Hebrews10
1Nika aayimuuten etituu aniyuu Jewa wiishuwewinh. Anichii iinuuch uyuuh wiishuwewinh kaa nanaakatuweyihtamihiikutwaau ekut kaa uhchi chischeyihtahkwaau taan che ishpish miyutuutamuwaat Chishemanituu iinuu. Mikw maak namui tekash uhchi chischeyihtamihaakanuuch taan che ishi etituu miyutuutamaachet Chishemanituu anite niishtamihch Jesus uhchi. Namui awen tekash uhchii wepeyihtamuwaakanuu umachihtwaawin kaye namui awen tekash uhchi kuiskunaakusuu anite ishi Chishemanituu e ihtaayich mikw aniyuu e nipahaakanuyich awesiisa e machishtawehamaanuuhch eshikum pipun.2Chiishpin anichii kaa nuuchiishtuwaatwaau Chishemanituu mitun tekash chii payehchihaakanuwaakupanenich kaa wepeyihtamuwaakanuutwaau umachihtwaawinawaauh, namui chipaa uhchi mukushkaateyihtamihiikuuch umachihtwaawinawaauh wesh shaash chii wepeyihtamuwaakanuuch. Ekw maak namui chipaa uhchi nitaweyihtaakusuuch tasine chechii machishtawehamaatwaau awesiisa e chii nipahaakanuyich.3Mikw maak eshikum pipun chii machishtawehamaauch awesiisa e chii nipahaakanuyich. Uyuu maak muush e chii ihtitwaau namui uhchii wanichischisiitutamuch umachihtwaawinawaau.4Taapaa wesin wiiskaat kata chii wepeyihtamuwaakanuu awen umachihtwaawinh mikw aniyuu awesiis mihkuyuu e aapataniyich.5Eukw maak wehchii itwet Jesus iskutak che takushihk utah aschiihch,“Chishemanituu, namui chinitaweyihten machishtawehamaawin kaye pachishtinichewin. Eukw uu wehchii miyin uu miyu kaa ayaayaan taapishkuuch naapeu chechii ishinaakusiyaan.6Namui wiiskaat kuuhchi miyeyihten e ishkwaaswaakanuutwaau awesiisach kaye e machishtawehamaanuuhch chekwaan.7Chichii ititin maak, ‘Chishemanituu, nichii takushin chechii ihtuutamaan chititeyihtamuwin, muyaam taan e itashtech chitayimuwinihch nipaa ihtin.’ ”8Uyuu kaa itwet Jesus, “Chishemanituu, namui chimiyeyihtamihiikuun uu e ihtinaanuuhch e machishtawehamaanuuhch awesiisach kaye pachishtinichewinh e miikuyin ati chechii uhchi wepeyihtamuwaakanuutwaau awenichii umachihtwaawinawaauh.” Mikw maak ekun e itashtech wiishuwewin che ihtinaanuukupane.9Chii itweu kaye Jesus, “Chishemanituu, nichii takushin chechii ihtuutamaan chititeyihtamuwin.” Uyuu maak kaa itwet ekut kaa uhchi iichenahk Chishemanituu aniyuu weskach niskumuwiniyuu anit kaa chii nituweyihtaakuniyich awesiisa chechii machishtawehamaanuyich, ekw miiskuch Jesus kaa pachishtinamiyich upimaatisiiwiniyuu.10Aniyuu maak Jesus tekash e chii nanihiihtamuwaat Chishemanituu utiteyihtamuwiniyuu, peyakwaau chii pachishtinam upimaatisiiwin, kaachiche maak ishinaakuniyuu uyuu kaa ihtit. Uyuu e chii ihtit ekut kaa uhchi wepeyihtamaakuyihkw chimachihtwaawinuuh chechii ishinaakusuuhkw muyaam ekaa nihtaa uhchi machituutamuhkw.11Misiwe ayimiheuchimaau eshikum chiishikaau aapatisuu muush e peyakuniyich chekwaayuu e ihtuutahk, muush e machishtawehamaat. Aat maak aniyuu e ihtuutahk namui wiiskaat chika chii wepeyihtamuwaakanuyuuh aweyuuh umachihtwaawiniyuu.12Mikw maak iskutak Jesus kaa pachishtinahk upimaatisiiwin eukw mikw uu pachishtinichewin kaa nitaweyihtaakuhch anit chechii uhchi kaachiche wepeyihtamuwaakanuutwaau awenichii umachihtwaawinawaauh. Namui miin kutach pachishtinichewin uhchi