Romans14
1Ekaawii aatuweyimaahkw an awen ekaa kaa yaaichikaapuut taapwehtamuwinihch. Ekaawii chika uhchi kachiihkaamitunaawaau e ayimitutamekw aniyuuh chekwaayuuh ekaa peyakunihch kaa iteyihtamihiikuyekw.2Peyakw awen mikw e ishinaakuhch chekwaan nika chii miichin iteyihtam. Ekw kutak awen ekaa kaa yaaichikaapuut taapwehtamuwinihch mikw nihtaauchihchikan miichimiyuu miichuu.3An awen ekaa mitun wiyesh kaa iteyihtamihiikut mikw e ishinaakuniyich chekwaayuu e miichit ekaawii chika uhchi aatuweyimeu aniyuuh ekaa mikw e ishinaakuniyich chekwaayuu kaa miichiich. Kaye maak an awen ekaa mikw e ishinaakuniyich chekwaayuu kaa miichit ekaawii chika uhchi wiyaaskuneu aniyuuh aweyuuh mikw e ishinaakuniyich chekwaayuu kaa miichiihch. Wesh Chishemanituuh namui aatuweyimikuyuuh.4Awen chiya kaa wii wiyaaskunimat kutak awen utaapachihaakanh. Anichii mikw e ishinaakuniyich chekwaayuu kaa miichitwaau atushkuweuch Chishemanituuh. Mikw uchimaamh chika wiyeyihtamiyuuh kuiskw e ihtikwe maak ekaa kuiskw e ihtikwe. Kuiskw maak chika ihtuu wesh kaschihuyuuh Chishemanituuh chechii yaaichikaapuuhiikut taapwehtamuwinihch.5Peyakw awen ihtakuniyuuh aniyuuh e chiishikaayikwaauh chihchiwe e iteyihtamihiikut. Kutak awen peyakunihch ishi kanawaapahtam misiwe e chiishikaayikwaauh. Misiwe maak awen chipaa wiyeyihtam taan nihaau che ishi kanawaapahtahk wiya uyuu.6An awen kaa ihtakuniyikwaauh e chiishikaayikwaauh uste e iteyihtamihiikut ishpish kutak, wii chisteyimeu Utipeyihchikeu uyuu e ihtit. Ekw an awen mikw e ishinaakuniyich chekwaayuu kaa miichit wii chisteyimeu Utipeyihchikeu uyuu e ihtit wesh nanaaskumeu Chishemanituuh aniyuu miichimiyuu. Kaye maak an awen ekaa mikw e ishinaakuniyich chekwaayuu kaa miichit wii chisteyimeu kaye wii Utipeyihchikeu uyuu e ihtit. Kaye wiya maak nanaaskumeu Chishemanituu.7Namui waawaach peyakw e tashiihkw chitipeyimisunaanuu e pimaatisiihk. Kaye maak namui waawaach peyakw chitipeyimisunaanuu nepiihkw.8Wesh mekwaach e pimaatisiihkw Utipeyihchikeu chipaa chisteyihtaakuhaanuu. Kaye maak iskutak nipiihkwe wiya chika chisteyihtaakuhaanuu.9Wesh Christ chii nipuu kaye kaau chii pimaatisiyuu chechii utipeyihchikemitutaakut taapishkun aniyuu kaa pimaatisiyich kaye aniyuuh shaash kaa nipiyich.10Chiya maak wii. Chekwaan wehchi wii wiyaaskunit chiichishaan. Chekwaayuu wehchi aatuweyimat. Wesh misiwe chika uhchishkuukaapuushtawaanuu Chishemanituu chechii wiyaaskunitahkw.11Itashteu Chishemanituu utayimuwinihch,E ishpish cheshtinaateyihtaakuhch taapwe e pimaatisiyaan iteu Utipeyihchikeu, misiwe awen nika uchihchiihkunipayishtaakw. Misiwe awen chika maamihchimeu Chishemanituuh.12Misiwe e tashiihkw chika waawiihtamuwaanuu Chishemanituu taan kaa ihtuuhkw kaye maak chekwaayuu aniyuu wehchii ihtuuhkw.13Ekun