James4
1Taanite wehchipayihch an e mashihiituyekw kaye e ayaasitemituyekw. Piihch anite e ihtaat awen mwehch e maasihchepayikwaauh ishinaakuniyuuh aniyuu chekwaayuu kaa mushteneyihtahk chechii naniheyihtamihiikut.2E nitaweyihtamekw chekwaan ekaa maak chii ayaayekw, chek mitun chiwii nipahaawaau awen. Naashch e mushteneyihtamekw chechii ayaayekw chekwaan ekaa maak chii wiihkuchihtamaasuyekw ekut wehchipayihch e mashihiituyekw kaye e aasitemituyekw. Namui maak chichii ayaanaawaau taan e ishi nitaweyihtamekw ekaa nitutamaayekw.3E nitutamaayekw namui chimiskenaawaau taan kaa ishi nitutamaayekw wesh namui miywaashuu chekwaan wehchi nitaweyihtamekw uyuuh chekwaayuuh. Chinitaweyihtenaawaau chekwaayuuh mikw chiyawaau chechii naniheyihtamihiisuyekw taan e ishi machi nituweyihtamekw.4Taapwe nitawiin kaa ihtiyekw. Namui aa chichischeyihtenaawaau awen e saachihtaat taan e itaatisiinaanuyich utah aschiihch uhkaateu Chishemanituu. An awen kaa saachihtaat taan e itaatisiinaanuyich utah aschiihch ihtuutaasuu chechii uhkaataat Chishemanituu.5Chititeyihtenaawaau aa ekaa taapwemakahch an Chishemanituu utayimuwinihch kaa itashtech, “Aniyuu Kaa payehchisiyich Ahchaahkwa Chishemanituu kaa miitahkw chechii ihtaayich anite chipimaatisiiwinaahch yaakwaau chinaanaakachihiikunuu mikw Chishemanituu e ihtaayich chechii ishi pimaatisiyuuhkw.” An Ahchaahkw uhteyihtam ekaa ihtuutamuhkw taan e ishi nitaweyimitahk Chishemanituu chechii ihtuutamuhkw.6Mikw maak Chishemanituu etituu mistahii miyeu shaweyihchichewiniyuu aniyuu aweyuu wiya e ihtaat kaa ishi pimaatisiyich. Wesh itashteu Chishemanituu utayimuwinihch,Chishemanituu nishkuushtuweu aniyuuh kaa chisteyimisuyitwaauh mikw maak shaweyihchichewiniyuu miyeu aniyuu kaa tipihteyimisuyitwaauh.7Pachishteyimitisuustuwaahkw Chishemanituu. Nishkuushtuwaahkw machimanituu ekw maak che usimitaakw.8Peshuwaapamaahkw Chishemanituu ekw maak che peshuwaapamitaakw kaye chiyawaau. Kaasiitihchekw chiyawaau umachihtwaauch, ekw chiyawaau kaa ayimihehkaasuyekw payehchihtaakw chitehiiwaau.9Mihchiiwesikw, macheyihtamukw kaye maatukw. Maatukw ishpish wii chechii paahpiyekw. Mishimeyihtamukw ishpish wii chechii miyeyihtamekw.10Tipihteyimitisuustuwaahkw Utipeyihchikeu ekw maak che uhpinitaakw.11Niichishaanitikw ekaawii machaayimuumitukw. Awen e machaayimuumaat wiichishaan maak e wiyaaskunaat aatuweyihtam wiishuwewiniyuu kaye maak wiyaaskunam. Chiishpin weyaaskunamuwane wiishuwewin namui chinanihiihten kaye maak wiyaaskunichesuu chititahiisun.12Mikw peyakw awen chii miiweu wiishuwewiniyuu. Eukw maak mikw chechii wiyaaskunichet. Wiya mikw chika chii pimaachihiiweu kaye maak wiya mikw chika chii wanaachihiiweu. Awen maak chiya chechii wawiyaaskunat kutak awen.13Nituhtamukw maa chiyawaau kaa itweyekw, “Anuhchiish maak waapahche nete ane ihtaawin chika ituhtenaanuu. Ekut che ihtaayihkw peyakw pipun. Chika ihtakun chekwaan che chihchipayihtwaasuyihkw chechii mista ushihtaayihkw shuuliyaau.”14Namui mitun chichischeyihten taan che ispayihch waapahche. Taan e ishinaakuhch pimaatisiiwin. Mwehch e kaskauhch kaa chii ishinaakuhch ekun e ishinaakuhch. Mikw weipishchiish nuukun e kaskauhch chek maak namui ati ihtakun.15Mwaau teyakuch chipaa itwen, “Iteyihtahke Utipeyihchikeu, chika pimaatisiinaanuu. Mwaau maak che ati aihtiihkw.”16Mikw maak chihchiwe chititeyimisunaawaau kaye chimamiywaachimisunaawaau. Maayaatan an e ihtiyekw e mamiywaachimisuyekw.17An awen kaa chischeyihtahk taan chipaa ishi miyutuutam ekaa maak ihtuutahk machituutam an awen.
Canadian Bible Society