1 Corinthians16
1Sĭq vrŭq riq jên caih an khây con sinau Cô Voq, ôp bây sinlơ cồ ănh gĕh pađau an khây vatom gŭn u Ga-la-ti, pôp ŏh khoi căh ôp dân canŏq.2Ăp năr vôq twâng, ăp ndu sŭng pôp ŏh căh chĕq lŭh ayh, lăm gĕh chĕq nchêm jên caih puôch pom lây nŏq hê tamun nŏq gĕh paq an puôch pom, chĕq lăm vi ănh tât, lăm nŏq nhâng đăng saq riq păch lây wŏq.3En nŏq, lăm cồ ănh tât, hê pôp ŏh rom nuih khây tamun lây, nŏq ănh săng khây nĕh văt jên caih puôch pom pôp ŏh de nggâm bây sirăq tât Yê-ru-sa-lem.4Hôm hê vrŭq nŏq khoi cồ vrŭq măq mi chĕq ănh saq, nŏq khây nĕh saq simơ bây ănh.5Nŏq ănh nhâng gĕh tât bây pôp ŏh alưr nơm ănh gĕh saq tât Ma-sê-đwan, mvăc ănh gĕh saq găn Ma-sê-đwan.6En nhâng ănh gĕh gŭq vlâq bây pôp ŏh, ha tât daq gŭq lĕq khây tacăt nggưt, chĕq pôp ŏh saq dơp ănh saq trong hê ănh cơnh saq tât vi lây nŏq.7Mvăc ănh đăng cơnh ayh vlam pôp ŏh sŭng lăm dâq heq vlơ trong saq găn ngăn, mvăc ănh sinâng cơnh gŭq mŏq bây pôp ŏh jŏq jong, hê Cô Voq gĕh an.8Nŏq ănh nhâng gŭq vlâq u Ê-phê-sô an tât năr Sinwơi Prăm Jât,9mvăc gĕh du lâm lapông măq hwi nggâm gĕh gŏq păch yăh gĕh pơq lŭh an ănh, nŏq gŏq păch ndây nĕh gĕh păng khăq ănh.10Măt ndây, hê Ti-mô-thê tât, căh sên tât chĕq nĕh gŭq bây pôp ŏh ôp lăm lây chĕq nĕh đăng phŭng candŭh, mvăc nĕh nŏq gĕh ôp vrŭq Cô Voq, dân ca ănh.11Canŏq, vâng gĕh vu lây deng dêh sĭq nĕh vầy. Nŏq căh njưn trong an nĕh saq yăh iên, chĕq nĕh sĭq vlâq bây ănh, mvăc ănh gĕh câp nggơ nĕh nggâm bây khây ganai ndây.12Hôm sĭq tamun pôp ŏh A-bô-lô, ănh lăq lŭh prơn jrông jrâng nĕh chĕq an nĕh saq tât bây pôp ŏh nggâm khây pôp ŏh ndây, nŏq cồ đăng gal nuih cơnh nĕh de uy ôp lăm lây an nĕh tât sŭng dâq heq. An canŏq nĕh nhâng gĕh saq tât lăm gĕh vadâq.13Căh iêh lawân; căh kranh gajăp sŭng sinlơ tôq camvân; căh kram nuih dân ca du mvu klô; căh camhlăng.14Căh chĕq ăp vrŭq pôp ŏh de gĕh ôp lŭh sŭng sinlơ tăm sinđach.15Măt ndây, ơ pôp ŏh, ănh jrông jrâng pôp ŏh (pôp ŏh gưt caniêp Sê-pha-na de, pành khây nĕh cồ tamun daq vôq lĕq tôq Cô Voq u A-cha, bây khây nĕh ayh nơm pađăc nơm lăp ôp vrŭq an khây con sinau Cô Voq),16chĕq an pôp ŏh khoi iêt chăng khây tamun dân ca nŏq bây lĕq săq vu lây cồ gĕh ôp vrŭq simơ nggâm vlam sinlơ hyoq chŏnh.17Ănh vui hơn lŭng sĭq Sê-pha-na, Phốt-tu-na bây A-chai-cơ gĕh tât heq, mvăc khây nĕh gĕh nđăp di lôch păch lây hôm păh pât a tŭq pôp ŏh;18mvăc khây nĕh gĕh ôp an me sĭq vlâq chhu vôq ănh je bây pôp ŏh de. Canŏq, căh wŏq khây tamun dân canŏq.19Khây vatom gŭn u ntĕh A-si gĕh camvŭm păng mơq tât pôp ŏh. A-kwi-la bây Bê-rit-sin, nggâm bây vatom gŭn cồ vatom u nhi khây nĕh de, lĕq nuih talaq khoi gĕh pân mơq pôp ŏh sŭng Cô Voq.20Lĕq săq khây pôp ŏh gĕh camvŭm păng mơq pôp ŏh. Căh khwây ganai don a sinlơ phêp yăh soch.21Camvŭm khwây heq cồ payh ti nơm ănh — Phao-lô.22Hê vu lây đăng tôq sinđach Cô Voq, nŏq tamun nŏq nhâng wŏq sinlơ raq răh! Cŭh Cô Voq khây con, wĭnh Cô tât!23Ngwân sinlơ yăh an ngăn Siđăch Yêsu de gŭq bây pôp ŏh.24Sinlơ sinđach ănh je gŭq bây lĕq săq pôp ŏh sŭng Candranh Krit Yêsu. A-men.
FAR EAST BROADCASTING COMPANY