Revelation14
1Iskutak miin kaa iitaapiyaan nichii waapamaau an Maanishchaanish anite aniyuu wachiyuu Zion kaa ishinihkaateyich e niipuut. Peyakwaau mitaahtumitanuu miin nemitanuu neuwaau chishe mitaahtumitanuu chii tashiyuu aweyuuh anit e ihtaat. Aniyuuh maak aweyuuh uskahtikawiihch chii masinaateyuu aniyuuh Maanishchaanish utishinikaasuwiniyuu ekw maak Chishemanituu Uhtaawiimaauh utishinikaasuwiniyuu.2Ekw kaa pehtamaan pehtaakusuwin kihchikiishikuhch e uhchi ayimit awen muyaam nipiih e mista kaschi pahchishtihch e itihtaakuhch kaye muyaam nimischuuch e chistutwaau e itihtaakuhch. An pehtaakusuwin kaa pehtamaan muyaam e itihtaakuniyich awenichii e metuwetwaau aniyuuh kaa miyuuhtaakuniyikwaauh ayimiheu chistuhchikanh ekun kaa itihtaakuhch.3Nichii waapamaauch maak anichii peyakwaau mitaahtumitanuu miin nemitanuu neuwaau chishe mitaahtumitanuu kaa itashitwaau awenichii e uhchishkuukaapuushtamuwaatwaau Chishemanituuh uchisheuchimaau tehtapuwiniyuu kaye aniyuuh niishtunuu neu kaa chisteyihtaakusiyich chisheinuuh e uhchishkuukaapuushtawaatwaau kaye aniyuu kaa newiitwaauh kaa pimaatisiitwaau aweyuuh. E uskaayich nikamuwiniyuu chii nikamuuch. Namui maak kutak aweyuuh chika chii chischeyihtamiyuuh aniyuu nikamuniyuu kaa nikamutwaau mikw wiyawaau anichii peyakwaau mitaahtumitanuu miin nemitanuu neuwaau chishe mitaahtumitanuu kaa itashitwaau. Wesh eukw uchii kaa pimaachihiikutwaau Chishemanituu aschiihch uhchi.4Eukunich uchii ekaa uhchi wiinihiikutwaau iskweuh, payehchisiiwinihch kaa ishi kanuweyimisutwaau. Muush nuushuushkuweuch aniyuuh Maanishchaanisha taanite mikw e ituhteyich. Chii pimaachihaakanuuch aschiihch uhchi wiyawaau maak niishtam chii pachishtinaakanuuch Chishemanituu ekw maak Maanishchaanisha e ihtaayich.5Namui nihtaa uhchi nanatayuuch, ekaa nihtaa uhchi waniihtitwaau ishi kanawaapamikuuch Chishemanituu.6Ekw miin kutak enchil kaa waapamak naashch e ispahahk ishpimihch anite e pimihiyaat, e pechi waawiihtamuwaat aniyuuh aschiihch kaa ihtaayich miyu tipaachimuwiniyuu muush che taapwemakaniyich. Misiwe aweyuuh chika wiihtamuweu, misiwe itiskaanesiyich, misiwe e ishi ayimiyich, nanaahkuu e ishi maamuuteushiyich.7Chii iteu an enchil e chishewet, “Maamihchimaahk Chishemanituu kaye chisteyimaahkw. Wesh shaash utihchipayuu anit che wiyaaskunaat misiwe aweyuuh. Nuuchiishtuwaahkw an kaa ushihtaat chiishikuyuu, aschiiyuu, chihchikamiyuu ekw maak misiwe e uhchi muuschichuuniyich nipiiyuu.”8Ekw miin kutak enchil kaa waapamak e uhchi pimihiyaat kaye wiya naashch e ispahahk ishpimihch anite e pimihiyaat. Chii iteu uu enchil, “An naashch kaa chisteyihtaakuhch ihtaawin Babylon kaa ishinihkaatech tekash chii wanaachihtaakanuu. Wesh ekut an ihtaawin naashch kaa wehtahch misiwe e itiskaanesitwaau awenichii ekaa mitun chechii nakaawiistahkwaau wiinisuu pimaatisiiwiniyuu mwehch kaa ihtiyich anit kaa ihtaayitwaauh. Aniyuu maak kaa ihtuutawaatwaau muyaam e minihaatwaau e suuhchisiimakaniyich shuuminaapuuyuu ishinaakuniyuu.”9Miin kutak enchil chii uhchi pimihiyaau naashch e ispahahk ishpimihch anite e ishi pimihiyaat. Ekw maamuu niishtu enchilich kaa nuukusitwaau. Ekw uu nishtu e ihtaat enchil kaa itwet e chishewet, “An awen che nuuchiishtuwaakwe aniyuuh machi awesiisa ekw maak aniyuuh manituuhkaan muyaam an machi awesiis e ishinaakusit kaa ishihaakanuyich kaye che pachishtinisukwe chechii chiishaawaachihaakanuut uskahtikuhch maak utihchiihch10kata muushihtaaweu taan e ishi chishuwaahaat Chishemanituuh. Aniyuu maak che ishi muushihtaawaat e chishuwaahaat Chishemanituuh mwehch awen e minihaakanuut shuuminaapuuyuu chika iteyihtaakuniyuu. Uyuu maak uchishuwaasuwin Chishemanituu tekash chiishi kutapinam anit aniyuu minihkwaakaniyuu anit e ishinaakuniyich e ihtakuniyich utaahkuyuwesuwin. Misiwe maak