Revelation16
1Ekw kaa pehtawak awen anite chisheayimiheukamikuhch e uhchi pehtaakusit e ayimit. Chii chisheweu an awen. Chii iteu aniyuuh niishwaashch kaa tashiyich enchil, “Maachiikw. Anite aschiihch ishi kutapinamukw aniyuu niishwaashch kaa muutaayaakwaau wiyaakanh anit e ihtakuniyich Chishemanituu utaahkuyuwesuwin.”2Ekw an niishtam enchil kaa kutapinahk aniyuu uwiyaakan anite ishi aschiihch. Anichii maak kaa ayaawaatwaau aniyuuh machi aweshiisa uchiisaawaachihchikaniyuu kaye kaa maamihchimaatwaau aniyuu manituuhkaan mwehch an machi awesiis e ishinaakusit kaa ishihaakanuyich chii umichiyuupayuuch naashch e maayaasinaakuniyikwaau kaye naashch e aahkuhiikutwaau aniyuu taan kaa ishi umichiiupayitwaauh.3Ekw miin kutak enchil kaa kutapinahk uwiyaakan. Anite chihchikamiihch ekute kaa ishi kutapinahk. Ekw an nipii kaa ati suuhkwaakamihch muyaam awen e nipit umihkw ekun kaa ishinaakuhch. Misiwe maak chekwaan anite chihchikamiihch kaa ihtakuhch chii nipiimakan.4Ekw an nishtu kaa ihtaat enchil kaa kutapinahk uwiyaakan anite e ihtakuniyikwaauh siipii kaye anite wehchi muuschichuuniyich nipiiyuu. Misiwe maak chii ati suuhkwaakamiyuu aniyuu nipiyuu.5Nichii pehtawaau maak an enchil misiwe nipiiyuu kaa uchimaahkahtahk e itwet e maamihchimaat, “Chishemanituu tekash kuiskw chitihtin uu kaa ishi wiyaaskunicheyin, chiya mikw chipayehchisiyin, chiya kaa ihtaayin kaye muush kaa pechi ihtaayin.6Wesh naapeuh chii nipahiikuuch anichii uchischiwehiichesuuch kaye anichii kaa taapwehtahkwaau. Ekw maak, chiya Chishemanituu, maayitwaau mihkuyuu chechii minihkwetwaau anichii awenich kaa nipahaatwaau uyuuh. Tepicheyihtaakuniyuu maak uyuu chechii ihtuutuutwaau aniyuu e chii pechi ihtitwaau.”7Ekw anite pachishtinicheunaapiskw e ihtakuhch ekute kaa uhchi pehtuuk awen e itwet, “Utipeyihchikeu, Chishemanituu chiya maauch kaa suuhkaatisiyin. Taapwe kuiskw chit ishi wiyaaskunaauch awenichii e wiyaaskunitwaau. Taapwe iteyihtaakuniyuu kaye chechii wiyaaskunitwaau.”8Ekw an neu e ihtaat enchil piisimuhch kaa ishi kutapinahk uwiyaakan. Piisim chii pachishtinaakanuu chechii ishkwaaswaat aweyuu tekash e ishpish wiisikaastuwet.9Chii ishkwaasuuch maak awenichii e ishpish wiisikaastuweyich piisim. Ekw kaa paashtaamaatwaau Chishemanituuh aniyuuh kaa ayaayich tipeyihchichewiniyuu uyuu chechii ishi nanehkaateyimunaanuyich. Mikw maak namui awen uhchi chishtaachimeu Chishemanituuh kaye namui uhchi kweskaatisiyuu.10Ekw an Niyaayinuu kaa ihtaat enchil kaa kutapinahk uwiyaakan anite ishi aniyuu machi awesiisa uchisheuchimaau tehtapuwiniihch. Chii tipischipayuu maak anite an machi awesiis uchimaau utaschiihch. Chii maamaakuhtamuch awenichii uteyiniiwaau e ishpish wiisacheyihtahkwaau11ekw kaa paashtaamaatwaau Chishemanituu kihchikiishikuhch kaa ihtaayich aniyuu e wiisacheyihtahkwaau ekw maak umichiiwaauh uhchi. Mikw maak namui yaapach uhchi kweskaatisiyuuch.12Ekw an kutwaashch kaa ihtaat enchil kaa kutapinahk uwiyaakan. Anite aniyuu siipiiyuu Euphrates