2 Thessalonians1
1Phao-lô, bây Sin-vanh, nggâm Ti-mô-thê, dơp an Vatom Gŭn u Tê-sa-lô-ni-ca sŭng Siđăch Trôq, cồ Vap bây Siđăch vơn de, cồ Siđăch Yơt Dưnya Yêsu.2Ngwân sinăc yăh nggâm sinlơ iên sŭc a Siđăch Trôq, cồ Vap, cồ Cô Voq, cồ Siđăch Yơt Dưnya Yêsu, gŭq vlơ pôp ŏh.3Ơ pôp ŏh, khananh wân lawân may mo Siđăch Trôq sĭq pôp ŏh, dân ca nŏq cồ vrŭq dip gal, mvăc sinlơ tôq camvân pôp ŏh du năr du hao măq, bây sinlơ tăm sinđach ăp ndu de sŭng lĕq săq pôp ŏh bây ndăng ganai du lih măq hao;4payh nŏq, khananh lơ vôq sĭq pôp ŏh sŭng ndăng khây Vatom Gŭn Siđăch Trôq de sĭq sinlơ mbêr nuih pôp ŏh de bây tôq camvân sŭng ăp sinlơ minlŏh minsat pôp ŏh de, nggâm bây sinlơ rabăh rabơp cồ pôp ŏh gĕh wŏq vadâng,5nŏq cồ sinlơ candân sĭq sinlơ ôp dôih sŏng yăh Siđăch Trôq de chĕq ân pôp ŏh chĕq gĕh đơm pành tăm dip bây daq ntĕh Siđăch Trôq de, mvăc daq nŏq cồ pôp ŏh khoi wŏq sŏq sinlơ minlŏh minsat;6Mvăc nhâng cồ sŏng yăh lăm Siđăch Trôq trŏh daq sinlơ rabăh rabơp u vlơ khây tamun ôp lŭh sinlơ rabăh rabơp an pôp ŏh,7bây paq an pôp ŏh, cồ khây tamun wŏq sinlơ rabăh rabơp, sinlơ lu lŏh simơ bây khananh lăm sinlơ jưr tât Siđăch Yêsu de gĕh tănlŭh vlơ trôq bây khây con gŭn prơn camhlăng Siđăch de,8sŭng vông ŭnh phing laphing, văt sinlơ ôp dôih tât an khây tamun đăng deng gưt Siđăch Trôq bây an khây tamun đăng tôq iêt Sipơp Yăh Cô Voq vơn de, cồ Siđăch Yêsu,9nŏq cồ khây tamun wŏq văq sinlơ sa dôih — cồ sinlơ chưt wân lawân, ngai ntrăch a măt Cô Voq bây ntrăch sinlơ sindraq sindil prơn gŭn Siđăch de,10lăm Siđăch tât chĕq gĕh tapơ payom ju khây con văl Siđăch de bây gĕh sên deng sŭng khây tamun cồ gĕh nuih talaq tôq wŏq, payh ơ camvŭm candân khananh tât bây pôp ŏh sŭng năr nŏq cồ gĕh tôq wŏq èn.11Payh canŏq, khananh khoi vơu ngwân lawân an pôp ŏh chĕq Siđăch Trôq vơn de sên pành pôp ŏh lôch yăh tăm dip bây sinlơ cuôl panh, nggâm chĕq Siđăch ôp jêng gayh ăp sinlơ bây nuih cơnh sĭq sinlơ yăh nggâm vrŭq ôp sŭng sinlơ tôq camvân don prơn gŭn,12chĕq an săq Cô Voq vơn de, cồ Siđăch Yêsu, gĕh payom tapơ u sŭng pôp ŏh en pôp ŏh khoi gĕh sindraq sindil sŭng Siđăch, dăh bây sinăc yăh Siđăch Trôq de bây Siđăch khây vơn, cồ Siđăch Yơt Dưnya Yêsu de.
FAR EAST BROADCASTING COMPANY