1 John2
1Chimasinahamaatinaawaau nitawaashiimitikw ekaa chechii machituutamekw. E ihtaakwe maak awen e chii machituutahk Jesus Christ kaa kuiskutaatisiit eukw uu e ayimishtamaatahkw Kuuhtaawiinuuh e ihtaayich.2Christ chichii nipistamaakunuu chechii uhchi wepeyihtamaakuyihkw chimachihtwaawinuuh. Namui maak mikw chiyaanuu chimachihtwaawinuuh chika chii wepeyihtamaakunaanuu kaye misiwe awen utah aschiihch kaa ihtaat kata chii wepeyihtamuwaakanuu umachihtwaawinh.3Ihtuutamuhkwe e itashumitahkw Chishemanituu ekut che uhchi nuukuhch taapwe e chischeyimahkw.4E itwet awen nichischeyimaau Chishemanituu ekaa maak ihtuutahke e itashumikut, nanatayuu, namui piihchishkaakuu taapwewiniyuu.5Ekw maak awen e nanihiihtawaat taan e itashumikut Chishemanituuh nuukuhtaau taapwe tekash e saachihaat. Uu ihtiihkwe chika chischeyihtaakusinaanuu taapwe e wiicheuhkw Chishemanituu.6An awen kaa itwet e wiichewaat Chishemanituuh mwehch Jesus Christ taan kaa ishi pimuhteyich chipaa ishi pimuhteu.7Niichishaanitikw, namui uskaau uu itishawewin kaa aayimuutamaatakuch uu kaa masinahamaatakuch. Shaash weskach uu itishawewin. Eukw uu itishawewin niishtam kaa ayaayekw kaye eukuu muush kaa pechi aayimuutamaakuyekw.8Mikw maak yaapach e uskaach iteyihtaakun uu kaa ishi aayimuutamaatakuch. Christ chii nuukuhtaau e taapwemakaniyich. Kaye chiyawaau maak chinuukuhtaanaawaau e taapwemakahch. Wanitipiskusiiwin miyaaupayuu, ekw an chihchiwe waashtewin shaash chihkaashteu.9Awen e itwet waashtewinihch e ishi pimaatisiit, e uhkaataat maak wiichishaan eshkw wanitipiskusiiwinihch ihtaau.10An awen taapwe kaa saachihaat wiichishaan eukw muush waashtewinihch e ihtaat. Namui ihtakuniyuu chekwaayuu anit e ihtaat chechii pahchishimuweyich.11Ekw an awen kaa uhkaataat wiichishaan, wanitipiskusiiwinihch ihtaau. ekute pepaamuhtet ekaa chischeyihtahk taanite e ituhtet wesh ihtuutaakuu aniyuu wanitipiskusiiwiniyuu ekaa chechii waapahtahk.12Chimasinahamaatinaawaau, apishtawaashitikw, chimachihtwaawinawaau e chii wepeyihtamaakuyekw wiya Jesus Christ uhchi.13Chimasinahamaatinaawaau uhtaawiimaautikw e chischeyimekw an shaash e chii ihtaat aat eshkw ekaa mitun chekwaayuu uhchi ushihtaakanuyich. Chimasinahamaatinaawaau, uschiniichiitikw, e chii tepahekw machimanituu. Chimasinahamaatinaawaau, awaashitikw, wesh chichischeyimaawaau Chishemanituu uhtaawiimaau.14Chichii masinahamaatinaawaau, Uhtaawiimaautikw, e chischeyimekw an shaash e chii ihtaat aat eshkw ekaa mitun chekwaayuu uhchi ushihtaakanuyich. Chimasinahamaatinaawaau uschiniichiitikw wesh chisuuhchikaapuunaawaau, Chishemanituu utayimuwin e piihchishkaakuyekw, kaye maak e chii ashpashihekw machimanituu.15Ekaawii saachihtaakw aschii kaye taan e ishi ihtakuhch utah aschiihch, wesh awen kaa saachihtaat aschiiyuu namui piihchishkaakuweu Uhtaawiimaau usaachihiiwewiniyuu.16Misiwe taan