2 Timothy4
1Chiya Timothy, chititashumitin uhchishkuu Chishemanituu kaye Utipeyihchikeu Jesus Christ e ihtaat, an che wiyaaskunaat kaa pimaatisiitwaauh kaye kaa nipiitwaauh, kaye maak miin che takushihk che chisheuchimaaut,2che waawiihtaman Chishemanituu utayimuwin, suuhk waawiihtah aat anit ekaa e nihiipayihch chechii nituhtaakanuuhch, maak anit e nihiipayihch chechii nituhtaakanuuhch, chischeyihtaakuhtaa taapwewin, chistahamaache e wanituutaakanuuhch, kaye maak kaachiichimuwe kaye muush wii siipiiwesii kaye muush chiskutamaache.3Wesh kata utihchipayuu taanit ekaa che uhchi nituhtahkwaau awenichii aniyuu tiyaapwemakaniyich chiskutamaachewiniyuu. Teyakuch kata naanitaweyimeuch aweyuu chechii chiskutamaakutwaau wiyawaau taan waa ishi pehtahkwaau.4Namui chika uhchi aapateyihtamuch chechii nituhtakwaau taapwewiniyuu. Uste kata iteyihtamihiikuuch e maaniteuhtaakuniyikwaau tipaachimuwinh chechii nanituhtahkwaau.5Mikw maak suuhk nanaakataweyimisuu chiya, kuiskw chechii ishi maamituneyihtaman taan mikw che ispayuwane. Siipiiwesiistah taan che ishi nanehkaachihiikuwane. Suuhk wiichihiich kutakach e waawiihtamuutwaau miywaachimuwiniyuu. Kaye maak mitun tekash ihtuut misiwe aniyuu taan kaa wii itaapachihiisk Chishemanituu.6Niya maak shaash utihchipayuu che pachishtinikanuuhch nipimaatisiiwin Chishemanituu ishi e ihtaat. Shaash utihchipayuu che nakatamaan uu aschii.7Shaash nichiishihtaan an taan nipaa ishi miyu maasihtaan, shaash nichiishihtaan taan kaa ishi kakwechiskatahiicheyaan kaye nichii kanuweyihten taan kaa ishi taapwehtamaan.8Shaash ayeskuushteu an chisheuchimaau astuutin aniyuu che miiyaakanuutwaau anichii che kuiskutaatisiitwaau. Eukw maak uyuu che pechi miit Utipeyihchikeu an kuiskw kaa ishi wiyaaskunichet miin pechi takushihke. Namui maak mikw niya nika uhchi miikuun uu e ishinaakuhch astutin, misiwe anichii saachihiiwewinihch kaa ishi pukuseyimutwaau Utipeyihchikeuh miin che takushiniyich kaye wiyawaau kata miyaakanuuch.9Suuhk kuchihtaa wiipach chechii pechi nitawaahiyin.10Demas wii, shaash uste uyuu aschiiyuu saachihtaau kaye maak nichii nakatikw, anite Thessalonicahch ekute kaa ituhtet. Crescens maak wii anite Galatiahch ekute kaa ituhtet. Ekw Titus anite Dalmatiahch ekute wiya kaa ituhtet.11Mikw Luke eukw e ihtaat utah e ihtaayaan. Yaaitei che wii pechi wiichewat Mark takushiniyine. Nitaweyimaau chechii pechi wiichihiit utah e ayimiheu aapatisuuch.12Kaye maak Tychicus namui ihtaau utah, anite Ephesus ekute kaa itishahuuk.13Takushiniyine che pechi niskuwenaman nitakuhp anite Troasihch, anite Carpus e ihtaat ekute kaa nakatamaan. Kaye aniyuuh masinahiikanh che petaayekw, yaaitei petaakw aniyuuh awesiishuyaan masinahiikanh.14An naapeu kaa chii waaweyaapischisahk piywaapiskuyuu, Alexander kaa ishinihkaasut naashch taapwe chii ihtakuniyuu taan kaa ishi nanehkaateyimuhiit, mikw maak chika ihtakuniyuu taan che ishi ihtuutaakut Utipeyihchikeu uyuu taan kaa ihtuutuut.15Che wii ayaakwaamiistuwat, wesh naashch chii nishkuushtam taan kaa ishi waawiihtamuwachiht miywaachimuwiniyuu.16Iskutak maauch niishtam kaa uhchishkuukaapuushtamaan e wiyaaskunikuyaan, namui waawaach peyakw awen nuuhchi wiichikaapuushtaakw, misiwe awenichii nichii nakatikuch. Kamaa ekaa maahtakushkaakutwaau uyuu taan kaa ishi ihtuutahkwaau.17Mikw maak Utipeyihchikeu nichii wiichikaapuushtaakw kaye wiya nichii miikw suuhkaatisiiwiniyuu. Chii ispayuu maak yaapach tekash chechii waawiihtamuch uyuu miywaachimuwiniyuu kaye anichii ekaa Jewa kaa itiskaanesitwaau chechii uhchi pehtahkwaau, kaye maak nichii wiihkuchihiikuun ekaa chechii muut mistatimu.18Wesh Utipeyihchikeu nika wiihkuchihiihkw misiwe taan che ishi utihtahukuyaan chekwaan e maayaatahch kaye wiya nika peshiikw anite aniyuu uchimaawiniyuu kihchikiishikuhch kaa ihtakuniyich. Wiya kata wii chisteyihtaakuhaakanuu kaachiche neshta kaachiche. Amen.19Niwaachiyemaauch Priscilla ekw maak Aquila. Niwaachiyemaau kaye Onesiphorus ekw maak misiwe anit aniyuu e peyakuteusiit.20Erastus wii ekute anite Corinth e ihtaat, ekw Trophimus anite Miletus ekute kaa uhchiskatak e chii aahkusit.21Suuhk kuchihtaah chechii takushiniyin eshkw ekaa pipuhch. Eubulus, Pudens, Linus kaye Claudia misiwe chiwaachiyemikuwaauch kaye anichii kutakach chiichishaanuuch chiwaachiyemikuwaauch.22Utipeyihchikeu chika wiicheukw chitahchaahkuhch kaye chika chishewaatutaakw.
Canadian Bible Society