1 Corinthians11
1Uu kaa ishi waapamiyekw e ishi pimaatisiyaan e kweskaatisiyaan, ekun kaye chiyawaau ishi pimaatisiikw.2Nimiyeyihten muush e chischisiitutauyekw nesht e ihtuutamekw taan kaa ishi chiskutamaatakuch che ihtiyekw.3Mikw maak maau netaweyimitakuch chechii chischeyihtamekw. Christ niikaanishkuweu misiwe naapeuh. Naapeu maak wiichiskweu niikaanishkuweu, ekw Chishemanituu Christ niikaanishkuweu.4Ekw maak naapeu e niikaanishkaakut Christ chika nuukuniyuu e chisteyimaat Christ manahke utastutin mekwaach e ayimihaat maak mekwaach ayimishtamuwaate Chishemanituuh.5Ekw maak iskweu pimaameyihtaakuheu unaapem sasaachistikwaanete mekwaach e ayimihaat maak mekwaach miikute kaa payehtisiyich ahchaahkwa chechii wiihtamuwaat iinuuh taan e ishi nitaweyihtamiyich Chishemanituu chechii chischeyihtamiitwaau. Wesh muyaam e chii kaaschipaataakanuyich ustikwaan ishinaakusuu aniyuu e saasaachistikwaanet.6Siyaasaachistikwaanekwe maak aniyuu e ihtit, ekush misiwe chipaa paskusam ustikwaaniyaapiih. Pimaameyihtaakuniyikwe maak misiwe chechii paskusahk ustikwaaniyaapiih, kiipaa chipaa wiistikwaanehpisuu.7Ekw maak wii naapeu namui chipaa uhchi chikastutineu wesh nuukuhtaaweu Chishemanituuh utiteyihtaakusiiwiniyuu kaye uchisteyihtaakusuwiniyuu. Ekw maak wii iskweu ashuu nuukuhtaaweu taan e ishi chisteyihtaakusiyich unaapemh.8Wesh naapeu namui iskweu e ihtaayich uhchi ushihaakanuu. Iskweu eukw naapeu e ihtaayich kaa uhchi ushihaakanuut.9Kaye maak namui iskweu uhchi ushihtamuwaakanuu naapeuh. Naapeu chii ushihtamuwaakanuu iskweuh.10Enchilh maak uhchi eukw uyuu chipaa uhchi wiistikwaanehpisuu iskweu, e nuukuhtaat unaapemh e tipiiweusiitutaakut.11Wesh ekun kaa ishi nitaweyihtahk Utipeyihchikeu taapishkun iskweuh ekw maak naapeuh chechii nituweyimituyich.12Wesh aat naapeuh e ihtaayich e chii uhchi ushihaakanuut iskweu, misiwe naapeu iskweu e ihtaayich chii uhchi pimaatisiyuu. Taapishkun maak naapeu nesht iskweu Chishemanituu e ihtaayich uhchiyuuch, aniyuuh misiwe chekwaayuu kaa ushihtaayich.13Maamituneyihtamukw maak chiyawaau taan e iteyihtamekw. Miyunaakuniyuu aa iskweu chechii ayimihaat ayimiheukamikuhch ekaa wiistikwaanehpisut.14Muhch e ishi kanawaapahtaakanuuhch chii iteyihtaakanuu ekaa miywaayich e chinwaaihkwet naapeu. Anichii naapeuch kaa chinwaaihkwetwaau namui chika uhchi chisteyimaakanuuch.15Mikw maak chii iteyihtaakanuu e miywaayich iskweu e chinwaaihkwet. Wesh eukw aniyuu ustikwaaniyaapiih e akunahukut ustikwaanihch.16Ekw maak e ihtaakwe awen ekaa naheyihtahk taan kaa iteuch, ekun mikw chechii itweyaan, eukuu e iteyihtamaahch e kuiskunaakuhch nesht eukw uyuu e ihtuutahkwaau umaamuuayimihaauch anite mekwesiinuu e ihtaatwaau.17Uu miin che ititakuch chika aayimuutamaatinaawaau chekwaan ekaa nahiiskaakuyaan. Ihtakun chekwaan e ihtiyekw anite e ayimihaayekw ati wehchipayihch ekaa mitun chechii wiichihiikuyekw an e naachayimihaayekw.18Niishtam chekwaan. Nichii wiihtamaakuun e ihtakuhch anite e papahkaanipayihiitunaanuuhch iskutak nestuwiyekw che maamuuayimihaayekw. Pasch maak nitaapwehten taan e ishi pehtamaan.19Yaaitei puut nituweyihtaakuniyiche chechii ihtakuhch pahkaanipayihuwin yaakw chechii nisituunaakusitwaau taan anichii tiyaapwetwaau Chishemanituu ishi e ihtaayich.20Iskutak