1 Corinthians6
1Lăm gĕh vrŭq tăm cađĕh cađông bây ndăng ganai nơm, vu lây nŏq sŭng pôp ŏh thêng chĕq an ôp dôih u vôq măt khây tamun cồ đăng yăh sŏng, en đăng gal u vôq măt khây con sinau Cô Voq?2Ha pôp ŏh đăng gưt pành đe Con Sinau Cô Voq cồ tamun ôp dôih dưnya? En hê dưnya gĕh vlam sinlơ ôp dôih don a pôp ŏh, nŏq pôp ŏh đăng lôch prơn sĭq ăp vrŭq yăq ken heq uy?3Pôp ŏh đăng gưt pành vơn heq cồ tamun ôp dôih khây con gŭn hà? Nŏq nhai ncơnh tât khây vrŭq u vri heq?4Canŏq, cồ pôp ŏh gĕh khây vrŭq tăm yăq văq u dưnya heq, lŭh pôp ŏh chĕq khây tamun nŏq gŭq ôp dôih, nŏq cồ khây tamun gĕh sên gưt đăng gĕh păch lây sŭng vatom gŭn?5Ănh gĕh nhai sĭq sinlơ prênh poq pôp de. Canŏq, gĕh gal đăng gĕh tamun vanŏh lây sŭng pôp ŏh, cồ tamun nhâng gĕh ôp dôih u sŭng ganai pôp ŏh nơm?6Palâq sĭq vlâq, pôp ŏh heq gĕh la'ngŏh vôq dơp lŭh ôp dôih tăm yăq bây pôp ŏh tĭq, en vrŭq nŏq gŭq u vôq măt khây tamun đăng tôq?7Cồ nhâng, ayh vrŭq heq nhâng nŏq cồ du sinlơ tih wil măq lŭng sŭng pôp ŏh en, mvăc pôp ŏh gĕh ăp vrŭq tăm yăq sŭng ganai nơm. Payh yăh vlơ wŏq sinlơ alăh chĕq? Payh yăh vlơ wŏq sinlơ tagat chĕq?8Canŏq, pôp ŏh cồ tamun ôp dôih đăng yăh sŏng bây mvâr mviq, en ôp canŏq bây pôp ŏh nơm!9Ha pôp ŏh đăng gưt pành tamun cồ đăng yăh sŏng nŏq đăng gĕh lăp daq Cô Voq uy? Vâng chĕq vu ta gat; đăng gĕh tamun cani camăn, tamun cŭh chaq khwây yang, tamun lêng con nai sai vu, tamun lapot lapet, tamun ur cơnh ur klô cơnh klô,10tamun can'hưn, tamun cơnh can'hir păch vu de, tamun vanhưl sicot, tamun yăq mvâr, ha tamun ta gat, gĕh saq lăp daq Cô Voq.11En gĕh gŏq săq sŭng pôp ŏh gĕh tamun dân canŏq. En vrêq heq, pôp ŏh lăq gĕh sat rao, lăq gĕh jêng soch jrŏh, lăq gĕh jêng yăh sŏng sŭng săq Siđăch en, cồ Siđăch Krit Yêsu, nggâm don Siđăch Wênh Cô Voq vơn de.12“Ăp sinlơ cồ bây ănh nŏq gĕh ôp,” en đăng gal ăp sinlơ văt tât păch yăh uy. “Ăp sinlơ cồ bây ănh nŏq gĕh ôp,” nŏq ănh nhâng đăng chĕq nơm ôp dĭch an khây sinlơ lây lĕq.13“Păch sa chĕq an klâm talaq iưn, en klâm talaq chĕq vadâng păch sa,” nŏq Siđăch Trôq ôp tayaih lĕq păch heq nggâm păch tĭq. Nhâng rup swan đăng gal chĕq an sinlơ cani camăn uy, nŏq chĕq an Cô Voq, en Cô Voq chĕq ân an rup swan.14Siđăch Trôq gĕh ôp an Siđăch tao rĭh sĭq vlâq, khoi gĕh ôp an vơn gĕh tao rĭh sĭq vlâq don a prơn gŭn Nĕh de.15Pôp ŏh đăng gưt pành rup swan pôp ŏh nŏq cồ ăp vau swan Candranh Krit de? Canŏq, alưr sŏq vau swan Candranh Krit de, ănh gĕh saq jêng nĕh lŭh vau swan ur can'hat de ha đăng? Đăng gĕh saq ôp vrŭq canŏq uy!16Ha pôp ŏh đăng gưt pành vu lây cồ vĭq râm bây ur can'hat nĕh nŏq khoi gĕh jêng du rup bây nĕh hà? Mvăc gĕh chêr: “Var ndu gĕh jêng du rup swan.”17Nŏq vu lây cồ pănggrăp nơm bây Siđăch nŏq gĕh jêng du rup swan gŭn măn bây Siđăch.18Căh plĕh di ngai a sinlơ cani camăn! Ăp sinlơ bưn bap cồ vu ôp gĕh ha đăng nŏq cồ ayh u ling rup swan ngăn, nŏq tamun cồ ôp păch cani camăn nŏq ôp bưn bap bây rup swan nơm nĕh.19Ha pôp ŏh đăng gưt pành rup swan pôp ŏh nŏq cồ nhi cŭh Siđăch Wênh de gŭq sŭng pôp ŏh, cồ Candranh nŏq pôp ŏh wŏq gĕh a Siđăch Trôq? En pôp ŏh đăng hôm sĭq nơm wŏq,20mvăc pôp ŏh gĕh vro săt lŭng en. Canŏq, căh nhŭp rup swan nơm chĕq ôp an Săq Siđăch Trôq gĕh sindraq sindil.
FAR EAST BROADCASTING COMPANY