Acts20
1Vrêq heq, lăm sinlơ minsôc minsac nŏq sŏng en, Phao-lô panh khây con tuyh tât, en alưr lăm pành jrâng khây nĕh, nhai camvŭm paklăh ti, nŏq nĕh lŭh saq, hao trong saq tât Ma-sê-đwan.2Canŏq en, lăm saq găn khây ntĕh nŏq, en pành jrâng khây nĕh du dŏq tămti jong, nŏq nĕh saq tât Hi Lap.3En, lăm gŭq u nŏq pe khay en, mvăc gĕh du sinlơ sŭmmrăp ôp lŏh sat nĕh a tamun Yo-thai lăm mơch hao duq tât Si-ri, mŏh nĕh gĕh sinlơ pagâl, saq tu Ma-sê-đwan chĕq sĭq.4Lăm nŏq, saq simơ bây nĕh gĕh Sô-ba-tê, con Bi-ru, tamun Bê-rê; hôm gĕh A-ri-tac bây Sê-cun-đu, tamun Tê-sa-lô-ni-ca; Gai-ut, tamun Đet-bơ; Ti-mô-thê; nggâm Ti-chi-cơ bây Trô-phim, tamun A-si.5Aheq mvăc saq lor en, nŏq khây nĕh gŭq câp khananh u Trô-ach.6Hôm khananh, alưr khây năr Lễ Bănh Đăng Gĕh Tape, gĕh saq duq a palây Phi-lip, en saq lĕq prăm năr, khananh tât gĕh bây khây nĕh u Trô-ach, cồ gatŭq khananh gŭq sĭq vlâq u nŏq sŭng pŏh năr.7Lăm vrêq, sŭng năr di muôi sŭng twâng, lăm khananh tăm vatom bây ndăng ganai chĕq sa War Siđăch de, Phao-lô nhai păch bây khây pôp ŏh. Mvăc sŭmmrăp chĕq saq sŭng năr alưr, nŏq nĕh tămti diêt an tât năc vanăng,8Lăm nŏq gĕh gŏq ŭnh sŭng côt vlơ nhi prĭh, vi cồ khananh gĕh vatom sĭq vlâq.9Aheq, gĕh du ndu klô dlu tĭq, săq Ơ-tich, lăm gŭq u lapông mhlŏh, vlam sinlơ cơnh vĭq en vĭq hwĭch, sŭng lăm Phao-lô tămti jong dông wŏq, mvăc gŭq jru sŭng sinlơ vĭq, nĕh tarŏh a tăp di pe jưr en chưt lăm gĕh iơq tao.10Cồ canŏq, lăm saq jưr en, Phao-lô pin nơm vlơ nĕh, en ut nĕh, Phao-lô nhai: “Vâng jăl wăl, mvăc sinlơ rĭh nĕh de hôm gŭq sŭng nĕh.”11Alưr nŏq, saq hao vlơ, gĭq bănh bây sa war, en nhai păch sŭng khây vadâq hôm sĭq vlâq an tât silang, en cớ canŏq, nĕh hao trong.12Hôm vu văt păch klô sĭq, nĕh hôm rĭh, nŏq gĕh sinlơ pawal nuih đăng kiq.13Alưr nŏq, lăm saq lor tât gatŭq răp duq, khananh gĕh văt tât A-sôt, cồ gatŭq sinâng cơnh roc Phao-lô hao duq, mvăc nĕh gĕh sŭmmrăp canŏq, lăm nơm nĕh bây sŭmmrăp saq trong jâng.14En lăm nĕh vlam khananh u A-sôt, nŏq lăm wŏq nĕh hao duq, khananh saq tât Mi-ti-len.15En lăm saq lŭh daq lênh a gatŭq nŏq, năr alưr khananh saq jưr găn Chi-ô, hôm năr alưr nŏq, khananh tât u Sa-môt, en năr alưr wŏq, khananh saq tât Mi-lê.16Mvăc Phao-lô cơnh saq duq găn Ê-phê-sô, chĕq nĕh đăng phơi du năr lây u ntĕh A-si, mvăc nĕh pajăl chĕq gĕh măt u Yê-ru-sa-lem sŭng năr Lễ Prăm Jât, hê nĕh ôp gĕh vrŭq canŏq.17Canŏq, a Mi-lê, lăm pađăr tamun tât Ê-phê-sô, nĕh an panh khây cô camvĭnh sŭng vatom gŭn tât.18En nŏq, lăm khây nĕh tât bây Phao-lô, nŏq Phao-lô nhai bây khây nĕh: “Nơm pôp ŏh gưt dân, a năr vôq lĕq, cồ a lăm ănh chĕq jâng tât A-si, ănh gĕh gŭq bây pôp ŏh bơh năm sŭng lĕq năr khây nŏq,19nhŭp lĕq nuih talaq tănjưr nơm bây daq măt lăm ôp vrŭq Siđăch, nggâm