ekw ishpish wiyaaskunitutaau. Teyakuch chipaa ishi wiyeyihtenaanuu ekaa che uhchi ihtuutamuhkw chekwaan chechii ihtuutaakut chiichishaanuu chechii machituutahk.14E wiicheuk Utipeyihchikeu Jesus ekut wehchi chischeyihtamaan misiwe e ishinaakuhch miichim chechii miichiihkw. Mikw maak chiishpin e ihtakuniyikwe awen chekwaayuu e iteyihtahk ekaa chipaa uhchi naheyihtamihiikuyuuh Chishemanituuh e miichit maak e minihkwet namui kiipaa chipaa uhchi miichuu kaye namui chipaa uhchi minihkweu aniyuu chekwaayuu.15Westuweyihtamihaaute chiichishaan yaapach mikw e ishinaakuhch chekwaan e miichiyin namui chisaachihaau aniyuu e ihtuut. Ekaawii maak chika uhchi ishinaakun chiichishaan chechii wanaatisiit an e ihtiyin mikw e ishinaakuhch chekwaan e miichiyin, wesh chii nipistamaakuu Christ.16Ekaawii kaye chika uhchi ihtuuten chekwaan chechii uhchi machaayimuumitaakuhch anichii ekaa kaa taapwehtahkwaau aat ekaa wiyesh iteyihtamihiikuyin e ihtuutaman an kaa ihtuutaman.17Wesh anite Chishemanituu uchisheuchimaawinihch taapaa namayeyuu taan e ishi miichisut awen maak chekwaayuu menihkwet naashch kenawaapahtaakanuhch. E kuiskutaatiisiihkw kaye e miyu wiicheuhkwaauh awenichii ekw maak e miyeyihtamuhkw chitehiinaahch eukuu chihchiwe e iteyihtaakuhch Chishemanituu uchisheuchimaawinihch. Payehchi Ahchaahkw maak miiweu uyuu chechii ishi pimaatisiinaanuwiyich.18An maak awen kaa atushkuwaat Christ uyuu e ishi pimaatisiit Chishemanituu naheyihtamiheu. Kaye maak chika chisteyimikuu kutak aweyuuh.19Suuhk maak muush wiishi pimaatisiitaau chechii wiichihiihkwaauh kutakach awenichii chechii miyu wiicheututwaau.20Ekaawii chika uhchi wanaachihtaawaan taan kaa ishihtaawaat Chishemanituu chiichishaan upimaatisiiwiniyuu. Misiwe miichim payehkan mikw maak ekaawii miich chekwaan che ihtuutaakuukwe chiichishaan chechii machituutahk.21Uste chika miywaau ekaa chechii miichiyin wiyaas kaye ekaa che minihkweyin chekwaan che ihtuutaakuukwe chiichishaan chechii pahchishihk. Ekaawii chika uhchi ihtuuten chekwaan che ihtuutaakuukwe chiichishaan chechii pahchishinit.22Ekush mikw Chishemanituu ekw maak chiya chika chischeyihtenaawaau taan e ishi taapwehtaman chekwaayuu chipaa miichuu awen kaye taan aniyuuh ekaa chipaa uhchi miichuu kaye maak chekwaayuu chipaa chii minihkweu kaye taan aniyuuh ekaa chipaa uhchi minihkweu. Miyeyihtam an awen kaa cheshtinaateyihtahk kuiskw e ishinaakuniyich taan e ihtit.23An awen yaapach kaa miichit miichimiyuu e iteyihtahk ekaa chipaa uhchi miichuu ihtakuniyuu e ishi ataameyihtaakusit aniyuu e ihtit. Wesh ihtuutam aniyuu chekwaayuu e taapwehtahk ekaa chipaa uhchi ihtuutam. Michihpin e ihtuutamuwaauhkwe chekwaan e taapwehtamukw ekaa chipaa uhchi ihtuutenaanuu chimachituutenaanuu.
Canadian Bible Society