Ephesians4
1E chii papaawiihtamuch Utipeyihchikeu umiywaachimuwin ekun wehchi chipahukuyaan. Eukw maak wehchi siihchimitakuch aniyuu e ishi nitaweyimitaakw Chishemanituu chechii ishi pimaatisiiwekw chechii ishi pimaatisiyekw.2Chipaa tipihteyimisunaawaau kaye chipaa chiyaameyihtaakusinaawaau kaye muush chipaa wii siipiiwesinaawaau. Nuukuhtaakw e saachihiituyekw ekaa saskachiyekw e waawiichihiituyekw.3Suuhk muush wii miyu wiicheutukw. Chishemanituu Utahchaahkwa chiwiichihiikuwaau chechii miyu wiicheutuyekw chiyaameyihtamuwiniyuu e miitaakw.4Misiwe anichii kaa taapweyimaatwaau Chishemanituu peyakw miiyuu ishinaakusuuch. Kaye maak mikw peyakushuu Kaa payehchisiit Ahchaahkw. Peyakun kaye aspeyimuwin, aniyuu Chishemanituu kaa miitahkw iskutak kaa wiyaapamitahkw.5Mikw peyakushuu Utipeyihchikeu, kaye peyakun taapwehtamuwin, peyakun kaye siikahaahtaachewin.6Mikw peyakushuu Chishemanituu, eukw maak uu misiwe Wehtaawiihkw. Wesh wiya misiwe ishi niikaaneyihtaakusuu. Chiyaanuu maak misiwe kaa taapwehtamuhkw chipimaatisiiwinaahch uhchi aashuu aapatisuu kaye anite misiwe chipimaatisiiwinaahch ihtaau.7Wesh Christ paahpeyakw chichii miikunuu miiwewinh e shaweyimitahkw.8Itashteu anite Chishemanituu utayimuwinihch Christ e aayimuumaakanuut,Chii uhpiskaau anite ishi naashch e ishpaayich, chii chistuhtaheu maak mihchetu aniyuu kaa maamaahchikwaapihkaasuyitwaauh. Kaye chii miyeu miiwewinh iinuuh.9Taan e ishi wiihtamaachemakahch maak Chishemanituu utayimuwin uu kaa itashtech, “Chii uhpiskaau.” Ishi wiihtamaachemakan kiipaa niishtam utah aschiihch e chii takushihk.10An kaa pechi takushihk utah aschiihch eukw an kaye kaa uhpiskaat anite kihchikiishikuhch ishi mishihte chechii ihtaat.11Chii wiyaapameu maak aweyuu chechii waawiichihaayich aniyuu kaa taapwehtamiitwaauh eukw maak uyuuh Apastalih kaye uchischiwehiichesuuh ekw maak aniyuu kaa papaawaawiihtamiyich miywaachimuwiniyuu kaye maak ayimiheuchimaauh kaye kaa Chiskutamaacheyich.12Eukw maak uchii chipaa chiskutamuweuch aniyuuh kaa taapwehtamiitwaauh taan chechii ishi atushkuwaayich Chishemanituu ekw maak maamuu chechii ati suuhchikaapuyich.13Eukw maak uu che ishi wiichihiikuyihkw paatish misiwe maamuu peyakunihch ishi taapwehtamuhkwe kaye tekash misiwe chischeyimahkwe Chishemanituu Ukusisa taan e iteyihtaakusiyich. Kaye maak paatish tekash chiishi nihtaauchiihkwe, nihaau e iteyihtaakusit Christ iteyihtaakusiihkwe.14Ekw maak namui chika uhchi awaashiyuuweyihtaakusinaanuu. Muyaam e papaamuwepahukuyihk taan e ishi Chiskutamaachetwaau kaa wiyeshihiiwetwaau chechii ishinaakusiihkw, eukw uchii kaa ihtuutuwaatwaau aweyuu chechii machituutamiyich nanaahkuu e ishi pisiiwiyaatwaau.15Teyakuch maak, saachihiiwewin e nuukuhtaayihkw e wiihtamuhkw taapwewin, tekash chipaa ishi miyu nihtaauchinaanuu Christ e ihtaat ishi, wiya e niikaanishkuwaat umaamuuayimihaauh.16Wiya ihtuutaweu chechii miyu wiicheutuyitwaauh umaamuuayimihaauh