Read MARKA 15

MARKA15

Pilat Hmai ah Jesuh

¹Cun zingmaw ngaiah puithiam upa pawl cu mi upa pawl, daanthiam pawl, le khonsil upa pawl thawn thurel khawmnak an tuah lohli. Jesuh cu hri in an khit ih Pilat sinah an ṭhita.²Cun Pilat nih, “Judah siangpahrang na si maw?” tiah a sut.
Cule Jesuh nih, “Nang nih na ti,” tiah a sawn.

³Cule puithiam upa pawl nih Jesuh cu sual a phunphun an puh.⁴Curuangah Pilat nih, “Zangkhaw na sawn hnei thok lo maw? Ta zuarthlainak liangluang hi ngai hnik,” tiah a ti.

⁵Asinain Jesuh nih zangkhaw a sawn hnei lo ruangah Pilat cu a mang a bang.

Jesuh Cu That dingin An Relcat

⁶Lantak Puai cangcang ah Pilat nih mipi ih an dilmi thawngtla pakhat a suahsak hnei ringring.⁷Culai ah Barabbas an tihmi pa, ralthawh lai ah mi a thattu pa cu, ral thotu dang pawl thawn thawng an tla.⁸Cun mipi pawl cu a tuahkel mangin tuah dingah Pilat sin an tiang ih an hler.⁹Asinain Pilat nih a sawn hnei ih, “Judah Siangpahrang hi thlah ningla nan duh maw?” tiah a ti.¹⁰Zangahtihle puithiam upa pawl nih an nahsuah ruangah, a kut ah an tianpit, tih a fiah.

¹¹Asinain Barabbas sawn suah dingah puithiam upa pawl nih mipi pawl cu an forh cia.¹²Cun Pilat nih a sut hnei sal ih, “Asihle Judah siangpahrang nan tihmi pa hi zangtin ka tuah ding nan duh?” tiah a ti.

¹³Cule an ni nih, “Thinglamtah ah that,” tiah an hek sal.

¹⁴Cun Pilat nih, “Zangruangah, zangtu thil ṭhalo a tuah?” tiah a ti.
Asinain an ni nih, “Thinglamtah ah that kau,” tiah an hek hlehhlo.

¹⁵Pilat cu mipi lungkimter a duh, Barabbas cu an hrangah a thlah. Cule Pilat nih Jesuh cu a thawiter hnei ih thinglamtah ah that dingin an kut ah a pe hnei.

Ralkap pawl nih Jesuh An Zohsuam

¹⁶Cun ralkap pawl nih Jesuh cu uktu bawi ih tualhma ah an luhpit ih ralkap bur khat khaw an kokhawm.¹⁷Cule Jesuh cu puan sendup an hruksak ih hling ih phiar mi lukhum a lu ah an khumter.¹⁸Cule salam pek an thok ih, “Judah Siangpahrang, upatnak ta pe!” tiah an zohsuam.¹⁹Cun a lu ah fung thawn an thawi, cihrit an khak, an khuk an bil ih a hmai ah an kun.²⁰Cutin an zohsuam hnukah puan sendup cu an phoihsak ih, ama a hnipuan an hruter, cule thinglamtah ah that dingah an ṭhi ta.

Jesuh Thinglamtah ah An That

²¹Cun khawte ihsin khawpi ih feh, Alexander le Rufus ih pa, Sairin khua mi Simon cu lampi ah an hmu ih, Jesuh ih thinglamtah cu a hramhram in an pu ter.²²Cule Jesuh cu Golgotha tihmi hmun ah an fehpit. Golgotha tih cu “Luruh hmun,” tihnak a i.²³Cun mura thawn nawhmi sabit ti cu an pe, asinain Jesuh nih a ding duh lo.²⁴Cule thinglamtah ah an khen, a hnipuan cu an phat ih hutu nih zangtu bik a co thok tih fiah dingah camcawhfung zuk pit in an zem fa.²⁵Jesuh an khet can cu zingmaw nazi pakua a i.²⁶Cule sual an puhnak catar cu, “Judah Siangpahrang,” tiah a i.²⁷Jesuh thawn damiah panih, a vorh la ah pakhat, a keh la ah pakhat an khen ve.²⁸

²⁹Cun a hram ih vongva tu pawl nih an thangsiat ih, diriam ngaiin an lu an sut, cule, “Hei! Nang hi Biakinn bal piʼn ni thum sungah a sasaltu khi na si lo maw!³⁰Nangma le nangma rung fa la thinglamtah cungin rong ṭum,” tiah an ti.