khây sinlơ lŏh sat văt tât an ănh payh ơ nuih talaq viêm tamun Yo-thai de,20bơh năm ănh đăng jơ sĭq vlâq du sinlơ lây, nŏq cồ khây sinlơ yăh, cồ đăng nhai parang an pôp ŏh, ănh khoi gĕh pađau tămti pôp ŏh u gatŭq gŏq săq tamun, bây u khây nhi,21lăm ôp candân an lĕq tamun Yo-thai nggâm Hi Lap sĭq vrŭq palâq vôq sĭq Cô Voq, en sĭq sinlơ tôq camvân u Siđăch vơn de, cồ Cô Yêsu.22Vrêq heq, wĭnh sên heq, ănh vlơ trong saq tât Yê-ru-sa-lem, mvăc gĕh Siđăch Wênh payĕq, en đăng gưt khây sinlơ lây văt tât an nơm u nŏq,23hôm ayh vrŭq cồ Siđăch Wênh candân an ănh gưt sŭng ăp palây, nĕh pành chhe loih bây sinlơ lŏh sat gŭq câp nggơ ănh.24Cồ canŏq, ănh đăng gĕh camvŭm lây chĕq nhai pành sinlơ rĭh ănh de cồ măq mi an ănh, ayh ôp bơh năm chĕq lôt sŏng trong ănh de bây vrŭq cồ ănh wŏq a Siđăch Yêsu, chĕq ôp candân an Sipơp Yăh don sinăc yăh Cô Voq de.25Vrêq heq, wĭnh sên heq, ănh gưt pành lĕq săq pôp ŏh, cồ sŭng khây tamun cồ ănh gĕh roch găn lăm pađau tămti sĭq Daq Trôq, đăng hôm sây măt ănh wŏq.26Payh canŏq, sŭng năr heq, ănh nhai candân a vôq măt pôp ŏh pành ănh đăng gĕh bap sĭq n'ham lĕq săq pôp ŏh de.27Mvăc ănh đăng jơ sĭq vlâq du sinlơ lây ôp an lĕq khây sinlơ cồ Cô Voq cơnh đăng nhai lŭh gĕh u pôp ŏh.28Căh jơ nơm vơn nggâm lĕq mintan ken cồ Siđăch Wênh gĕh chĕq pôp ŏh ôp tamun sên groi chĕq tê văt vatom gŭn Cô Voq de, cồ vatom cồ Siđăch gĕh vro a n'ham nơm Nĕh de.29Ănh gưt pành alưr sinlơ lŭh saq ănh de, gŏq so rahô chin'hâc saq lăp sŭng ndăng pôp ŏh, đăng sinđach min tan ken.30Tât daq sŏng sŭng ndăng pôp ŏh gĕh takiq ndu tao yăq nhai lŭh khây sinlơ tĭh wil chĕq đưc rôih gŏq con tuyh saq bây khây nĕh.31Canŏq mŏh, căh chĕq măt, căh pành măng bây năr, sŭng pe mva, ănh đăng gŭq lu sŭng vrŭq vuôi pađau ăp ndu nggâm bây daq măt.32Vrêq heq, ănh dơp patăq pôp ŏh ur klô an Cô Voq bây an camvŭm sinăc yăh Siđăch de, cồ sinlơ gĕh prơn gŭn chĕq jrông jrâng pôp ŏh en paq an pôp ŏh păch caya sŭng ndăng lĕq khây vu lây cồ gĕh soch jrŏh.33Ănh đăng cơnh can'hir bạc ha mơh ha ao mphla vu lây de.34Nơm pôp ŏh gưt pành var lapang ti heq gĕh ôp vrŭq chĕq tê nơm ănh bây khây tamun gŭq bây ănh.35Ănh gĕh nhai bây pôp ŏh sŭng lĕq ăp vrŭq pành căh vlam lŏh ôp păch canŏq chĕq tăm lăp ti an khây vu lây gĕh takiq prơn, bây chĕq căh khây camvŭm Siđăch Yêsu de, mvăc nơm Siđăch gĕh nhai: ‘nhâng gĕh simăh lăm paq an vlơ a wŏq sŏq.’”36Lăm nhai khây sinlơ nŏq, nŏq chŏl nkrŭng jưr, Phao-lô vơu ngwân bây lĕq săq khây nĕh.37Lăm vrêq, sinlơ nhim rơp vyăq lŭng ôp lŭh sŭng khây nĕh, en lăm ut khwŏq nco Phao-lô en, khây nĕh phêp nĕh,38mvăc yưr nuih lŭng sĭq camvŭm nĕh gĕh nhai, pành khây nĕh mơch đăng hôm vlam măt nĕh wŏq. Alưr nŏq, khây nĕh dơp Phao-lô jưr duq.
FAR EAST BROADCASTING COMPANY