Revelation12
1Ekw kaa nuukuhch naashch e maskaasinaakuhch chischinuwaapahtiiwewin anite kihchikiishikuhch. Nichii waapamaau iskweu, piisimh e utakuhpit e ishinaakusit kaye tipischipiisim shiipaa usitihch e ihtaayich. Chisheuchimaau astutiniyuu chii chichishkam niishushaap achahkusha e chikamuyich.2Chii kanuweyimaausuu an iskweu. Mekwaach maak chii aahkusuu che waapamaausut naashch maak chii wiisacheyihtam. Chii aashihkweu e ishpish aahkusit.3Miin kutach chischinuwaapahtiiwewin chii uhchi nuukun anite kihchikiishikuhch. Nichii waapamaau mista manichuush e mihkusit niishwaashch e tahtiniyikwaau ustikwaanh kaye mitahtu e tashiyich uteskan. Misiwe maak e tahtiniyikwaau aniyuu ustikwaan chisheuchimaau astutiniyuu chii chichishkam.4Chii pahkuchipiteu peyakw aniyuuh e naanishtiyich achahkusha anite chiishikuhch uhchi usuu e aapachihtaat ekw anite aschiihch kaa ishuwepinaat. Chii niipuu uhchishkuu aniyuu iskweu e ihtaayich mekwaach e aahkusiyich e ashuwaapamaat che ishpish pimaatisiyich aniyuuh awaasha chechii muwaat iskutak pimaatisiichen.5Ekw an iskweu kaa aahkusit, naapesha chii ayaaweu. Eukw maak uu mitun tekash che uchimaaututawaayich misiwe e itiskaanesiyich aweyuu utah aschiihch. Wiipach maak kaa pimaatisiit an awaash tiiwehch Chishemanituu e ihtaayich chii ishi utinaakanuu anite e ihtakuniyich Chishemanituu uchisheuchimaau tehtapuwin.6Ekw an iskweu anite pakwaatiskamikaahch ekute kaa itashimut, anite kaa ayeskustimaakut Chishemanituu che ihtaat. ekute maak anite che kanuweyimaakanuut peyakwaau chishemitaahtumitanuu niishwaa mitaahtumitanuu miin nikutwaashumitanuu chiishikaauh ishpish.7Chii nitupayinaanuu maak anite kihchikiishikuhch. Michael ekw maak aniyuu utenchilamh chii maasiheuch aniyuu mista manichuusha ekw maak aniyuuh utenchilamiyuuh.8Mikw maak chii waanihtaauch an mista manichuush ekw maak aniyuuh utenchilamh. Ekw maak namui uhchi ihtakuniyuu taanite che ihtaatwaau anite kihchikiishikuhch.9Ekw kaa niihchiwepinaakanuut an mista maanichuus kihchikiishikuhch uhchi. Eukw maak an chinepukw weskach anite kaa ihtaat, Machimanituu maak Satan kaa ishinihkaataakanuut. Eukw uu kaa chii wiyeshihaat misiwe aweyuu utah aschiihch. Anite maak aschiihch chii ishuwepinaakanuu kaye misiwe aniyuu utenchilamh.10Ekw maak kaa pehtuuk awen e chishewet anite kihchikiishikuhch e ayimit. Chii iteu, “Ekw maak wiyaapahtamaahch Chishemanituu che pimaachihaat utiiniimh. Chii waapahtiiweu taan e ishpish suuhcheyihtaakusit chechii chisheuchimaaut kaye niwaapahtamuwaanaan taan e ishi ihtakuniyich chechii tipeyihchicheyihch aniyuuh Christ kaa pechi itishahwaat. Wesh an e chiishikaayich kaye e tipiskaayich muush kaa mamishimaat Chishemanituu utiiniimiyuuh uhchishkuu Chishemanituu e ihtaayich shaash chii niihchiwepinaakanuu.11Mikw maak Chishemanituuh utiiniimiyuuh chii shaakuuchihiikuu aniyuu uhchi Maanishchaanisha umihkuyuu, kaye maak aniyuu e waawiihtamiyich Chishemanituu umiywaachimuwiniyuu. Namui uhchi saachihtaauch upimaatisiiwinawaauh chechii nipahaakanuutwaau.12Miywaatamukw maak misiwe chiyawaau kihchikiishikuhch kaa ihtaayekw. Ekw chiyawaau aschii ekw maak chihchikamii chika aahkwaach machipayinaawaau wesh ekute anite e ihtaayekw kaa ituhtet machimanituu. Nuwach maak chishuwaasuu wesh chischeyihtam shaash e tahkwaayich utipahiikan.”13Iskutak maak chescheyihtahk an mista manichuush anite aschiihch e chii ishi niihchiwepinaakanuut ekw kaa chihchi papaanuushuushkuwaat aniyuu iskweu kaa naapeshiiwiyich utawaashiimiyuu.14Mikw maak an iskweu chii miyaakanuu niishu mitihtahkunh muyaam mista piyesuu utihtahkun e ishinaakuniyikwaauh chechii ispahaat anite pakwaatiskamikaahch anite che kanuweyimikut Chishemanituu. ekute maak anite che ihtaat nishtu pipun miin aapihtuu ishpish ekaa chechii pischeyimikut aniyuu mista manichuusha.15Ekw an mista manichuush kaa aapahahk utuun. Nipiyuu kaa uhchichuuniyich anite utuunihch uhchi mwehch siipiih e itaachuuniyich. Eukw uyuu e wepaapuyaat aniyuuh iskweuh aniyuu e ishi weyuutaachuuniyich nipiiyuu uhchi.16Aschii maak chii wiichiheu aniyuu iskweu. Chii taautiimakan aschii ekw kaa akuhchipayihtaamakahch an nipii mista manichuush kaa aapuhkutaahtahk.17Ekw an mista manichuush kaa mista chishuwaahiikut aniyuu iskweu. Ekw kaa nituu nitupayihkahtumaat aniyuuh utaanische utawaashiimiyuuh, aniyuu misiwe kaa nanihiihtawaayich Chishemanituu, aniyuuh kaa waawiihtamiyich taan kaa pechi ihtiyich Jesus kaa pechi takushiniyich.
Canadian Bible Society