nitaweyihtaakun. Anite maak Chishemanituu unihiiwiniihch ekute kaa ishi waweyapihaakanuut kaachiche chechii apit.13ekute maak anite muush che ihtaat, e ashuwaapit paatish Chishemanituu misiwe chii ispasihaayichen aniyuu kaa uhkaatikut kaye chii ihtuutawaayichen chechii nanihiihtamiyich utipeyihchichewin.14Uyuu maak mikw peyakwaau e chii pachishtinahk upimaatisiiwin Jesus ekut kaa uhchi ihtuutahk kaachiche chechii wepeyihtamuwaat Chishemanituu utiiniim umachihtwaawiniyuu kaye chechii kuiskunaakusiyich anite Chishemanituu ishi e ihtaayich.15Kaye Kaa payehchisiit Ahchaahkw kaye wiya chitayimihiikunuu e wiihtamaatahkw taapwe e taapwemakaniyich uyuu. Chii wiihtam taan shaash kaa itweyikupanenh Chishemanituu. Chii itweu,16Maauyuu kaa uskaayich niskumuwiniyuu che miikwaau awenichii iskutak utihchipayikwaawen aniyuuh e chiishikaakwaauh. Utehiiwaahch nika piihtahamuwaan niwiishuwewinh kaye umituneyihchikaniwaahch nika masinahamuwaan.17Namui ekw nika uhchi maamituneyihtamihiikuwaan umachihtwaawinawaau aniyuu taan kaa ishi machituutahkwaau.18Misiwe maak uu taapwemakan. Iskutak Chishemanituu tekash e wepeyihtamaachet machihtwaawin, namui miin chika uhchi nitaweyihtaakun chechii machishtawehamaanuuhch machihtwaawin uhchi.19Niichishaanitikw, aniyuu Jesus e chii pachishtinahk upimaatisiiwin chechii nipahaakanuut chiyaanuu uhchi, ekw maak mikw chechii ishi piihcheyihkw ekaa sechisiihkw anite maauch peyehkaniyich Chishemanituu e ihtaat.20Wesh Jesus chichii iichenimaakunuu aniyuu akuuyekahiikaniyuu chechii nituwaapamahkw Chishemanituu. Aniyuu upimaatisiiwin e chii pachishtinahkw ekut kaa uhchi ihtuutamaakuyihkw uyuu. Ekw maak muyaam e miikuyihkw e uskaayich pimaatisiiwiniyuu che ishi pimaatisiyuuhk ishinaakuniyuu.21An maak uhchi ekut wehchi ayaauhkw e suuhcheyihtaakusit chisheayimiheuchimaau, eukw uu Jesus, an naakaanishkuwaat Chishemanituu utiinimiyuu.22Ekw maak chechii naatahkw Chishemanituu Jesus e uchisheayimiheuchimaamiihkw, mitun e taapwehtamukw che miyeyihtahk naatahkwe, ekaa che uhchi aataweyimitahkw. Chika chii naataanuu wesh tekash chichii wepeyihtamaakunuu chimachihtwaawinuuh. Tekash chii payehchihtaakanuu chitehiinuu ekw maak namui ekw chimakushkaateyihtamihiikunaanuu taan kaa chii ishi machituutamuhkw. Chii payehchihtaakanuu chiiyuunuu e miywaakamihch nipii.23Suuhk maak suuhchikaapuukw taan e ishi cheshtinaateyihtamekw, ekaawii aanuwehtamukw, wesh cheshtinaash chika ihtuutam Chishemanituu aniyuu kaa itwet che ihtuutahk.24Kaye muush maamituneyimitutaau taan chechii ishi kaachiichimituyihkw chechii uhchi saachihiiweyihkw kaye chechii miyutuutuuhkwaau awenichii.25Mikw maak namui chika chii ihtuutenaanuu uu ekaa wiichihiiweyihkwe anite e nishtuwiitwaau kaa taapwehtahkwaau. Ihtaauch anichii ekaa wiichihiiwetwaau taanit nestawiyich kaa taapwehtamiitwaauh. Chipaa nishtuwiinaanuu anit chechii uhchi kaachiichimituyihkw. Naashch maak iteyihtaakun uu chechii ihtiihkw wesh chiwaapahtenaanuu e peshunaakuhch an e chiishikaach miin che takushihk Christ.26Ekw maak anuhchiish e chischeyihtamuhkw taapwewin, yaapach maak machituutamuhkwe e chischeyihtamuhkw maak ekaa kuiskw ihtiihkw, namui chitaapateyihtamihiikuwaanaanuu