³¹Cumangin puithiam upa pawl le Daanthiam pawl nih Jesuh cu an zohsuam ih, “Midang cu a rung thei, asinain ama le ma cu a rungfa thei lo.³²Israel siangpahrang, Khrih cu a tun rori ah thinglamtah cungin rong ṭum sehla, kan hmu thok ih kan zum thok,” tiah an ti.
A ma thawn thinglamtah ih an khet mi pawl khaw nih an zohsuam ve.

Jesuh ih Thihnak

³³Cun sun nazi hleinih a kim ih simla nazi pathum tiang ram pumpuluk ah sunkhawmaw a tlung.³⁴Cule simla nazi pathum ah Jesuh cu a ṭap ih, “Eloi, Eloi, lema sabachthani?” tiah thangai in a hek, a sullam cu, “Ka Pathian, ka Pathian, zangah ka na zuangta?” tihnak a i.

³⁵Cun a hram ih a ding mi, mi hrekkhat nih an thei ih, “Ngaihnik uh, Elijah a ko,” tiah an ti.³⁶Cule mi pakhat a va zuang ih puansia cu a hangmi sabit ti sungah a hnim ih, fung ah hri thawn a khit. Cun din dingah Jesuh sin a pe ih, “Hngak rih hnik uh, thinglamtah cung in ṭhum dingah Elijah a rong maw rong lo kan zoh hnik thok,” tiah a ti hnei.

³⁷Cule Jesuh cu thangai in a hek ih a thaw a zom.

³⁸Cun biakinn puanzar cu a tlun zim in a tang zim tiang ṭhen nih ah a ṭhen fa.³⁹Jesuh hmaizawn ih a dingtu ralbawipa nih Jesuh ih thihdan a hmuh tikah, “Hi pa hi Pathian Fapa rori a i kau e!” tiah a ti.

⁴⁰Cuva ah cun lamhlat nawn in a cuan ve tu numi hrekkhat khaw an um. Cupawl cu Magdala khawnu Mary, James nauta sawn le Joses ih nu Mary, le Salome pawl an i.⁴¹Cuvai numi pawl cu Jesuh Galilee peng ih a um laiih a thluntu le a tuamhlawmtu an i. Jesuh thawn Jerusalem ih a feh ve tu numi dang tampi khaw an tel ve.

Jesuh Phumnak

⁴²Cun cuvai ni cu Sabbath ni phak hlan timtuahfak ni a i.⁴³Zanla a kim tikah, Khonsil upa lak ih upat mi sungtel le Pathian Uknak a hngakhlaptu Arimathea khawmi Josef cu ralṭha ngaiin, Pilat sinah a feh ih, Jesuh ih ruak cu a hler.⁴⁴Pilat nih Jesuh a thi cem, tih a theih tikah, a mang a bang ngai. Ralbawipa a ko ih, a thihnak rei cem im? tiah a sut.⁴⁵Ralbawipa sin in Jesuh a thi cem tih a theih tikah a ruak cu Josef a la ter.⁴⁶Cun Josef cu puan nem pate a lei ih Jesuh ruak cu thinglamtah cung in a ṭhum, cule puan nem pate in a tuam ih lung an vih mi thlan ah a phum. Cun thlanka cu lung thawn in a khar ta.⁴⁷Magdala khawnu Mary le Joses ih nu Mary nih Jesuh an phumnak cu an hmu.