2 Corinthians11
1Ănh ngwân pôp ŏh cồ gĕh iêt chăng du ndêt sĭq sinlơ gala galâp ănh je, cồ nhâng pôp ŏh vrêq heq gĕh iêt chăng ănh!2Mvăc ănh tanê sĭq pôp ŏh, bây nuih talaq tanê Siđăch Trôq de, mvăc ănh gĕh dơp pôp ŏh an sai du mvu siklô, têch văt pôp ŏh lŭh dân ca du mvu ur drŭh palâng soch jrŏh an Candranh Krit iưn.3Nŏq ănh phŭng, nŏq bây sinlơ lây nggưt, dân ca con vĭh cồ tagat Ê-va don a sinlơ mvâr mviq nĕh de, nŏq nuih tôr pôp ŏh gĕh tih wil saq ngai a nuih talaq nhâng bâng nggâm yăh soch jrŏh chĕq ân an Candranh Krit.4Mvăc hê gĕh vu lây nŏq tât yảng sĭq du Yêsu ndây cồ khananh đăng gĕh yảng, ha pôp ŏh wŏq du yang ndây, đăng gal Candranh pôp ŏh gĕh wŏq, ha du Sipơp Yăh ndây cồ pôp ŏh lăq đăng wŏq, nŏq pôp ŏh dê chĕq wŏq dông!5Hôm ănh sên sây nơm đăng gĕh păch lây dêh dông khây “con tuyh măq mi” tĭq.6Nŏq tât daq an cồ sŭng camvŭm yảng đăng mprăng nggưt, canŏq đăng gal sĭq sinlơ vanŏh nĕh dêh uy, nŏq sŭng a sinlơ gĕh nhai dân an pôp ŏh sŭng ăp sinlơ.7Ha gĕh gal ănh bưn bap, lăm tănjưr nơm jưr chĕq pôp ŏh gĕh tapơ hao, payh ơ ănh lăq gĕh yảng Sipơp Yăh Siđăch Trôq de an ngăn an pôp ŏh hẩng?8Ănh gĕh sŏq jên caih khây vatom gŭn ndây, lăm gĕh wŏq jên khây nĕh de chĕq ân an vrŭq ôp vrŭq pôp ŏh.9Lăm gŭq bây pôp ŏh — cồ an pŏh păt — ănh nhâng đăng ôp canjâq an du mvu lây. Mvăc alưr tât heq, khây pôp ŏh a Ma-sê-đwan gĕh paq an lôch ăp sinlơ cồ ănh cơnh, en sŭng ăp vrŭq, ănh gĕh jơ nggâm nhâng gĕh jơ nơm wân đăng gal cồ ôp canjâq an pôp ŏh.10Sinlơ dip gal Candranh Krit de gŭq sŭng ănh, canŏq sinlơ lơ vôq heq sĭq nơm ănh nhâng đăng gĕh păng khăq u ăp gatŭq sŭng ntĕh A-chai de.11Mvăc păch lây? Mvăc ănh đăng sinđach pôp ŏh hẩng? Siđăch Trôq gưt ănh gĕh.12Hôm păch ănh gĕh ôp, nŏq ănh nhâng gĕh ôp wŏq, chĕq ănh nhŭp sŏq păch sinlơ cồ khây tamun cơnh wŏng trong ôp lăm lây sŭng vrŭq cồ chĕq khây nĕh lơ vôq, khây nĕh khoi gĕh sên sây dân ca khananh.13Mvăc Khây tamun canŏq cồ khây con tuyh mvâr mviq, khây nĕh ôp vrŭq ta gat, lăm ôp palôm lŭh con tuyh Candranh Krit.14Gĕh păch lây cồ krăq krây uy, mvăc con tamun chaq Sa-tan khoi palôm chĕq ôp con gŭn sindraq sindil.15Canŏq đăng gĕh păch lây cồ măq mi hê khây dĭch năc nĕh de khoi palôm dân ca khây dĭch năc yăh sŏng, cồ chôch lĕq khây nĕh nŏq nĕh nhâng tăm ndân bây ăp vrŭq ôp khây nĕh de.16Ănh nhai sĭq vlâq: Vâng gĕh vu lây sinâng pành ănh heq cồ nrui gala. Hôm hê đăng