Ephesians2
1Chiyawaau maak e nipiyekw chichii ishinaakusinaawaau eshkw ekaa uhchi pimaachihiitaakw Chishemanituu. Chichii machaatisiinaawaau kaye namui kuuhchi nanihiihtuwaawaau Chishemanituu.2Eukun kaa ishi pimaatisiyekw eshkw e chii nuushunehamekw taan e ihtinaanuuhch utah aschiihch kaye eshkw e chii nuushuushkuwekw an kaa uchimaahkahtahk chiishikuyuu, an ahchaahkw kaa ishi aapatisit e piihchishkuwaat aniyuuh aweyuuh ekaa kaa nanihiihtuwaayich Chishemanituuh.3Ekun maak peyakwaau misiwe kaa ishinaakusiihkw kaye chiyaanuu, mikw taan waa ihtiihkw chichii ihtinaanuu. Chichii ihtuutenaanuu mikw taan e ishi nituweyihtamuumakahkwaau chiyaasinuuh kaye chimituneyihchikanuuh. An maak kaa ishpish chii machaatisiihkw chii iteyihtaakuniyikupane taapwe kaye chiyaanuu chechii waweshihiitahkw Chishemanituu.4Mikw maak aniyuu naashch e mishaayich Chishemanituu uchishewaatisiiwin, kaye maak aniyuu e ishpish mista saachihiitahkw,5aat eshkw mekwaach e nipiihkw e chii ishinaakusiihkw ekaa uhchi nanihiihtuuhkw, chichii ihtuutaakunuu chechii wiich pimaatisiimahkw Christ. Chishemanituu chichii pimaachihiikunuu e chii wii shaweyimitahkw aat ekaa uhchi tepicheyihtaakusuuhkw.6Anit maak kaa wanishkaanaat Jesus kaye chiyaanuu chichii wanishkaanikunuu. Ekw anite kaa waweyipihiitahkw kihchikiishikuhch anite kaa ishi waweyipihaat Christ,7anite niishtaamihch chechii nuukuhtaat e ishpish naashch mishaayich ushaweyihchichewin e miyutuutamaatahkw Christ Jesus uhchi.8Chishemanituu sehchei chichii shaweyimikunuu kaa pimaachihiitahkw an e taapwehtamukw uhchi. Namayeu wii chiyaanuu uhchi kaa uhchipayihch chechii pimaachihuyihkw. Chishemanituu uyuu umiiwewin.9Namui awen katachii maamihchimuu chechii itwet wiya e chii pimaachihiisut aniyuu e chii mamiyuutuutahkw uhchi.10Wesh wiya Chishemanituu chichii ihtuutaakunuu chechii kuiskunaakusiyuuhkw aniyuu uhchi taan kaa ihtuutamiyich Christ Jesus. Christ maak e wiicheumuhkw, Chishemanituu chichii iteyihtaakuhiikunuu chechii mamiyuutuutamaamihkw aweyuuh, wesh eukw uyuu Shaash anite weskach niyaakan kaa ishi wiyeyihtahk che ihtuuhkw.11Chischisikw maa uu chiyawaau ekaa Jewa kaa itiskaanesiyekw taan kaa pechi ishinaakusiyekw anite pechi, chiyawaau “ekaa kaa chischinuwaachishwaakanuutwaau” kaa ishinihkaatitaakuch anichii naasch chihchiwe kaa iteyihtamihiikutwaau e chii chischinuwaachishwaakanuutwaau, wiiyuwaahch kaa maatishukutwaau kutak aweyuu;12anit an mekwaach namui kuuhchi wiichewaawaau Christ. Chichii maaniteunaawaau ekaa uhchi asitisinaasuyekw anite Chishemanituu utiiniimh e ihtaayich. Namui kuuhchi asitisinaasunaawaau niskumuwinihch, aniyuuh kaa ushihtaakanuuhkwaau anit uhchi aniyuu taan kaa itwet Chishemanituu cheshtinaash che ihtuutamuwaat utiiniimh. Kaye maak chichii pimaatisiinaawaau utah aschiihch ekaa uhchi ayaayekw aspeyimuwin kaye namui kuuhchi chischeyimaawaau Chishemanituu.13Chiyawaau kaa chii ayaawaapamekw Chishemanituu, e chii nipahaakanuut Jesus Christ ekut kaa uhchi ihtuutaataakw Chishemanituu chechii peshuwaapamekw aniyuu uhchi e wiichewekw ekw Christ.14Wesh Christ chichii petwaakunuu chiyaameyihtamuwiniyuu. Chii ihtuutaweu aniyuuh Jewa kaa itiskaanesiitwaauh ekw maak aniyuu ekaa Jewa kaa itiskaanesiitwaauh peyakutenuu chechii ishinaakusiyich. Chii piikunamuweu aniyuu taan kaa chii ishi uhkaatitutuyich.15Christ maak chii ihtuutam ekaa chechii aapataniyikwaauh taan e ishi nanaahkuu ihtakuniyikwaauh itashuwewinh anit wiishuwewinihch. Eukw uyuu kaa ihtit chechii miyu wiicheutuyitwaauh Jewa iinuuh ekw maak ekaa Jewa kaa itiskaanesiitwaauh. Ihtuutuweu peyakutenuu chechii ishinaakusiyich aat aahchiiuh e itiskaanesiyich, nuushuushkaakute.16Ashiteyaahtikuhch kaa nipahaakanuut ekut kaa uhchi ishinaakuhaat peyakutenuu chechii ishinaakushiyich kaau e chii peshuwaat Chishemanituu chechii miyu wiichewaayich kaye ekut kaa uhchi ihtuutuwaat chechii puuniyich e uhkaateyimituyich.17Ekw maak Christ kaa takushinit, e kacheskwet chiyaameyihtamuwiniyuu e aayimuutahk anit chechii uhchi naniheyimituyich aniyuu kaa peshuwaapamaayich Chishemanituu ekw maak aniyuuh kaa ayaawaapamaayich Chishemanituu.18Wesh wiya e wiicheuhkw ekut nehiipayihtaat taapishkun chechii naatahkw Chishemanituu peyakw Ahchaahkuwinihch uhchi.19Ekw maak chiyawaau ekaa Jewa kaa itiskaanesiyekw namui ekw chimaaniteunaawaau Chishemanituu e ihtaat. Kaa taapwehtahkwaau e ihtaatwaau chit ishi masinaasunaawaau kaye chiyawaau kaye maak Chishemanituu kuutiiniimitutaakuwaau.20Aniyuu taan kaa ishi wiihtamaataakuch miywaachimuwiniyuu apastalach kaye uchischiwehiichesuuch eukuu kaa wiikaapuuhiikuyekw. Jesus Christ maak eukw chihchiwe meyuu yaaichikaapuuhiitaakw,21wesh wiya ihtuutaweu wetaach chechii ati yaaichikaapuyich misiwe aniyuuh kaa taapweyimikut kaye chechii ati payehchisiyich Utipeyihchikeu ishi e ihtaayich, muyaam chisheayimiheukamikw e wiikaapuuhtaakanuuhch chechii ishinaakusiyich.22Kaye chiyawaau ekute e asich uhpakaapuuhiikuyekw anite che ihtaayich Chishemanituu Utahchaahkwa.
Canadian Bible Society