Revelation5
1Ekw kaa waapahtamaan masinahiikan e chii tihtipiyehchinikanuuhch. An awen kaa apit anit chisheuchimaau tehtapuwinihch chii tahkunam aniyuu masinahiikaniyuu. Iituu anite chii masinahiikaanuukupane an masinahiikan kaye chii chiishaawaach pasakuhiikanuukupane niishwaashch chiishaawaach pasakuhiikanh e chii aapatahkwaau.2Ekw kaa waapamak e suuhcheyihtaakusit enchil. Chii iteu maak e mista chishewet, “Awen e ihtaat e tepicheyihtaakusit chechii manahk aniyuuh chiishaawaach pasakuhiikanh ekw maak chechii aapuhwetinahk aniyuu masinahiikaniyuu.”3Namui maak awen uhchi ihtaau anite kihchikiishikuhch maak utah aschiihch maak nitaamihch aschiihch chechii ihtuutahk chechii aapuhwetinahk aniyuu masinahiikaniyuu chechii ayimihtaat.4Nichii mista maatun maak wesh namui uhchi miskuwaakanuu awen e tepicheyihtaakusit chechii aapuhwetinahk aniyuu masinahiikaniyuu kaye chechii ayimihtaat.5Ekw peyakw an kaa niikaaneyihtaakusit chisheinuu kaa iishit, “Ekun ishpish maatuh. Anite maa iitaapih. Kanawaapam maa an Mistatim kaa ishinihkaataakanuut. Judah e ihtaayich uhtiskaanesuu eyuu maak chisheuchimaau David e ihtaayich uhchi aanischepayuu aniyuu wechii chisheuchimaaut. Wiya chii shaakuuchiheu misiwe aniyuuh kaa uhkaatikut. Wiya maak chika chii aapuhwetinam aniyuu masinahiikaniyuu kaye wiya chika chii manam aniyuuh chiishaawaach pasakuhiikanh.”6Ekw kaa waapamak Maanishchaanish tipiskuuch e niipuut aniyuu chisheuchimaau tehtapuwiniyuu, anit mekwesiin e ihtaayich aniyuu neu kaa pimaatisiitwaau aweyuuh ekw maak aniyuuh niishtunuu neu kaa chisteyihtaakusiyich chisheinuuh. Chii nishituunaakusuu peyakwaau e chii nipahaakanuukupane. Niishwaashch chii tahtiniyuuh uteskanh kaye niishwaashch chii tahtiniyuuh uschiishikuh. Aniyuuh maak niishwaashch uschiishikuh eukun aniyuuh niishwaashch kaa tashiyich utahchaahkw Chishemanituu misiwe e ispichiskamikaayich aschiiyuu kaa itishahwaat.7Ekw an Maanishchaanish kaa naataat aniyuuh anit chisheuchimaau tehtapuwinihch kaa apiyich ekw kaa utinamuwaat aniyuu masinahiikaniyuu unihiiwiniihch kaa tahkunimiyich.8Iskutak maak kaa utinamuwaat aniyuu masinahiikaniyuu anichii kaa pimaatisiitwaau awenich kaye anichii niishtunuu neu kaa chisteyihtaakusitwaau chisheinuuch chii uchihchiihkunipayihuuch aniyuuh Maanishchaanisha e ihtaayich. Misiwe paahpeyakw anichii neu kaa pimaatisiitwaau awenich kaye anichii chisheinuuch chii ayaauch ayimiheu chistuhchikanisha kaa miyuuhtaakuniyikwaauh ekw maak e muutaayaapiskaayikwaau wiyaakanh e ushaaushuuliyaawaapiskuuniyikwaauh. Chekwaayuu e wiihchimaakusiyich chii asteyuu anit aniyuuh wiyaakanh. Aniyuu maak chekwaayuu kaa wiihchimaakusiyich eukw uyuuh utayimihchikewinawaauh anichii kaa taapwehtahkwaau.9Anichii maak neu kaa pimaatisiitwaau awenich kaye anichii niishtunuu neu kaa chisteyihtaakusitwaau chisheinuuch chii nikamuuch nikamuwiniyuu ekaa nihtaa eshkw uhchi nikamunaanuyich. Maau kaa itahamaasutwaau, “Chiya, Maanishchaanish, chitepicheyihtaakusin chechii utinamin an masinahiikan. Chitepicheyihtaakusin chechii maniman e ishi chiishaawaach pasakuhiikanuuhch. Wesh chiya chichii nipahiikuun. Chimihkuhch maak ekut kaa uhchi wiihkuchihiitwaau awenichii misiwe e itiskaanesitwaau kaye misiwe e ishi maamuuteushiitwaau kaye nanaahkuu e ishi ayimitwaau, Chishemanituuh chechii utiiniimitutaakutwaau.10Misiwe chichii maamuunaauch anite e ihtaayin ishi chechii atushkuwaatwaau Chishemanituuh e ayimiheuchimaau aapatisitwaau. Chika uchimaauch maak utah aschiihch.”11Ekw miin kaa iitaapiyaan ekw kaa pehtuukwaau e mihchetitwaau enchilich. Namui chipaa uhchii achimaakanuuch kaa ishpish chii mihchetitwaau. Chii waaskaakaapuuch aniyuu chisheuchimaau tehtapuwiniyuu kaye aniyuuh neu kaa pimaatisiyich aweyuuh chii waaskaakaapuushtaweuch ekw maak aniyuuh kaa niishtunuu newiyich kaa chisteyihtaakusiyich chisheinuuh.12Chii chisheweuch maak e nikamutwaau, “An Maanishchaanish kaa nipahaakanuut tepicheyihtaakusuu wiya chechii ayaat suuhkaatisiiwiniyuu, miisitisiiwiniyuu, kachehtaaweyihtamuwiniyuu, maskushiiwiniyuu, chishtaachimikusiiwiniyuu, chisteyihtaakusuwiniyuu, kaye shaweyihchichewiniyuu.”13Ekw kaa pehtuukwaau misiwe awenich anite kihchikiishikuhch kaye misiwe awenich kaye awesiishach aschiihch kaye anite nipiihch kaye misiwe e ispichiskamikaayich aschiihch kaa ihtaatwaau e nikamutwaau, uyuu e itwetwaau, “An awen kaa apit anit chisheuchimaau tehtapuwinihch kaye an Maanishchaanish kaachiche chika shaweyimaakanuuch kaye chika chishtaachimaakanuuch kaye chika chisteyihtaakuhaakanuuch kaye chika suuhkaatisiyuuch kaachiche kaye kaachiche.”14Ekw anichii neu kaa pimaatisiitwaau awenichii “Amen” kaa itwetwaau ekw anichii kaa chisheinuutwaau chii pahchishinuuch kaye chii nuuchiishtuweuch Chishemanituuh kaye aniyuuh Maanishchaanisha.
Canadian Bible Society