anichii che nuuchiishtuwaakwenich aniyuuh machi awesiisa kaye aniyuuh machi awesiis manituuhkaan kaye che pachishtinisuwaakwenich chechii chiishaawaachihaakanuutwaau uskahtikuwaahch maak utihchiiwaahch chika nanehkaateyimuhaakanuuch ishkuteyuu ekw maak usaawaapisch asiniih kaa wiinimaasuyich e ishkwaaswaakanuyich e aapatisiyich uhchishkuu aniyuuh Maanishchaanisha ekw maak aniyuuh utenchilamiyuuh kaa payehchisiyich e ihtaayich.11Aniyuu maak e kwaapahteyich aniyuu ishkuteyuu kaa nanehkaateyimuhiikutwaau kaachiche kata uhchi uhpaapahtepayuu. Namui maak nihtaa kata uhchi ihtakuniyuu taanit che aasteyeyihtahkwaau aniyuu e nanehkaateyimutwaau uchii kaa nuuchiishtuwaatwaau uyuu machi awesiisa kaye aniyuuh machi awesiis manituuhkaan. E chiishikaayich kaye e tipiskaayich chika nanehkaateyimuuch.”12Ekut uu wehchi nituweyihtaakusitwaau kaa taapwehtahkwaau, anichii kaa nanihiihtamuwaatwaau uwiishuwewinh kaye ekaa kaa puuniitwaau e taapweyimaatwaau Jesus ekaa chechii nuuhtipuuniitwaau uyuu e ihtitwaau.13Miin chekwaan kaa ispayihch. Nichii pehtawaau awen kihchikiishikuhch e uhchi ayimit. Mwaau kaa itwet, “Masinaha uu. Ute ishi niishtamihch shaweyihtaakusuuch anichii che nipitwaau eshkw e wiichewaatwaau Jesus.” Ekw Kaa payehchisiit Ahchaahkw kaa itwet, “Ehe, taapwe shaweyihtaakusuuch. Chii aayimihuch e nuushuushkuwaatwaau Jesus ekw maak ekw che ayiwepitwaau. Taan e ishi maamuu kanawaapahtaakanuyich kaa ishi pechi aapachihiikutwaau Chishemanituu kata wiicheukuuch.”14Miin kaa iitaapiyaan ekw kaa waapamak e waapisit kaskawanishkw. Nichii waapamaau maak awen e tehtapit aniyuuh kaskawanishkwa mwehch naapeu e ishinaakusit. E ushaaushuuliyaaunaapiskuuniyich chisheuchimaau astutiniyuu chii chichishkam an awen. E kaasaayich chimiskushaawesikaniyuu chii tahkunam.15Ekw miin kutak enchil kaa waapamak. Uu wii enchil aniyuu chisheayimiheukamikuyuu kihchikiishikuhch kaa ihtakuniyich ekute kaa uhchi wiiwiit. Ekw kaa itaat aniyuuh kaskawanishkuhch kaa tehtapiyich, “Utin an chichimiskushaawesikan, che nituu kachemisaman nihtaauchihchikanh wesh shaash utihchipayuu chechii maamuushtinikanuuhkwaauh. Shaash tekash chiishi nihtaauchinh.” Chii chisheweu aniyuu e itwet an enchil.16Ekw an kaa tehtapit aniyuuh kaskawanishkwa kaa wepipayihtaat aniyuu uchimiskusaawesikan anite ishi aschiihch. Misiwe maak e ishpishaayich aschiiyuu chii chimisham taan kaa ishi nihtaauchiniyich.17Ekw miin kutak enchil kaa waapamak e uhchi wiiwiit aniyuu chisheayimiheukamikuyuu kihchikiishikuhch kaa ihtakuniyich. Kaye wiya chii tahkunam e kaasaayich chimiskushaawesikaniyuu.18Iskutak maak kaa pechi wiiwiit uu enchil ekw miin kutak enchil kaa wapamak anite aniyuu pachishtinicheunaapiskuyuu kaa ihtakuniyich e uhtuhtet. Eukw uu enchil tepeyihtahk ishkuteyuu. Ekw uu enchil kaa tepwaataat aniyuuh enchil kaa tahkunimiyich e kaasaayich chimiskushaawesikaniyuu. Chii chisheweu aniyuu e tepwaataat. Chii iteu maak aniyuuh enchilh, “Utinah an chichimiskusaawesikan che maamuushtinaman aniyuuh e maamuumahkwaau miinishah. Wesh shaash utihchipayuu chechii maamuushtinikanuuhkwaauh. Shaash miywaauh chechii maamuushtinikanuuhkwaauh.”19Ekw an enchil kaa wepipayihtaat aniyuu uchimiskusaawesikan anite ishi aschiihch. Ekw kaa maamuushtinahk aniyuuh miinishah. Anite maak che takuhiikanuyikwaauh ekute kaa ishuwepinahk anite weweshihaat Chishemanituu aweyuuh.20Wiiwiitamihch an ihtaawin ekute kaa takuhiikanuuhkwaau aniyuuh miinishah. Iskutak maak kaa takuhiikanuuhkwaau mistahii chii uhchi kuikwaasikuun mihkw anit an nihaau kaa takuhiikanuuhkwaau aniyuuh miinishah. An maak e ishi kuikwaasikuuhch mikw wiyesh niyaayinu misit chii ati ispihtahiipeu. Wiyesh maak niishwaamihtaahtumitanuu aschiiyuu tipahiikan chii iskwaache pisikw mihkw e ishinaakuhch.
Canadian Bible Society