kaa ishinihkaateyich ekute kaa ishi kutapinahk aniyuu uwiyaakan. Ekw an siipiih kaa paahkupayihch mikw chechii ishi aashuuhtetwaau anit anichii chisheuchimaauch waapanuutaahch che uhtuhtetwaau, anichii che pechi nitupayitwaau.13Nichii waapamaauch maak nishtu machiahchaahkuch naashch e wiineyihtaakusitwaau, muyaam ayikahch e ishinaakusitwaau. Peyakw an aniyuuh mista manichuush utuuniihch chii uhchi wiiwiipayuu, ekw kutak aniyuuh machi awesiisa utuuniihch, ekw an nishtu kaa ihtaat aniyuuh machi uchischiwehiichesuu utuuniihch ekute kaa uhchi wiiwiipayit.14Wesh eukw uchii machiahchaahkuch maamishkaach kaa ihtitwaau. Misiwe e tashiyich chisheuchimaau utah aschiihch nituu maamuuneuch chechii pechi maasihcheyich utihchipayiche aniyuu Chishemanituu maauch kaa suuhkaatisiyich kaa chisteyihtaakuniyich uchiishikaamiyuu.15Utipeyihchikeu maak iteu, “Muyaam chimutisk e iteyihtaakuniyich e takushihk ekun che iteyihtaakuhch niya takushiniyaane. Chika shaweyihtaakusuu maak an awen ekaa che kauhkusit mekwaach e ashuwaapit kaye che ayeskuushtaakwe uchekwaanimh mikw chechii ishi pushchishkahk ekw maak namui chika uhchi musheshkateu wiiwiite chechii pimaameyimut mushe anite e waapamaakanuut.”16Anichii maak machiahchaahkuch chii maamuuneuch aniyuu chisheuchimaau anite aniyuu wachiyuu Armageddon kaa ishinihkaateyich Hebrew e ishi ayiminaanuuhch.17Ekw an niishwaashch kaa ihtaat enchil kaa kutapinahk aniyuu uwiyaakan anite mushechiisikuhch ishi. Chii uhchi ayimuu maak awen anite chisheuchimaau tehtapuwinihch piihtakamihch chisheayimiheukamikuhch kaa ihtakuniyich e uhtahtaakusit. Chii chisheweu e itwet, “Shaash maak chiishihtaakanuu.”18Chii uhchi waaswaastepayuu maak. Chii pehtaakuniyuuh upehtaakusuwinawaauh awenichii. Nimischuuch chii pehtaakusuuch. Kaye chii mista kuihkun. Namui wiiskaat uhchi ihtakun e iteyihtaakuhch e kuihkuhch kaa ishpish pechi pimaatisiitwaau awenichii. Eukw uu mwaauch kaa kushtaatikuhch e kuihkuhch.19Ekw an kaa chisteyihtaakuhch ihtaawin Babylon kaa ishinihkaatech nistuyich kaa ishi pahkwepayihch. Misiwe ihtaawinh aschiihch kaa ihtakuhkwaauh chii wanaatinh. Chishemanituu maak namui uhchi wanichischisiitutam aniyuu ihtaawiniyuu Babylon kaa ishinihkaateyich. Chii ihtuutaweu aniyuu aweyuuh anit kaa ihtaayich chechii minihkweyich aniyuu shuuminaapuuyuu anit uminihkwaakanihch uhchi. Eukw uyuu minihkwaakaniyuu anit e ihtakuniyich utaahkuyuwesuwin.20Misiwe ministikwa kaye wachiih chii paasikunaakunh.21Ekw maak kaa mista miskumitaahch. Anichii maak maskumiyich kaa paahpahchishihkwaau paahpeyakw wiyesh mitaahtumitanuu tipaapekahiikan chii ispihtinikutuuch. Chii maahtakuhukuuch maak awenichii utah aschiihch aniyuuh maskumiih chiishikuhch kaa uhchi pahchishiniyich. Anichii maak awenich chii paashtaameuch e ishpish mista chishuwaahiikutwaau Chishemanituu taan kaa ishi nanehkaateyimuuhiikutwaau aniyuu e waahkunipayiyich, wesh naashch taapwe chii nanehkaateyimuch mekwaach uyuu kaa ispayihch.
Canadian Bible Society