Hebrews13
1Niichishaanitikw, muush kanawach saachihiitukw.2Chischisikw, muush chechii ayeskuwiyekw chechii piihtakahekuch maaniteuch chiichiwaawaahch. Pasch awenichii shaash chii piihtakaheuch maaniteuh anite e ihtaatwaau, namui maak uhchi chischeyimeuch pasch aniyuu maaniteuh kaa piihtakahaatwaau e chii enchiluuwiikupanen.3Maamituneyimaahkuch anichii awenichii chipahutuukamikuhch kaa ihtaatwaau. Muyaam kaye chiyawaau e ihtaayekw anite aniyuu kaa ihtaatwaau chechii ishi maamituneyihtamekw. Maamituneyimaahkuch kaye anichii kaa nanehkaachihaakanuutwaau muyaam kaye chiyawaau e nanehkaachiihiikuyekw mwehch wiyawaau e ishi nanehkaachihaakanuutwaau chechii iteyihtamekw.4Kaye miin kutach chekwaan che ititakuch, misiwe awen chipaa chisteyihtamihiikuu wiichihtuuwiniyuu. An naapeu kaye wiichiskweu mikw wiyawaau chipaa wiihpemituuch. Namui chipaa uhchi pisikwaatisiyuch. Wesh Chishemanituu cheshtinaash kata wiyaaskuneu aniyuu kaa wiinisuuwaatisiyich kaye aniyuu kaa pisikwaatisiyich.5Ekaa wii chika uhchi ishinaakusinaawaau chechii saachihtaayekw shuuliyaau. Chipaa miyeyihtenaawaau taan e ishi ayaayekw. Wesh Chishemanituu chii itweu,Namui wiiskaat chika uhchi nakatitinaawaau, namui wiiskaat chika uhchi ishinaakusinaawaau ekaa chechii piskaatitakuch.6Ekw maak cheshtinaash chechii itweyihkw,Namui nika uhchi kushtaachin wesh Utipeyihchikeu nipechi wiichihiikw. Taan maak chechii pechi ihtuutuut naapeu wii.7Miin kutach chekwaan, maamituneyimaahkuch maa anichii maauch niishtam kaa wawiihtamaataakuch Chishemanituu utayimuwiniyuu, anichii kaa niikaanishkahkwaau ayimiheukamikuyuu. Maamituneyimaahkuch taan kaa itaatisiitwaau kaye kaa ishi puunipimaatisiitwaau eshkw e taapweyimaatwaau Jesus. Ekun an che wii wiichihiikuyekw chechii taapwehtamekw taan kaa ishi taapwehtahkwaau.8Jesus Christ namui nihtaa aahchiiuh chika uhchi iteyihtaakusuu. Taan kaa iteyihtaakusiyit utaakushiihch, ekun e iteyihtaakusit anuhchiish kaye maak ekun che iteyihtaakusit kaachiche.9Yaakwaamiikw ekaa chechii wiyeshihiikuyekw chechii ati taapwehtamekw nanaahkuu nitamukw Chiskutamaachewinh. Wesh miywaashuu mitehii chechii yaaichikaapuuhch shaweyihchichewinihch, namui wii miichimihch. Wesh namui wiichihiikuu awen miichimiyuu chechii yaaichikaapuut taapwehtamuwinihch ishi.10Anichii Jewa ayimiheuchimaauch eshkw kaa machishtawehamaatwaau namui ishinaakuniyuu chechii miichitwaau wiyawaau aniyuu miichimiyuu chiyaanuu chipachistinicheunaapiskunaahch kaa ihtakuniyich.11Iskutak kaa nipahaakanuutwaauh anichii awesiisach, an wiyaas wiiwiitamihch anit waachitwaau anichii iinuuch ishkwaasikanuu. Ekw an chisheayimiheuchimaau anite maauch e payehchisiimakaniyich kaa ishinihkaateyich kaa pischisaasiyich ituhtataau aniyuu mihkuyuu. Ekw anite pechishtinahk aniyuuh mihkuyuuh Chishemanituu e ihtaayich anit chechii uhchi wepeyihtamuwaakanuyich aweyuu umachihtwaawiniyuuh.12Jesus kaye wiya anite wiiwiitamihch aniyuu ihtaawiniyuu chii nanehkaachihaakanuu kaye ekute kaa nipahaakanuut. Ekw aniyuu umihkw ekut kaa uhchi payehchihaakanuutwaau awenichii Chishemanituu utiiniim chechii ishi kanawaapamaakanuutwaau.13Ekw maak wiiwiitaau anita ihtaawinihch che nituwaapamuhkw Jesus kaye chiyaanuu