Hebrews4
1Payh canŏq, vơn căh gưt phŭng bây râm săq, mvăc phŭng pành camvŭm pănggân saq lăp sŭng sinlơ lu lŏh Siđăch de gât hôm nŏq, en vu lây nŏq sŭng pôp ŏh pôq vaih taphlăt cambet en.2Mvăc dân ca khây nĕh, vơn khoi gĕh nhai tămti Sipơp yăh. Cồ canŏq, vrŭq chăng iêt camvŭm gŭn nŏq đăng văt tât sinlơ yăh lây an khây nĕh, lăm đăng gĕh pănggrăp bây sinlơ tôq camvân u sŭng khây tamun chăng iêt.3Sĭq bây vơn heq, cồ khây tamun tôq en, nŏq gĕh lăp sŭng sinlơ lu lŏh, bây tanrong cồ Siđăch gĕh nhai:“Dân ca Ănh gĕh raq săq sŭng lăm măq nuih ănh je,‘… khây nĕh đăng gĕh lăp sŭng sinlơ lu lŏh Ănh je!’”Cồ payh khây vrŭq Siđăch ôp jêng gayh alăm sun chĕq vri dưnya.4Mvăc gĕh gatŭq Siđăch nhai caheq sĭq năr di păh:“En Siđăch Trôq lu lŏh ăp vrŭq Nĕh de sŭng năr di păh.”5En du dâq wŏq u sŭng gatŭq ndây:“… Khây nĕh đăng lăm lây lăp gĕh sŭng sinlơ lu lŏh Ănh je.”6Canŏq, lăm camvŭm pănggân gât hôm chĕq ân an du số tamun chĕq lăp sŭng sinlơ lu lŏh nŏq, en khây tamun a paheq gĕh nhai an gưt Sipơp Yăh đăng lăp gĕh payh ơ sinlơ đăng ôp bây,7nŏq Siđăch Trôq chĕq lŭh du năr wŏq, cuôl pành: “Năr heq,” lăm nhai ju Đa-vít du vau khay mva jŏq jong alưr nŏq, dân ca camvŭm gĕh nhai avlơ:“Năr heq, hê khây con chăng camvŭm Siđăch,nŏq vâng ôp kranh nuih khây con.”8Mvăc hê Yô-swê gĕh văt tât sinlơ lu lŏh an văl ganơ, nŏq nhâng Siđăch đăng nhai sĭq du năr ndây alưr khây vrŭq heq.9Payh canŏq, khoi hôm u nŏq sinlơ lu lŏh Sa-bat chĕq an con văl Siđăch Trôq de.10Mvăc vu lây gĕh lăp sŭng sinlơ lu lŏh Siđăch Trôq de, nơm khây nĕh khoi lu lŏh khây vrŭq ôp nơm de, dân ca Siđăch Trôq sĭq bây khây vrŭq ôp Siđăch de.11Payh canŏq, yăh dông vơn căh gưt uĕh vrawŏq chĕq lăp sŭng sinlơ lu lŏh nŏq, chĕq đăng gĕh vu lây tarŏh lăp sŭng têr viêm sĭq sinlơ đăng tôq tĭq.12Mvăc camvŭm Siđăch Trôq hôm mrĭh, jêng gayh bây sôt krĭq dông a pĭh var maq măt, juh phưt di tât gatŭq paklăh nggui bây wênh, lĕq nting côq bây chhu, bây gĕh prơn sên păndĕh khây sinlơ sinâng nggâm khây vrŭq sŭng nuih talaq.13Đăng gĕh păch sun lŭh lây cồ tăm pôn sưt u vôq măt Siđăch. Palâq vlâq, ăp păch gĕh sun sirôq pôq rang bây pri lŭh lĕq u vôq măt Siđăch de, cồ Candranh pành camvŭm nhai lŭh vơn de dâl sĭq Nĕh.14Canŏq, sŭng lăm gĕh du gru sipăm măq mi gĕh găn ntrăch khây tăp trôq, nŏq cồ Siđăch Yêsu, Con Siđăch Trôq, nŏq vơn căh jơ di gân khây camvŭm nhai candân nơm de.15Mvăc đăng gal vơn gĕh du gru sipăm măq đăng gĕh prơn chĕq rawa nuih bây khây sinlơ la-ui vơn de, palâq sĭq vlâq nŏq cồ Candranh gĕh wŏq sinlơ lamvoch sŭng ăp ti singging bây tanrong tăm dân ca vơn, cồ đăng gĕh bưn bap lây.16Payh canŏq, bây nuih talaq chha kram, vơn gĕh prơn tât mơch gatŭq sinăc yăh, chĕq wŏq sŏq sinlơ sinđach bây wŏng gĕh sinlơ yăh sŭng sinlơ tăm paq sŏng vadâq nŏq.
FAR EAST BROADCASTING COMPANY