2 Corinthians5
1Wesh Chichischeyihtenaanuu uyuuh chiiyuunuuh mwehch maahkiih ishinaakun. Peyakwaau e chiishikaach kata niihtinikanuuh. Anite maak kihchikiishikuhch chika miikunaanuu miiyuuh kaachiche che pimaatisiimakahkwaau, muyaam waaskaahiikanh e iteyihtaakuhkwaauh kaachiche che ihtakuhkwaauh. Namayeu wii muhch kaa ushihtaakanuuhch maahkii kaa iteyihtaakuhch kata uhchi iteyihtaakunh. Chishemanituu maak chitayeskuushtamaakunuu uyuu.2Anuhchiish wii ihtakun e maamaatuweyihkw e ishpish pukweyihtamuhkw che utihtamuhkw anite che ihtaayihkw.3Ekw maak taapwe che miskamuhkw taan aniyuuh che miitahkw Chishemanituu. Mwehch maak e pushchishkamutiikuyihkw chekwaan ekun che iteyihtaakuhch.4Wesh mekwaach utah chiiyuunaahch e ihtaayihkw Chimaamaatuwenaanuu, ihtakun e ishi misimeyihtamuhkw. Namayeu petinaasch e wii nakatamuhkw uyuuh chiiyuunuuh. Naashch taapwe chipakweyihtenaanuu taan che ishi miikuyihkw anite kihchikiishikuhch. Che ishpish chisteyihtaakuhch an pimaatisiiwin che miikuyihkw nete namui chika uhchi iteyihtaakun taan e iteyihtaakuhkwaauh uyuu anuhchiish Chipimaatisiiwinuuh maamituneyihtamuhkwe iskutak kihchikiishikuhch ihtaayihkwe.5Eukw uyuu wehchii ushihiitahkw Chishemanituu, chechii utihtamuhkw taanite che miikuuhkw uyuu pimaatisiiwiniyuu. Chicheshtinaahuwaanaanuu maak cheshtinaash che ihtuutamaatahkw uyuu wesh chichii miikunuu Upayehchi Ahchaahkwa chechii wiicheukuuhkw.6Eukw maak wehchi muush suuhchiteheyihkw. Chichischeyihtenaanuu che ishpish ihtaawaauhkwe utah chiiyuunaahch namui chitihtaanaanuu taanite e ihtaat Utipeyihchikeu.7Wesh utah e pimaatisiihkw an taan e ishi taapwehtamukw chitaspeyimututenaanuu aat eshkw ekaa waapahtamuhkw taan che ishi miitahkw Chishemanituu.8Taapwe maak chipaa suuhchitehenaanuu wesh uste chipaa miyeyihtenaanuu nakatamuhkw uyuuh chiiyuunuuh ekw maak chipaa ihtaanaanuu taanite e ihtaat Utipeyihchikeu.9Ekw maak kwaast e ihtiihkw chitihtinaanuu chechii naheyihtamihiihkw Utipeyihchikeu mekwaach utah e pimaatisiihkw maak anite e ihtaat ihtaayihkwe.10Wesh misiwe paahpeyakw e tashiihkw chika uhchishkuukaapuushtawaanuu Christ taanite e apit chechii wiyaaskunitahkw. Ekw maak misiwe paahpeyakw che miitahkw taan an e iteyihtaakuhch chechii miikuwaauhkupane mikw taan kaa ihtiwaauhkwe mekwaach utah aschiihch kaa pimaatisiihkw, kaa miyu ihtiwaauhkwe maak ekaa uhchi miyu ihtiwaauhkwe.11E chischeyihtamaahch maak Chishemanituu e kushtaatikusiit eukuu wehchi cheshtinaachimachistwaau awenichii e taapwemakaniyich e ishi aayimuutamuchihtwaau Utipeyihchikeuh. Wesh tekash nichischeyimakunaan Chishemanituu taan e iteyihtaakusuwachiht. Nipukuseyihtenaan maak kaye chiyawaau chechii chischeyimiyaahch taan nihaau e iteyihtaakusiyaahch.12Uu maak e ishi ayimiyaahch namayeu wii miin e wii miywaachimisuyaahch. Mikw chiwii maamihchihiitinaan. Ekw maak che chischeyihtamekw taan che ishi nishkweushihekuch anichii naashch chihchiwe kaa iteyimisutwaau ekaa mitun kaa mamihteyimisutwaau taan e iteyihtaakusitwaau chihchiwe.13Aat mwehch e chiishkweyaahch e iteyihtaakusiwaahche taan e ihtiyaahch wii Chishemanituu nitihtuutamuwaanaan misiwe chekwaayuu. Ekw maak e iipwaahkaahtaakusiwaahche wesin chiwii wiichihiitinaan an wehchi iteyihtaakusiyaahch.14E chischeyihtamaahch taan e ishpish saachihiikuyaahch Jesus Christ eukw uu e shiihchimikuyaahch uu chechii itaapatisiyaahch. Wesh Chichischeyimaanuu wiya e chii nipuushtamuwaat misiwe aweyuuh ekw maak chechii ishi kanawaapahtaakanuuhch misiwe awen e chii nipit.15Misiwe aweyuuh chii nipuushtamuweu Christ. Ekut maak wehchi pukuseyihtaakuhch anichii kaa pimaatisiitwaau ekaa ekw mikw wiyawaau e ishi naheyihtahkwaau chechii ishi pimaatisiitwaau maak chechii pimaatisiitwaau chechii naheyihtamihaatwaau aniyuuh kaa nipahaakanuyich kaye kaa wanishkaanaakanuyich nipuwinihch uhchi.16Namui maak ekw uschich e ishinawaakanuut awen nit ishi kanawaapamaanaan. Ekun kaa ishi kanawaapamachiht Christ peyakwaau. Namui ekw anite nit ishi kanawaapamaanaan.17Iskutak Christ e ihtaayich e ishi tipeyihtaakusit awen tekash ushchihtaakanuyuu upimaatisiiwin. Taan kaa iteyihtaakusit weskach shaash miyaaupayiniyuu. Misiwe chii ishi uschihaakanuu upimaatisiiwinihch.18Wiya Chishemanituu misiwe uyuu kaa ihtuutahk. Chichii ihtuutaakunuu wiya miin kaau chechii wiicheuhkw Christ uhchi. Ekw maak kaa miikuyaahch chechii wiihtamuumachiht aweyuuh taanite miin kaau chechii uhchi wiichewaayich Chishemanituuh.19Eukw maak uu waa ishi wiihtamaahch, Chishemanituu nituweyimeu misiwe aweyuuh miin kaau chechii wiicheukut Christ uhchi. Wepeyihtamaacheu machihtwaawinh. Nichii miikunaan chechii ishi waawiihtamuchiht miin kaau che wiichewaat awen Chishemanituuh.20Ekw maak e ayimishtamuwachiht Christ. Chishemanituu nitaapachihiikunaan e tepwaatitaakw. Chisiihchimitinaan miin kaau chechii wiichewekw Chishemanituu mwehch Christ wiya e siihchimitaakw e ishi ayimihiitaahch.21Aat maak Christ ekaa wiiskaat uhchi machituutahk Chishemanituu chii ihtuutaakuu mwehch umachihtwaau chechii ishinaakusit, chiyaanuu uhchi. Ekw maak Christ wiicheuhkwe, ukuiskutaatisiiuch chika ishi kanawaapamikunuu Chishemanituu.
Canadian Bible Society