taan kaa ishi pachishtinisut Jesus chiyaanuu uhchi. Namui chika uhchi ihtakun miin kutach pachishtinisuwin anit chechii uhchi wepeyihtamaakuyihkw chimachihtwaawinuu.27Ihtakuniyuu che ishi kushtaat Chishemanituuh an awen yaapach kaa machituutahk aat e chischeyihtahk ekaa kuiskw ihtit. Chishemanituu chika wiyaaskunikuu kaye ishkutehch kata ishi wanaachihaakanuu.28Ute maa ishi kanawaapahtamukw. Chiishpin awen ekaa uhchi aapateyihtamukupane Jewa wiishuwewiniyuu ekw maak niishu maak nishtu aweyuu itweyichen taapwe aniyuu e chii ihtikupane, namui mitun chipaa uhchi chistimaacheyimaakanuu tiiwehch mikw chipaa ishi nipahaakanuu.29Etituu maak chika iteyihtaakuniyuu an awen yaapach kaa machituutahk aat e chischeyihtahk ekaa kuiskw ihtit. Uyuu e ihtit maayeyimeu Chishemanituu Ukusiyuu. Maayeyihtamuweu umihkuyuu kaa siikanikaateyich aashiteyaahtikuhch kaa nipahaakanuyich. Maayeyihtam aniyuu kaa ushkaayich niskumuwiniyuu aniyuu Chishemanituu kaa ushihtamuwaayich utiiniimiyuu. An awen uyuu kaa ihtit maayeyimeu kaye Kaa payehtisiyich Ahchaahkwa an kaa chischeyihtamihiitahkw Chishemanituu ushaweyihchichewiniyuu. Uu awen ishinaakuniyuu taapwe chechii waweshihaakanuukupane.30Wesh chichischeyihtenaanuu Chishemanituu e chii itwet,Niya eukw che waweshihiitakuch taan e ishi tepicheyihtaakusiyekw chechii ishi waweshihiikuyekw.Kaye chii itweu Chishemanituu,Utipeyihchikeu chika wiyaaskuneu utiiniim.31Yaakwaamiikw. Taapwe kushtaateyihtaakuniyuu Chishemanituu, kaachiche kaa pimaatisiit, taan che ishi waweshihaat aweyuu.32Suuhk maak maamituneyihtamihiikuukw niishtam taan kaa ishi pehtamekw e aayimuumaakanuut Christ. Maamituneyihtamukw taan kaa ishi suuhchikaapuuyekw kaa nanehkaachihiikuyekw iskutak kaa pimaachihuyekw. Naashch taapwe chii yaaitan chitaapwehtamuwinawaau.33Niyaanikutehch chichii nanehkaachihiikunaawaau, kaye anite e mihchetinaanuuhch chihchii maayeyimikunaawaau kaye namui kuiskw chuuhchi ihtuutaakunaawaau kaye chichii wiichikaapuushtawaawaauch anichii kutakach kaa nanehkaateyihtamihaakanuutwaau.34Chichii chistimaacheyimaawaauch anichii chipahutuukamikuhch kaa ihtaatwaau anichii kaa taapwehtahkwaau wesh kaye chiyawaau ekun mwehch kaa ishi nachishkamekw. Iskutak kaa maakunikanuuhkwaau chichekwaanimuwaau e maayeyimikuyekw chichii miyeyihtenaawaau wesh chichii chischeyihtenaawaau etituu e miywaach an chekwaan kaa ishi ayaayekw, kaye kaachiche che ihtakuhch.35Ekaawii puuniikw e taapwehtamekw wesh ekut che uhchi ayaayekw e weyuutihch tipahamaakusiiwin.36Chinituweyihtaakusinaawaau chechii siipiiwesiyekw ekw maak chechii ihtuutamuwekw Chishemanituu utiteyihtamuwin kaye chechii miskamuwekw aniyuu kaa itwet cheshtinaash che miitaakw.37Wesh itashteu Chishemanituu utayimuwinihch,Maahchishtai weipishchiish, ekw an chipaa takushinuu che takushihk, namui maak pwaastuu chika uhchi takushinuu.38Nitiiniimach kaa kuiskutaatisiitwaau chika taapwehtamuch kaye chika pimaatisiyuuch, mikw maak an awen che chiiwekaapuukwe, namui nika uhchi miyeyihtamihiikw.39Namayeuch maak chiyaanuu awenich kaa chiiwekaapuutwaau kaye kaa wanisinitwaau. Chitaapwehtenaanuu chiyaanuu kaye chipimaachihunaanuu.
Canadian Bible Society