kaye misiwe chechii ishi miyupayiyich aniyuu e ati nihtaauchiyich kaye e ati suuhchikaapuyich e saachihiituyitwaau uhchi.17Uu maa chit ishi wiihtamaatinaawaau Utipeyihchikeu ishi e ihtaat e yaakwaamitakuch ekaa chechii ishi pimaatisiyekw taan e ishi pimaatisiitwaau anichii ekaa kaa aapateyimaatwaau Chishemanituu. Wesh aniyuu taan e ishi maamituneyihtahkwaau namui mitun aapateyihtaakuniyuu,18namui kaye chii nisituhtamuch chekwaayuu. Namui chii ishi pimaatisiyuuch aniyuu e ishi nituweyimikutwaau Chishemanituuh chipaa ishi pimaatisiyuuch, wesaa e maskutehetwaau ekaa mitun wii nisituhtahkwaau.19Namui mitun ekw papimaameyimuuch taan e ihtitwaau. Pachishtinisuuch chechii pisikwaatisiitwaau, mikw taan e ishi mushteneyihtahkwaau chechii ishi wiinisuu ihtitwaau ekun e ihtitwaau.20Namiyeyuu maak uu kaa ishi chischinuhamaakuyekw Jesus Christ kaa aayimuutamaakuyekw.21Chichii pehtenaawaau taan kaa ishi aayimuumaakanuut, e nuushuushkuwekw maak Jesus chichii chiskutamaakunaawaau wiya e ihtaat ekute e ihtakuhch taapwewin.22Chichii wiihtamaakunaawaau che wanaachihiikuyekw an kaa wiyeshimikuyekw chimachinituweyihtamuwinawaauh, kaye chichii itikunaawaau chechii wepinamekw weskach taan kaa chii itaatisiyekw e machituutamekw.23Pachishtinamukw chimituneyihchikanawaauh chechii uschihtaakanuuhkwaau,24ekw maak e uschisiyekw che ishinaakusiyekw. Chishemanituu chichii ishihiikuwaau wiya chechii nispituwekw ekw maak chipaa kuiskutaatisiinaawaau kaye chipaa payehchi pimaatisiinaawaau.25Ekw maak chipaa puuniinaawaau e nanataiyekw teyakuch kuiskw chechii ishi ayimihiituyekw wesh muyaam e peyakuteusiihkw chitishinaakusinaanuu anite ishi Christ e ihtaat.26Chika chii chishuwaasin mikw maak ekaawii machituutaht. Ekaawii chika uhchi ati pahchishimuu piisim eshkw e chishuwaasiyin.27Kaye ekaawii mitun tawiishtamuwaahkw machimanituu chechii ihtuutaataakw taan waa ihtuutaataakw.28Kaye maak an awen kaa kachemutit chipaa puuniyuu e kachemutit. Teyakuch chipaa aapatisuu kuiskw e ihtit e wii wiichihiisut kaye maak aapatisite ekute chechii uhchi wiichihaat kaa kachistimaatisiitwaauh aweyuuh.29Ekaawii nitamukw ayimuwin aapachihtaakw, teyakuch ishi ayimukw aniyuu che miyu wiichihiikutwaau anichii kaa pehtaataakuch awenichii mikw taan e ispayiwaakwenich upimaatisiiwinawaahch.30Ekaawii misimeyihtamahiimaakw Chishemanituu Upayehchii Ahchaahkwa. Uu Ahchaahkw e ayaauhkw ekut e nuukuhch Chishemanituu e tipeyimitahkw. Cheshtinaateyihtaakun maak utihchipayihche an e chiishikaach taapwe che aapihkunitahkw Chishemanituu.31Puuniikw e iskaayeyihtamekw, e aahkuyuwesiyekw kaye e chishuwaasiyekw. Puuniikw kaye e maayeyihcheyekw kaye e kachiihkaamituyekw. Namui mitun chipaa uhchi ayaanaawaau uhkaasiwewin.32Chipaa miyutuutawaawaauch awenichii kaye chipaa yuuspaatisiinaawaau. Kaye chipaa wepeyihtamuwaawaauch awenichii muyaam taan kaa ishi wepeyihtamaatahkw Chishemanituu Christ uhchi.
Canadian Bible Society