Ephesians1
1Phao-lô, con tuyh Siđăch Yơt Dưnya Yêsu de bây nuih cơnh Siđăch Trôq, chêr dơp an Vatom Gŭn, cồ khây tamun tôq Siđăch u Ê-phê-sô bây khây tamun mbêr nuih sŭng Siđăch Yơt Dưnya Yêsu.2Ngwân sinăc yăh bây sinlơ yăh iên a Cô Voq, Vap vơn de, nggâm Siđăch, cồ Siđăch Yơt Dưnya Yêsu, tât vlơ pôp ŏh ur klô.3Nhâng gal chĕq payom tapơ Cô Voq, Vap Siđăch Yơt Dưnya Yêsu de, Siđăch vơn, cồ Candranh gĕh tŭh jưr sinlơ yăh an vơn bây ăp păch yăh gŭn manh u khây ăp gatŭq vlơ trôq sŭng Siđăch Yơt Dưnya,4khoi dân ca Siđăch gĕh săch sŏq vơn sŭng Siđăch Yơt Dưnya lor a lăm sun lŭh dưnya, chĕq vơn gĕh jêng soch jrŏh bây đăng gĕh tŭq lây pành chih lăh u vôq măt Siđăch. Payh sinlơ tăm sinđach5Siđăch gĕh sŭmmrăp lor khây vơn an gĕh jêng con tê Nĕh de don ju Siđăch Yơt Dưnya Yêsu, dăh bây sinlơ yăh vui vayh nuih cơnh Siđăch de,6chĕq jêng vưt tatăq a sinlơ adŏh payom sindraq sindil sĭq sinăc yăh Siđăch de cồ Siđăch gĕh simăh pơq hwi paq an khây vơn sŭng Con Yâh Sinđach Siđăch de,7cồ sŭng Con nŏq, vơn gĕh sinlơ yơt wŏq don a n'ham Nĕh, sinlơ bôih hwât bưn bap bây sinlơ gan'hăp jina sinăc yăh Siđăch de,8cồ sinăc yăh pành Siđăch gĕh paq an vơn vênh rămvi sŭng ăp sinlơ vanŏh nggâm silang tagăh,9ôp an vơn dân gưt sinlơ jru sưt sŭng nuih cơnh Siđăch de bây sinlơ vui nuih Siđăch, cồ vrŭq Siđăch pành gĕh sŭmmrăp sindăc a daq vôq sŭng Siđăch Yơt Dưnya,10Chĕq tât lăm vadâq tan'hui jêng gayh bây vrŭq gĕh sŭmmrăp, nŏq vatom pănggrop lĕq khây păch sinlơ vlâq sŭng Siđăch Yơt Dưnya, cồ lĕq khây păch sinlơ u vlơ trôq bây păch sinlơ u ntĕh, sŭng Siđăch,11nŏq sŭng Candranh cồ vơn khoi gĕh tăm paq sĭq păch caya, cồ gĕh sŭmmrăp sindăc bây sinlơ sinâng gưt lor sŭng Candranh cồ ôp jêng gayh ăp sinlơ dân ca vrŭq sŭmmrăp lor bây nuih cơnh Siđăch de,12chĕq an vơn, cồ khây tamun lor lĕq chĕq sinlơ camvân u Siđăch Yơt Dưnya, gĕh lŭh play jo a sinlơ payom sĭq sinlơ sindraq Siđăch de.13En khoi sŭng Siđăch, alưr lăm iêt con trong sinlơ dip gal de, cồ Sipơp Yăh sĭq sinlơ yơt wŏq pôp ŏh ur klô, bây lăm gĕh tôq u Siđăch en, nŏq pôp ŏh gĕh tayh candân a Siđăch Wênh bây camvŭm pănggân,14cồ Candranh nŏq pành gĕh candân sĭq păch caya vơn de di tât lăm wŏq sŏq lĕq khây păch caya, chĕq lŭh play a sinlơ payom tapơ sĭq sinlơ sindraq sindil Siđăch de.15Payh canŏq, a lăm ănh chăng sĭq sinlơ tôq camvân pôp ŏh ur klô de sŭng Siđăch, cồ Siđăch Yêsu, bây sinlơ tăm sinđach chĕq ân an lĕq khây tamun gŭn,16nŏq ănh đăng lu pađăc camvŭm may mo sĭq pôp ŏh, tacăh tât pôp ŏh sŭng camvŭm vơu ngwân ănh de,17chĕq an Cô Voq Siđăch Yơt Dưnya Yêsu de, Siđăch vơn de, cồ Vap sindraq, paq an pôp ŏh gŭn măn sinlơ vanŏh de bây sinlơ pơq an sây sŭng vrŭq dân gưt Siđăch,18ôp an canong măt nuih talaq pôp ŏh de gĕh sol silang, chĕq pôp ŏh gưt sinlơ camvân sĭq sinlơ cuôl panh Siđăch de cồ păch lây, sinlơ gan'hăp păch caya de sindraq sindil Siđăch sŭng khây tamun gŭn cồ canŏq caheq,19bây sinlơ măq mi đăng păch lây tăm wĕh dăn prơn gŭn Siđăch de cồ canŏq caheq sĭq bây vơn, cồ khây tamun gĕh nuih talaq tôq, bây sinlơ ôp an mprăng don prơn camhlăng gŭn măn Siđăch de,20cồ Nĕh gĕh ôp sŭng Siđăch yơt Dưnya lăm ôp an Siđăch Yơt Dưnya a gatŭq chưt tao rĭh sĭq vlâq en chĕq gŭq maq ma Siđăch u khây gatŭq vlơ Trôq,21ntrăch ngai a vlơ ăp prơn camhlăng, vatau ganwâr, prơn gŭn, bây yang ravang, nggâm ăp săq gĕh cuôl hao, đăng gal ayh sŭng nggơih heq ngăn en lawân sŭng nggơih mơch tât wŏq.22Siđăch gĕh ôp an ăp sinlơ phlâq jưr atĕh jâng Siđăch Yơt Dưnya bây iơq Siđăch Yơt Dưnya ôp vôq u vlơ ăp sinlơ sĭq bây vatom gŭn,23pành vatom gŭn cồ rup swan Siđăch de, cồ sinlơ vênh lôch sŭng Candranh gĕh ôp vênh lôch lĕq an ăp sinlơ sŭng ăp nđuôi njang.
FAR EAST BROADCASTING COMPANY