nestuwiyekw che maamuumiichisuyekw chechii chischisiitutawekw Utipeyihchikeu namui mechim chimaamituneyimaawaau.21Iskutak e chihchi miichisuyekw, mikw chit ishi chichihchipunaawaau ekaa mechim ashuwaapamekuch kutakach. Ekw maak pasch anichii kutakach namui ihtakuniyuu chekwaayuu che miichitwaau. Ekw maak e ihtaatwaau anichii e siiweyitwaau nesht ihtaauch anichii kaa miyuuhkasutwaau.22Mikw waah miichisuwane maak mikw waah minihkwewane, nete chiichihch miichisuh kaye ekute nete minihkweh. Chuuhkaatamuwaanaawaau aa Chishemanituu utayimiheukamikw. Chiwii pimaamihaawaauch aa anichii kaa chistimaatisiitwaau. Taan maak chechii ititakuch. Namui nika chii itwen e maamihchihiyekw uu e ihtiyekw.23Maauyuu kaa ishi chiskutamuut Utipeyihchikeu, eukw uu kaa ishi aashuu chiskutamaatakuch. Aniyuu kaa tipiskaayich che wiyeshipachishtinaakanuut Utipeyihchikeu Jesus, chii wiichimiichisuumeu uchischinuhamuwaakanh. Chii utineu maak aaihkunaau.24Kaa nanaaskumaat Chishemanituuh. Ekw kaa pahkwenaat aniyuu aaihkunaauh, e itwet, “Utinaahkw uu, muwaahkw, eukuu niyuu maayitakuch. Muwaahkw uu aaihkunaau e chischisiitutauyekw.”25Iskutak maak kaa chiishkwaa miichisutwaau, chii utinam aniyuu minihkwaakaniyuu, ekw kaa itwet, “Uu minihkwaakan eukw uu uschi niskumuwin nimihkuhch che uhchi yaaitashtech. Tahtwaau minihkweyekwe che chischisiitutauyekw.”26Ekw maak tahtwaau che muumekw uyuuh aaihkunaau kaye maak tahtwaau uhchi minihkweyekwe uyuu minihkwaakaniyuu chitihtuutenaawaau chechii chischeyihtahkwaau awenich e chii nipiyich Utipeyihchikeu. Muush maak ihtuutamukw uu paatish takushihke Utipeyihchikeu.27Ekw maak e muuwekw uu aaihkunaau nesht e minihkweyekw an minihkwaakan uhchi, chipaa chisteyihtamihiikunaawaau an e ihtiyekw. Wesh an awen ekaa kaa chisteyihtamihiikut uyuu e ihtinaanuyich maayeyihtamuweu Jesus wiiyuuyuu kaye umihkuyuu maayeyihtamuweu.28Eshkw maak ekaa muwaate awen uyuu aaihkunaau nesht eshkw ekaa minihkwete anit uhchi aniyuu minihkwaakaniyuu, chipaa maamituneyimisuu taapwe chesteyihtamihiikuukwe aniyuu e ihtit ekw maak yaakw chipaa kuuminiyuu.29Awen ekaa maamituneyihtahke aniyuu Christ e chii nipistamaatahkw, muwaate aniyuu aaihkunaauh e kuuminiyuut kaye minihkwete anit uhchi aniyuu minihkwaakaniyuu, Chishemanituu kata wiyaaskunikuu uyuu e ihtit.30Eukw maak uu wehchi mihchet awen aahkusit anit e tashiyekw. Eukw uu wehchi ekaa saapisiyekw. Kaye eukw uu wehchi ishinaakuhch shaash pasch anit e tashiyekw e chii nipitwaau.31Maamituneyimisutaau maak taapwe tiyepicheyihtaakusuwaauhkwe chechii utinamuhkw taan e ishi utinikanuuhch namui chika uhchi wiyaaskunikunaanuu.32Mikw maak e wiyaaskunitahkw Utipeyihchikeu, chiwii kuiskunikunuu wesin, ekw maak Chishemanituu iskutak wiyaaskunaate aniyuu ekaa kaa taapwehtamiyich namui chika uhchi nishuuwanaachimikunaanuu.33Niichishaanitikw, iskutak nishtawiyekwe che maamuu miichisuyekw e chischisiitutawekw Utipeyihchikeu, ashuwaapamaahkuch kutakach.34E siiweyikwe awen, chiisaach chipaa miichisuu nete e ihtaat eshkw ekaa pechi takushihk. Uu maak e ishi nishtawiyekw namui chika uhchi ihtuutenaawaau chekwaan anit chechii uhchi nishuuwanaachimitaakw Chishemanituu. Takushiniyaane nete etituu miin chika chiskutamaatinaawaau.
Canadian Bible Society