŏh pŏh pât vanŏh, tamun nŏq căh wĭnh sinlơ nŏq a Siđăch Trôq, Candranh paq jưr vênh rămvi an ăp ndu cồ đăng chih lăh, nŏq sinlơ vanŏh nhâng gĕh paq an tamun nŏq.6Nŏq tamun nŏq căh wĭnh sŭng sinlơ tôq camvân, đăng sinâng sĭq sinâng saq, mvăc tamun canŏq dân ca chhal rapăn daq lênh, nĕh ndit ndơt en ncŭp nkênh lăm chhal khlôm.7Tamun canŏq vâng sinâng pành nơm nhâng wŏq gĕh păch lây a Siđăch,8nŏq cồ tamun uĕh vông nuih, đăng gŭq kram sŭng ăp con trong nơm.9Tamun pôp ŏh gŭq u gatŭq dêh căh lơ vôq sĭq gatŭq prĭh măq nơm de,10hôm tamun jina căh lơ vôq sĭq sinlơ dêh lŏh nơm de, mvăc tamun nŏq nhâng saq ntrăch dân ca ncao canji u tamăn.11Măt năr hao prĭh bây dŭh năr sŏh roq nggâm ôp ro rănh canji canjap, ncao nĕh taprŭh, sinlơ yăh rom nĕh de tapĭh lawăch. Dân canŏq, tamun jina khoi rănh nhot sŭng sinlơ rĭh cồ nĕh saq ndap.12Yăh lŭng an tamun wŏq sinlơ longgăn. Mvăc, lăm lăq gĕh candân en, tamun nŏq nhâng wŏq gĕh đuôn sinlơ rĭh, cồ sinlơ Siđăch Trôq lăq gĕh pănggân an khây tamun lây sinđach Nĕh.13Lăm vlam sinlơ lamvoch, vâng gĕh vu lây nhai pành: “Siđăch Trôq lamvoch ănh!”, mvăc Siđăch Trôq Nĕh đăng vlam păch viêm lamvoch gĕh, nŏq nơm Nĕh khoi đăng lamvoch vu lây.14Nŏq ăp ndu vlam sinlơ lamvoch, lăm vlam sinlơ đưc niu nggâm vông tôr payh nuih cơnh nơm vơn de.15En nŏq, alưr lăm lăq rŏh vŭn, nuih cơnh dĕh lŭh sinlơ bưn bap, nŏq alưr lăm lăq tao măq, bưn bap dĕh lŭh sinlơ chưt.16Ơ pôp ŏh yăh sinđach ănh je, vâng chĕq nơm vlam sinlơ tagat.17Ăp sinlơ paq an yăh rom nggâm ăp păch paq an yăh la-it ayh tât a vlơ, cồ tât a Vap silang de, nŏq sŭng Siđăch đăng gĕh sinlơ ala nđĕh ha nggui tăm pagâl.18Bây sinlơ lăq pănggân, Siđăch lăq dĕh vơn lŭh don a camvŭm nhâng gal, chĕq khây vơn cồ jêng du play jo daq vôq sŭng ăp vrŭq cồ Siđăch sun lŭh.19Ơ pôp ŏh yăh sinđach ănh je, căh gưt pành: Ăp ndu căh sô iêt chăng, lĭh nhai, lĭh hao nuih.20Mvăc sinlơ hao nuih con tamun de đăng ôp lŭh sinlơ yăh sŏng Siđăch Trôq de.21Mvăc canŏq, alưr lăm lăq đŏh hwât lĕq sinlơ sâq vơm bây ăp sinlơ viêm vôt, căh wŏq sŭng sinlơ tăn jưr nơm camvŭm gĕh swây tăm, cồ camvŭm gĕh prơn wŏq yơt wênh nggui pôp ŏh.22Căh jêng lŭh khây tamun ôp bây camvŭm, vâng ayh cồ khây tamun iêt chăng en tagat nơm vơn.23Mvăc hê vu lây cồ tamun iêt chăng camvŭm en đăng gal cồ tamun ôp bây, nŏq tamun nŏq dân ca du mvu sên sol măt nhâng nơm de sŭng kiêng.24Tamun nŏq gĕh sol nơm en lŭh saq, nŏq en hŭch chĕq mŭh măt nơm canŏq caheq.25Nŏq vu lây sên di dân lăp ravwŏq yăh lôch sĭq sinlơ saq lahông, bây kram nuih ôp diêt canŏq, đăng jêng lŭh tamun iêt en hwât chĕq, nŏq cồ tamun ôp vrŭq cồ gĕh ôp, nŏq tamun nŏq nhâng gĕh păch yăh sŭng vrŭq ôp nơm de.26Hê vu lây sinâng nơm cồ rĭh yăh nŏq đăng gưt jơ sên lapiêt nơm, nŏq tagat diêt nuih talaq nơm, nŏq trong saq tamun nŏq de đăng lŭh păch lây lĕq.27Trong saq yăh soch jrŏh bây đăng takêp sâq vơm u măt Siđăch Trôq, Vap vơn, nŏq cồ ôp păch yăh an con la-ơi, ur mrô sŭng sinlơ lŏh sat khây nĕh de, bây jơ nơm đăng sâq cavơm a dưnya heq.
FAR EAST BROADCASTING COMPANY