chechii muushihtaauhkw taan kaa ishi maayeyimaakanuut.14Utah aschiihch namui ihtakun ihtaawin taanite kaachiche chechii ihtaayihkw. Muyaam mikw e shaapuhtawehteyihkw chitishinaakusinaanuu e wii ituhteyihkw anite an ihtaawin kaachiche che ihtakuhch.15Muush pachishteyimisutaau chechii maamihchimihkw Chishemanituu aniyuu uhchi taan kaa ishi ihtuutamaatahkw Jesus, chituunaahch e uhchi waawiihtamuuhkwaau awenichii e taapweyimahkw Jesus.16Ekaawii puuniikw e miyutuutamaacheyekw kaye e maatinuwepayihtaatuyekw taan e ishi ayaayekw. Wesh tekash e pachishteyimisut awen uyuu chechii ihtit naheyihtamiheu Chishemanituuh.17Nanihiihtuwaahkuch anichii kaa niikaanishkaataakuch ayimiheukamikuhch. Wesh chiwaawiichihiikuwaauch chitaapwehtamuwiniwaahch. Eukw uyuu utaapatisuwinawaau. Wesh chika nitaweyihtaakusuuch chechii wiihtamuwaatwaau Chishemanituu taan kaa ihtuwekw. Chika miyeyihtamuch maak chechii ihtuutahkwaau uyuu utaapatisuwinawaau chiishpin chiyawaau nanihiihtuwekwenich kaye chisteyihtamuwekwe taan kaa ishi miyaakanuutwaau chechii niikaanishkaataakuch. Ekaa maak uu ihtiyekwe chika macheyihtamuch ekw maak namui chika chii miyu wiichihiikuwaauch.18Chipukuseyimitinaan chechii pechi ayimiheshtamuuyaahch. Muush niwii ihtuutamuwaanaan aniyuu e iteyihtamihiikut Chishemanituu e kuiskunaakuniyich. Wesh ekut che uhchi chischeyihtamaahch ekaa chekwaan ihtakuhch chechii macheyihtamihiikuyaahch.19Chinitutamaatinaawaau chechii pechi ayimiheshtamuuyekw ekw maak miin wiipach chechii nituwaapamitakuch.20Ekw maak nitayimihaau Chishemanituu, an kaa ihtuutaataakw chechii ayaawekw chiyaameyihtamuwiniyuu. Wiya chii wanishkaaneu aniyuuh maanishchaanishuiinuu kaa chisteyihtaakusiyich nipuwinihch uhchi, eukw uyuu Jesus. Chii ihtuutaweu chechii miyu kanuweyimaayich utiiniimiyuuh mwehch e ihtiyich manischaanishuiinuu e miyu kanuweyimaayich maanishchaanisha. Chishemanituu chii ihtuutam chechii aapataniyich aniyuu kaa ushkaayich niskumuwiniyuu kaachiche che ihtakuniyich Jesus umihkuhch uhchi.21Mistahii chichii ihtuutamaakuwaau Chishemanituu Jesus uhchi ekw maak netutamuuk chechii miitaakw misiwe aniyuu kaa miywaayikwaau chekwaayuu e ishi nituweyihtamekw chechii ihtuutamuwekw utiteyihtamuwin. Nitayimihaau kaye chechii aapatisit anite chipimaatisiiwiniwaahch ekw maak chechii naniheyihtamihiikut aniyuu e itaatisiiwekw. Muush maak maamihchimaataau Jesus Christ kaachiche kaye kaachiche. Amen.22Niichishaanitikw, chichii masinahamaatinaawaau uu. Namui mikw naashch chinwaau. Chichii masinahamaatinaawaau chechii kaachiichihiitakuch taapwehtamuwinihch ishi. Ekw maak chisiihchimitinaawaau suuhk chechii nanihiihtamekw taan kaa ititakuch.23Maaskuuch chichii pehtenaawaawaache chiichishaanuu Timothy shaash e chii wiiwiit chipahutuukamikuhch uhchi. Wiipach takushihke ute e ihtaauch ekw che peshuwak anite e ihtaayekw iskutak nituwaapamitakuche.24Waachiyemaahkuch anichii kaa niikaanishkaataakuch kaye misiwe anichii kaa taapwehtahkwaau anite e ihtaayekw kaa ihtaatwaau. Anichii kaa taapwehtahkwaau anite Italy aschiihch kaa ihtaatwaau kaye wiyawaau chiwaachiyemikuwaauch.25Nitayimihaanaan Chishemanituu misiwe chechii miyutuutaataakw. Amen.
Canadian Bible Society