Nabos Abik AYohana12
1Agbat ikyɛng ayɔɔt ikak wuruk azanɛn: in di abining akak fɛ́ kunom fam kurɔm wu tɛ kukpin, ni kufɛn na ataas atak wu, nɛ ni ice wu abong igwɔm, fɛ́ a bɛ́ ádat kusɔk abe afaa.2A bɛ́ kafa, na tos, na a ruus tɛ a bɛ́ bakat ites.3Ama anɔng, ikyɛng ayɔɔt ikak ti i wuruk azanɛn: in di kuri kugbat kuhwyen kuseng kukak fi ku bɛ́ ice kanakataat, nɛ átom kusɔk, nɛ ábong igwɔm kanakataat naton ice ko.4Kurúm ko yɛs azining ayɛt asa ataat afɛ́ ádat azanɛn, a worok ina sak azatse. Kuhwyen e nyeseng ashon abining fɛ́ a shim a tes e, nɔng ku da bin ya nggon e ni izen ites ka.5A tes nggon kamatek e, kayɔng fɛ́ ka da ya igwɔm azatse ngma ni ishɛn kutsɔm. Ba wat ba ta nggon e kyɛm sak na Adakunom, sak ni kuta igwɔm wu.6Abining e dorok a hwyet sak na tse sak narɔ fɛ́ Adakunom nye nek iwu, karɔ fɛ́ ba da ku fiis mo, nfi nnom agup azining na anakat afaa ni nsɔk karataat (1,260).7Itsom dorok azanɛn. AMakyel nɛ batomaza wu ra itsom ni kuhwyen e, nɛ batom ko. Kuhwyen e nɛ batomaza ko ti ku bun ni itsom sak ni ba.8Awɛt ba ya kuhwyen e ni itsom e, iko nɛ batom ko bit karɔ isonong bá azanɛn.9Kugbat kuhwyen e kang, yet kuhwyen ayame yɔng fɛ́ ba yes iko amaan e, nɛ aShetan, kuyɔng fi ku wɔrɔk banet azatse ngma. Ba mi barak iko na batomaza ko sak azatse.10Ama anɔng, in fok kutɔ gbɛrɛy azanɛn yɛ,<<Yɔkɔnɔng ishesheknɛ agap ni igwɔmAdakunom yit,ni kukyem Anet-Isheshek wumi bɛ́.Ba mi barak afi itsɛsɛk inɛnbaruneng yit sak aben,iwu fɛ́ a tsɛsɛk isɛ inɛnbaruneng yit ashonAdakunom yitkunom na katuk.11Ba mi ya awɛng natoon wunek nasok Kitsamang eni kucɛɛt atsak fɛ́ ba taas;da ishim kutset bá,ka ba sak nnyim iku awo.12Nek anɔng, nye yin ifeng,iyin kazanɛnnɛ bayɔng fɛ́ ba se ayɛt ka!Awɛt kawɛy se gungna kazatse nɛ izek,nek amaan e mi tik sakaben ni yin!A mi mos ne kafa kawe,nek a rēn fok izen wukyɛk gyegyet.>>13Ni izen fi kuhwyen e di ba mi ku ko wɔrɔk sak azatse, ku kpa di kuus abining fɛ́ a tes nggon kamatek e me.14Awɛt ba nɔɔk abining e akufabak afaa afɛ́ agbat akim, nɔng a di ki teng sak narɔ fɛ́ ba ku nye ne natse, karɔ fɛ́ ba sak ba da ku fiis mo nfi iyɛ taat ni bit, kɔn ihwyen e.15Wat kuhwyen e turung ashi nanu ko ti kukyɛk, nɔng ku da bin sok abining e.16Awɛt mben di sɛ abining e, in tarak kanu in ngɔnɔng kukyɛk fi kuhwyen e turung nanu ko.17Kuhwyen e nye kafa kawe makiyi na abining e, ku wat ku kpa tang itsom ni ishɛrɛp nnon abining e, bayɔng fɛ́ na foos ifɛ̀ Adakunom, ba yit kucɛɛt aYeso.18Kuhwyen e ma nyeseng naton nzɛk nanu kukyɛk e.
The Seed Company