gĕh, nŏq takiq lŭng căh wŏq ănh dân ca tamun vôt gala, chĕq ănh nhâng gĕh lơ vôq du ndêt.17Sinlơ cồ ănh mơch nhai, nŏq đăng gal ănh nhai bây Siđăch, nŏq dân ca sŭng sinlơ vôt gala tŭq chhu vôq vanŏh lơq nơm heq.18Payh ơ gŏq ndu lơ vôq bây săq swan, nŏq ănh nhâng gĕh lơ vôq.19Mvăc an cồ khây tamun vanŏh, nŏq pôp ŏh gĕh vui hơn lŭng gŭq krap gŏq ndu vôt gala tĭq tĭq.20Mvăc hê vu lây ôp dĭch pôp ŏh, hê vu lây sa nđưt, hê vu lây siđŏh avlăh, hê vu lây ayh iơq nơm hao, hê vu lây pâm lăp măt pôp ŏh, nŏq pôp ŏh hôm mo gŭq krap.21Ănh nhai bây sinlơ prênh poq, dân ca cồ nơm khananh gĕh la-ui! Nŏq nhâng cồ vu lây gĕh kram nuih sĭq vrŭq lây — ănh gĕh nhai sŭng sinlơ nrui gala — nŏq ănh khoi kram nuih canŏq.22Khây nĕh cồ tamun Hê-bơ-rơ? Ănh khoi canŏq. Khây nĕh cồ tamun I-sơ-ra-ên? Ănh khoi canŏq? Khây nĕh cồ chhe njang Ap-ra-ham? Ănh khoi canŏq.23Khây nĕh cồ dĭch năc Candranh Krit de? (Ănh nhai dân ca tamun nrui) Ănh hôm vlơ canŏq wŏq: gŏq vlơ sŭng sinlơ lŏh sat, gŏq vlơ sŭng nhi jingo, sŭng sinlơ pâm gông yông piêt đăng cơp lĕq, gĕh gŏq dâq gŭq u tŭq chưt.24Prăm dâq vlam tamun Yo-thai, ănh gĕh wŏq puôn jât chhơ, hôm ayh du chhơ nŏq lôch.25Pe dâq vu pâm ănh a gadông. Du dâq vu hwât tamô ănh. Pe dâq ănh vlam duq tam vŭq. Ănh rĭh du năr du măng u daq lênh jru;26gĕh gŏq dâq vlơ ăp trong saq, vlam gŏq sinlơ chưt ji vlơ daq phong, mơch chưt bây khây tamun sŏq can'hưn, mơch chưt lŭh a văl nơm, mơch chưt lŭh a khây văl aling, mơch chưt sŭng palây pala, mơch chưt tŭq tamăn singot, mơch chưt u vlơ daq lênh, mơch chưt don a khây pôp ŏh mvâr mviq;27vlam gŏq sinlơ lŏh sat bây chŏnh n'hyoq, gŏq dâq sŭng sinlơ đăng vĭq gĕh, pangot nggâm can'hir daq, gŏq dâq sŭng sinlơ ât sa, tacăt di hyôl nggâm sirôq pôq rang;28vlơ a nŏq, aling ăp sinlơ nŏq, sinlơ tân piêt hao vlơ ănh ăp năr nŏq cồ sinlơ sinâng sĭq lĕq săq khây vatom gŭn.29Gĕh vu lây la-ui nŏq ănh đăng la-ui? Gĕh vu lây vlam vông hlâq nŏq ănh đăng gĕh ŭnh gŭch sŭng nơm hẩng?30Payh pành chĕq lơ vôq, nŏq ănh nhâng lơ vôq sĭq ăp sinlơ la-ui ănh je.31Siđăch Trôq, Vap Siđăch Yêsu de, Candranh gĕh adŏh payom an tât wân lawân, gưt pành ănh đăng nhai mvâr!32U Đa-mach, ganwâr gŭq u tĕh prơn vatau A-rê-ta nĕh cồ jơ palây Đa-mach chĕq nhŭp jơ ănh.33En don a du vôq pông mhlŏh, ănh gĕh yar jưr a la-i saq bây ding palây, en ănh gĕh saq du ntrăch a ti nĕh de.
FAR EAST BROADCASTING COMPANY