e itaatisiinaanuuhch utah aschiihch, e machi mushtenaapahtahk awen chekwaayuu, e ishi machi mushteneyihtahk, kaye aniyuu e maamihchisiit taan e ishi pimaatisiit, namui Chishemanituu e ihtaat uhchipayuu uu itaatisiiwin, utah aschiihch uhchiimakan.17Misiwe e itaatisiinaanuuhch utah aschiihch kaye e ishi ihtakuhch nanaahkuu machi mushteneyihtamuwin chika iskwaapayuu. Mikw maak an awen kaa ihtuutamuwaat Chishemanituu utiteyihtamuwiniyuu kaachiche chika pimaatisiyuu.18Awaashitikw, eukw uyuuh maahchishtai e chiishikaakwaauh. Chichii wiihtamaakunaawaau che takushihk an awen kaa suuhcheyimututawaat Christ. Shaash maak mihchetu awen Christ kaa wii suuhcheyimututawaat chii takushinuu. Ekut maak wehchi chischeyihtamuhkw eukw uyuuh e maahchishtai chiishikaakwaauh.19Uchii maak awenichii namui chihchiwe chuuhchi wiicheukunuuch eukw maak uyuu wehchii nakatitahkwaau. Wesh taapwe chii wiicheutahkwaau eshkw chipaa wiicheukunuuch. Aniyuu maak kaa nakatitahkwaau ekut kaa uhchi miyu chischeyihtaakuniyich ekaa chihchiwe uhchi wiicheutahkwaau.20Christ kaa payehchisiit, chichii tuumiskunikunuu Payehchi Ahchaahkwa, ekw maak misiwe chiyawaau nesituhtamekw.21Namui wii e iteyimitakuch ekaa chischeyihtamekw taapwewin wehch masinahamaatakuch. E chischeyihtamekw taapwewin kaye maak e chischeyihtamekw ekaa ihtakuhch nanatayuwin anite taapwewinihch ekun wehchi masinahamaatakuch.22Awen maak an kaa nanatait. Eukw kiipaa an kaa aanuwehtahk Jesus e aawiyich Christ. Eukuu kaa suuhcheyimututawaat Christ, taapishkun Uhtaawiimaau ekw maak Ukusisimaau kaa aataweyimaat.23Wesh awen kaa aatuweyimaat Ukusiisimaau aatuweyimeu kaye Uhtaawimaau. Ekw maak an awen kaa itwet e taapweyimaat Ukusisimaau taapweyimeu kaye Uhtaawiimaauh.24Yaakwaamiikw maak muush chechii kanuweyihtamekw an niishtam kaa ishi pehtamekw uskach kaa taapweyimekw Jesus. Muush kanuweyihtamekwe uu niishtam kaa ishi pehtamekw muush chika wiichewaawaau Ukusisimaau kaye Uhtaawiimaau.25Eukw maak uyuu kaa itwet Christ, cheshtinaash che miitahkw kaachiche pimaatisiiwiniyuu.26Chimasinahamaatinaawaau e aayimuutamaatakuch anichii kaa wii wiyeshimitaakuch.27Mikw maak Christ chichii tuumiskunikunuu Utahchaahkwa. E ayaaumekw maak uyuu Utahchaahkwa namui chinitaweyimaawaau kutak awen chechii chiskutamaataakw. Wesh uyuuh Christ Utahchaahkwa eukw che chiskutamaataakw misiwe chekwaayuu, muush maak taapwemakaniyuu aniyuu e ishi chiskutamaachet, namui nanatayimakaniyuu. Nanihiihtuwaahkw taan e ishi chiskutamaataakw Ahchaahkw kaye wiichewaahk Christ.28Awaashitikw, muush wiichewaahkw Jesus. Ekw maak che cheshtinaateyimuyekw pechi nuukusite kaye namui chika uhchi pimaameyimunaawaau takushihke.29Chichischeyihtenaawaau Christ e kuiskutaatisiit, kaye maak chipaa chischeyihtenaawaau an awen kaa kuiskutaatisiit e utawaashiimitutaakut Chishemanituu.
Canadian Bible Society