Romans12
1Aniyuu e ishpish mishaayich Chishemanituu uchishewaatisiiwin, chinituweyimitinaawaau, niichishaanitikw, chechii pachishteyihtamuwekw Chishemanituu chipimaatisiiwinawaauh muyaam e pimaatahkwaauh miiwewinh e ishinaakuhkwaauh, e payehkahkwaau kaye e naheyihtamihiikut Chishemanituu. Eukw chipaa ihtinaawaau chihchiwe chechii ishi nuuchiishtuwekw Chishemanituu.2Ekaawii nispituwaahkuch taan e ishi pimaatisiitwaau anichii ekaa kaa taapweyimaatwaau Chishemanituuh. Teyakuch pachishtinaakw Chishemanituu aahchiiuh chechii iteyihtaakuhiitaakw e uschihtaat taan e ishi maamituneyihtamuwekw. Ekw maak che chischeyihtamuwekw Chishemanituu utiteyihtamuwin, chika chischeyihtenaawaau chekwaan meywaashiyich kaye chekwaayuu neheyihtamihiikut Chishemanituu, kaye maak aniyuuh chekwaayuuh mitun tekash e kuiskunaakuhkwaauh.3Chishemanituu nichii chishewaatutaakw e chii miit chechii atushkuukw. Ekun maak wehchi ititakuch misiwe e tashiyekw ekaa uste chechii iteyimisuyekw taan chipaa iteyimisunaawaau. Kuiskw wiishi maamituneyimisukw. Misiwe e tashiyekw chika wiyeyihtenaawaau taan taapwe chechii ihtuutamekw. Uu maak e wiyeyihtamekw chika wii nanaakatuweyihtenaawaau taan kaa ishpish miitaakw Chishemanituu taapwehtamuwiniyuu.4Peyakuniyuu awen wiiyuu. Nanaahkuu mikw ishi paschesiiwiniyuu aniyuu wiiyuu. Kaye nanaahkuu itaapataniyuu taan e ishi papaschesiiwiniyich.5Ekun maak nuusem e ishinaakusiihkw. Misiwe chipeyakunaanuu Jesus Christ e ihtaat. Aat maak e mihchetiihkw yaapach peyakw miiyuu chitishinaakusinaanuu. Misiwe maak e tashiihkw ekute e ishi wiichihiiweyihkw uu miiyuu.6Misiwe e tashiihkw nanaahkuu miiwewinh chichii miikunuu Chishemanituu. Chipaa aapachihtaanaanuu maak uyuuh miiwewinh. Kaa miyaakanuukwe awen chechii ayimishtamuwaat Chishemanituuh e wiihtamuwaat aweyuuh taan e itikuwiyich Chishemanituu ekun chipaa ihtuu aniyuu taan e ishi taapwehtahk chechii ihtit.7Kaa miyaakanuukwe awen naashch chechii miyu wiichihaat aweyuu ekun kiipaa aniyuu chipaa ihtuu. Kaa miyaakanuukwe awen chechii chiskutamaachet chipaa chiskutamaacheu.8E ihtaakwe awen e chii miyaakanuut chechii siihchimuwet taanit ekaa waa saapeyihtaakanuyich ekun chipaa ihtuu. Kaa miyaakanuukwe awen chechii waawiihchihaat aweyuuh taan e ishi nuuhtepayiyich ekush kata wii weyuuch miiweu. Kaa miyaakanuukwe awen chechii niikaanishkaachet suuhk chipaa wii kaschihuu aniyuu e itaapatisit. Ekw maak kaa miyaakanuukwe awen chechii wiichihaat kaa chistimaatisiyich maak aniyuuh kaa misimeyihtamiyich chipaa miyeyihtam aniyuu e ihtuutahk.9Chihchiwe saachihaahkuch awenichii. Uhkaateyihtamukw an chekwaan kaa maayaatahch. Mamechiminamakw an chekwaan meywaashich.10Saachihiitukw wesh misiwe chiwiichishaanihtunaawaau. Chisteyimitukw chitehiiwaahch.11Suuhk aashihcheyihtamukw e aapatisiyekw. Ekaawii chika uhchi chihtiminaawaau. Suuhk aashihcheyihtamukw chitahchaahkuwaahch. Atushkuwaahkw Utipeyihchikeu.12Chitaspeyimututawaawaau Chishemanituu muush maak miywaatamukw. Suuhk siipiiwesikw nenehkaateyimuyekw. Muush kaye ayimihaakw.13Iskutak niyuuhtepayitwaauh anichii kaa taapwehtahkwaau chekwaayuu miyaahkuch taan e ishi nuuhtepayitwaau. Muush che wii piihtakahekuch awenichii ekaa e ihtakuniyich taanit che ihtaatwaau.14Shaweyimaahkuch anichii kaa wanituutaataahkuch. Shaweyimaahkuch, ekaawii machaachimaahkuch.15Wiich miywaatamuumaahkuch anichii kaa miywaatahkwaau. Wiich misimeyihtamuumaahkuch anichii kaa misimeyihtahkwaau.16Misiwe e tashiyekw suuhk wii miyu wiicheutukw. Ekaawii chika uhchi chihkaateyimunaawaau. Ekaawii nakaawiikw chechii wiichewekuch anichii naashch ekaa kaa aapateyimikutwaau aweyuuh. Ekaawii chika uhchi iteyimisunaawaau naashch e iipwaahkaayekw.17Aahkuhiiske awen ekaawii yaaitei taapishtuu taan kaa ishi aahkuhiisk. Teyakuch wii chischeyihtamihiiwe taapwe e miyutuutaman.18Kwaast che ishpish chii ihtuwane, kuchihtaa misiwe awen chechii miyu wiicheut.19Ekaawii nihtaa taapishtuwaahkw awen e machituutaataakw, niwiichewaakanitikw. Teyakuch tawiishtamuwaahk Chishemanituu utaahkuyuwesuwin. Wesh itashteu Chishemanituu utayimuwinihch,Niya nika taapishtaachen e machituutawaakanuut awen, iteu Utipeyihchikeu. Niya nika waweshihaau awen.20Teyakuch maa ihtuutah uu kaa itashtech Chishemanituu utayimuwinihch,E siiweyikwe an awen kaa uhkaatisk, ashamah. Waa minihkwekwe, minihii. Wesh uyuu ihtuutuute, naashch taapwe chika pimaameyimuhaau.21
Ekaawii chika shaakuuchihiikun chekwaan e maayaatahch. Aspashtaah teyakuch an kaa maayaatahch e miyutuutamaacheyin.
Ekaawii chika shaakuuchihiikun chekwaan e maayaatahch. Aspashtaah teyakuch an kaa maayaatahch e miyutuutamaacheyin.
Canadian Bible Society