Acts22
1“Khwây khây dêq cô, cồ pôp ŏh nggâm vap cô, wĭnh iêt chăng camvŭm cŏh king ănh de bây dêq cô vrêq heq.”2Lăm nŏq, chăng pành Phao-lô nhai a trong Hê-bơ-rơ bây vơn, nŏq khây nĕh ra'ngăp dông wŏq. En nĕh nhai:3“Ănh heq cồ tamun Yo-thai, dĕh lŭh u palây Tat-sơ, ntĕh Si-li-si, cồ canŏq gĕh pađau bây hao măq sŭng palây heq u jâng gru Ga-ma-li-ên, gĕh pađau bây con trong krĕh krit ravwŏq de cồ vap cô chĕq sĭq vlâq, gĕh nuih talaq uĕh vrawŏq sĭq Siđăch Trôq dân ca lĕq săq dêq cô gĕh năr heq,4cồ tamun gĕh ôp panhji panhlŏh Con trong Cô Voq heq an tât chưt, lăm nhŭp tănchăp en trăng lăp nhi jingo lĕq klô nggâm ur:5dân ca gru sipăm măq candân an ănh nggâm lĕq khây cô camvĭnh, cồ khây tamun cồ alưr heq lăm wŏq sirăq u khây nĕh dơp an khây pôp ŏh, chĕq ănh hao trong saq tât Đa-mach, saq têch khây tamun bị nhŭp jơ u nŏq văt sĭq Yê-ru-sa-lem, chĕq khây nĕh wŏq dôih.6Lăm vrêq, vrŭq văt tât an ănh nŏq cồ lăm saq vlơ trong en mơch tât Đa-mach, lăm mơch năr tam vôp, sŭmmrât u nŏq, du vông ŭnh silang camhlăng a vlơ trôq sol jưr rawênh ănh.7Lawân lăm nŏq, ănh vông hlâq jưr ntĕh en chăng du camvŭm nhai bây ănh, pành: ‘Ơ Sau-lơ, Sau-lơ, lŭh con ôp panhji panhlŏh Ănh?’8Canŏq en, ănh âh sĭq vlâq: ‘Cŭh Siđăch, Cô cồ vu lây?’ Nĕh nhai bây ănh: ‘Ănh heq cồ Yêsu tamun Na-sa-ret, Candranh cồ con panhji panhlŏh heq.’9Lăm nŏq, khây tamun cồ gŭq bây ănh khoi sây vông ŭnh silang nŏq, cồ canŏq khây nĕh đăng chăng bây dân gĕh camvŭm cồ Candranh nŏq nhai bây ănh.10Hôm ănh nhai pành: ‘Cŭh Siđăch, con ôp păch lây vrêq?’ Alưr nŏq, Cô Voq nhai bây ănh: ‘Alưr lăm tao yăq en, căh saq lăp sŭng palây Đa-mach, en u nŏq con gĕh nhai an gưt sĭq lĕq khây păch lây gĕh sŭmmrăp an con phải ôp.’11Canŏq en, sŭng lăm ănh đăng deng sây dân payh ơ vông ŭnh silang sindraq nŏq, nŏq don a khây tamun gŭq bây ănh văt ti iau saq, nŏq ănh gĕh saq lăp sŭng palây Đa-mach.12Lăm vrêq, pôp A-na-nia tĭq, du mvu uĕh vrawŏq bây ravwŏq, gĕh camvŭm candân yăh a ăp ndu tamun Yo-thai rĭh u nŏq,13lăm tât bây ănh en tao yăq amaq, nĕh săng ănh: ‘Ơ pôp Sau-lơ, silang măt sĭq vlâq vồh.’ Sŏng vadâq nŏq, ănh deng hao sây nĕh.14Alưr nŏq, nĕh nhai: ‘Cô Voq un cô jây vơn de gĕh săch sŏq pôp chĕq gưt nuih cơnh Nĕh de, bây chĕq deng sây Candranh yăh sŏng, khoi ca chĕq chăng camvŭm nhai lŭh a mŭnh Nĕh,15mvăc pôp nhâng cồ du mvu tamun ôp candân an Siđăch a vôq măt ăp ndu sĭq khây păch lây cồ pôp gĕh sây bây chăng.16Vrêq heq, pôp hôm nding ndăng păch lây wŏq? Lăm tao yăq, căh jưr daq ŭm vôq bây căh ôp jrŏh bưn bap nơm don a cuôl wĭnh săq Siđăch.’17Alưr nŏq, vrŭq văt tât an ănh lăm sĭq tât Yê-ru-sa-lem, en lăm ănh vơu ngwân sŭng Nhi Cŭh, nŏq cồ lăm nơm ănh gĕh sinlơ an sây18Ănh sây Siđăch nhai bây ănh: ‘Jăc jâng vồh, bây căh pĭh păh saq lŭh ntrăch a Yê-ru-sa-lem, mvăc khây nĕh đăng wŏq camvŭm candân con de sĭq Ănh nồq.’19Aheq ănh âh: ‘Cŭh Siđăch, nơm khây nĕh gưt pành paheq con nhŭp doq nhi jingo en pâm gông sŭng ăp nhi vatom khây vu lây tôq u Siđăch.20Lăm n'ham Ê-tiên de, cồ tamun candân Siđăch de, tahor lŭh, nơm con khoi tao yăq mơch nŏq, tăm du nuih talaq, bây jơ sên ao chuq aling khây tamun tachưt Ê-tiên de.’21En Siđăch nhai bây ănh: ‘Căh saq, mvăc Ănh pađăr con saq ngai tât bây khây văl daq aling.’”22Lăm vrêq, văl ganơ chăng Phao-lô an tât camvŭm heq, nŏq khây nĕh hao mŭnh, nhai pành: “Phải văt tamun caheq ntrăch a măt ntĕh, mvăc đăng yăh chĕq an nĕh rĭh.”23Lawân sŭng lăm cuôl sec, khây nĕh hwât chĕq ao chuq a ling en hwât vuh sikiêq hao vlơ trôq,24nŏq ganwâr văt vôq lŭh camvŭm chĕq nĕh gĕh văt lăp sŭng nhi congti, nhai pành nĕh phải vlam săc si a rĕh, chĕq di gưt păch tơm lây nŏq con văl cuôl sec chŏl sĭq vlâq nĕh canŏq.25Cồ canŏq lăm khây nĕh dăng Phao-lô lŭh a chhe chĕq pâm a rĕh, Phao-lô nhai bây cô var tao yăq u nŏq: “Gal đăng ravwŏq an khây cô don rĕh pâm du mvu con văl Rô-ma lăm hôm ndŏh gưt bap nĕh de?”26Lăm vrêq, mvăc chăng canŏq, aheq cô var, lăm saq tât bây ganwâr văt vôq, nhai sĭq vlâq pành: “Cô cơnh ôp păch lây nŏq? Mvăc nĕh heq cồ con văl Rô-ma.”27Aheq, lăm saq tât en, ganwâr văt vôq nhai bây nĕh: “Nhai an ănh gưt, pôp gal cồ con văl Rô-ma ha đăng?” En Phao-lô nhai: “Gal ằm.”28Lăm vrêq, ganwâr văt vôq âh sĭq vlâq: “Ănh gĕh vro kwiềng con văl nŏq gŏq jên lŭng.” Aheq Phao-lô nhai: “Hôm ănh nhâng gĕh dĕh lŭh canŏq èn.”29Payh canŏq, khây tamun cồ cơnh săc si nĕh sŏng lăm nŏq plĕq ngai a nĕh, hôm ganwâr văt vôq phŭng candŭh lăm gưt pành nĕh cồ con văl Rô-ma en mvăc nơm gĕh an nhŭp tăn chăp nĕh.30Canŏq en, năr alưr, mvăc cơnh gưt an di dân lŭh nĕh vlam tamun Yo-thai yăq văq, nŏq ganwâr văt vôq đŏh se loih an nĕh, en lŭh camvŭm an khây gru sipăm măq nggâm lĕq Vatom Tamun gŭq sĭq vlâq. En lăm têch Phao-lô jưr, ganwâr an chĕq nĕh u vlăc cađar khây nĕh.
FAR EAST BROADCASTING COMPANY